Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaminne boto napabattua Na’bi Obaja; napabattui pasanNa Batara Kaminang Tinggia ri passala’na bansa Edom: Nakirimmi battu tunisuroNa Batara mae ri bansa-bansaya, siagang le’ba’mi nilangngere’ pasang naeranga kamma anne, "Sadia mako untu’ a’bundu’! Umba ki’lampa mange ambunduki bansa Edom."
2 Na mae ri Edom Nakana Batara, "Kupa’jari lammako sa’gennu nihina ri sikontu bansaya.
3 Nitipuko ri atinnu tampoa. Ibukotanu iamintu moncong batu makassa’; tampa’ pammantangannu iratei ri coppo’na moncong tinggia. Lanri kammana anjo nakanamo pikkirannu, ‘Inai todong lakkulle antu’gurangki’?’
4 Manna pole nupare’ balla’nu santinggi ru’munna jangang-jangang rajawali, siagang santinggi bintoenga ri langi’, mingka ma’nassa laKutu’gurangko.
5 Palukkaka yareka paella’ battua ri wattu bangngi, poro nakaerokia bawang naalle. Tau angngattilika anggoro’ ri kokoa, tuli nia’ nasesa piram batu are. Mingka ikau lanibarrasakko ri musu-musunnu sa’gennu cappu’.
6 He jari-jarina Esau, nigaledai siagang nialleang kabusukko barang-barannu manna taccokkoa.
7 Nitipuko ri sikamma tau nuaganga sita’gala’, siagang nibongkako battu ri pa’rasangannu. Nibetako ri agang-agannu, nitannangngiko sikko’ ri tau nuaganga sipangnganreang. Napakkuta’nangngangko, angkanaya, ‘Kemae ngasemmi anjo kacara’dekanna?’
8 Ri allo Kuhukkunna bansa Edom, Kupanraki sikamma tucara’de’na. Lalanynya’ kabusu’mi kacara’dekanna ke’nanga, tena bate-batena.
9 Sikamma tubarani battua ri Téman lanabattui malla’, siagang sikontu tantarana Edom lamate kabusuki."
10 "Le’bakko a’gau’ palla’ mae ri sikamma sari’battannu iamintu jari-jarina Yakub. Lanri kammana anjo laKupanrakiko siagang nicallako ri taua lalang sikontuna jammanga.
11 Ammenteng bellako, ri allo battuna musua allappoi pakke’bu’na Yerusalem siagang nabeta anjo kotaya. Tena apa-apa nukana ri wattunna naengka’ ngaseng ke’nanga kakalumanynyangnganna Yerusalem na nabage-bage ri ke’nanga. Sangkamma jako ja’dala’nu siagang anjo musua.
12 Tena nusiratang lasannang nyawanu mae ri sare kodina tu Yehuda siagang rannu pa’mai’nu ri allo kapanrakanna anjo sari’battannu. Tena nusiratang a’bicara lompo ri wattu natujuna susa.
13 Tena nusiratang antama’ ri kotana ummakKu, siagang nuorre’ sikamma tau pa’risika, la’biangampa nikanaya angngellaki ri allo natujuna nakasa’ ke’nanga!
14 Tena numusti ammenteng ri panyingkulu’na aganga, untu’ angngadangi tau laria ampilari musua, yareka ampassareangi ke’nanga mae ri balia ri allo natujuna ke’nanga kasusaang."
15 "Tojeng, a’reppese’mi allongKu, iNakke, Batara untu’ angngadeli bansa-bansaya. Apa nagaukanga tu Edom lanibalasaki mae ri kalenna. Lanakasia’ tongi apa le’baka nagaukang.
16 Irate ri bulu’ matangkasakKu le’ba’mi nainung ummakKu inungang pangngebarranna hukkunganna. Mingka inungang mae ri bansa-bansaya ri buttaya anne la’bi paikangngangi pole. Takkulleai naliliang ke’nanga anjo hukkunganga. Musti nainungi ke’nanga sa’genna la’busu’, nampa lalanynya’ ke’nanga tena bate-batena."
17 "Mingka ri Bulu’ Sion, lania’ lasalama’, siagang anjo buluka a’jari tampa’ nisa’la’ untu’ iNakke. Jari jari-jarina Yakub lanapatangi ammotere’ butta pisakana ke’nanga.
18 UmmakKu Israel larapangi pepe’ angkanrei jari-jarina Esau, rapang pepe’ angkanreai sa’genna cappu’ raramea ri kokoa. Tena manna sitau battu ri jari-jarina Esau akkulle lata’lappasa’. INakke, Batara anne akkana!
19 Lanaempoi tu Yehuda timboranga pa’rasangang Edom. Sikamma tau battua ri pa’moncongang bageang ilauka lanabetai daera Filistin. Suku Benyamin lanaempoi Gilead, siagang Israel ummakKu lakoasai sikontu Efraim siagang Samaria.
20 Tu Israel waraka lammotereki battu ri pammelakkanga siagang naempoi Fenisia sa’genna Zarfat. Tu Yerusalem nipelaka mange ri Sardis, lammotereki siagang napatangi kota-kota bageang timboro’na Yehuda.
21 Pandudu’na Yerusalem porea lanabunduki Edom nampa nabeta. Nampa iNakke Batara lammarenta salaku karaeng."
Obaja
Video Obaja 1
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA