Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Reya’ ramalanna Obaja, se aropa pessen dhari GUSTE Allah Se Mahatenggi parkara bangsa Edom: PANGERAN la ngerem otosanna ka sa-bangsa, sengko’ ban ba’na la ngedhing parkara pessen se egiba para otosan jareya, iya reya, "Mara aya-sadhiya se aperranga! Mara ja’ mangkada nyerrang Edom!"

² Ban ka Edom, PANGERAN adhabu, "Bi’ Sengko’ ba’na epata’andhi’a kakowadan, sopaja ba’na eya’-seya’a bi’ sakabbinna bangsa.

³ Ba’na ekenneng tepo atena se angko. Ibu kotthana ba’na gunong bato se koko; kennengnganna ba’na e konco’na gunong se tenggi. Daddi ba’na apekker, ‘Sapa se bisa’a malabu Sengko’?’

⁴ Maske bengkona ba’na tenggina epakantha tenggina lebunna mano’ rajabali, akantha tenggina tang-bintang e langnge’, bi’ Sengko’ masthe epalabu.

⁵ Maleng ban rampok se dhateng e baja malem, pera’ ngala’ sabarang se ekaterrowe. Mon oreng se metthek anggur e kebbun, masthe gi’ badha se edina e bungkana. Tape ba’na epatompes tadha’ karena bi’ mosona.

⁶ He, toronanna Esau, ba’na egaludhak bi’ mosona ban dhi’-andhi’na ba’na se eerrep erampas.

⁷ Ba’na eco-koco bi’ sakutuna, ban eojuk dhari nagarana. Ba’na epakala bi’ bat-sobadda, ejebbak bi’ oreng se ngakan abareng ban ba’na. Reng-oreng jareya padha atanya parkara ba’na, ‘E dhimma sateya sakabbinna kapenterranna?’

⁸ E are baktona Sengko’ ngokom Edom, reng-orengnga se ter-penter bi’ Sengko’ epateyana. Sakabbinna kabicaksana’anna bakal mosna’a, tadha’ lampadda.

⁹ Para parjurit dhari Téman bakal padha’a katako’an ban parjurit Edom bakal tebasa kabbi."

¹⁰ "Ba’na kejjem ka tan-taretanna, toronanna Yakub; daddi ba’na bakal epamateya, ban ecaleya oreng salanjangnga jaman.

¹¹ Ba’na manjeng e jauna e are baktona moso arosak labangnga Yerusalim ban makala kottha jareya. Ba’na neng-enneng malolo e bakto moso ngangko’ sakabbinna dhi’-andhi’na Yerusalim se bi’ moso pas ebagi e antarana reng-orengnga dibi’. Ba’na padha jahadda ban moso jareya.

¹² Ba’na ta’ sapantessa senneng nangale’e papasthenna oreng Yehuda se palang sarta arassa senneng e are teppa’na taretanna ba’na mate. Ta’ sapantessa ba’na raja caca e bakto taretanna ba’na sossa.

¹³ Ta’ pantes ba’na maso’ ka kotthana Tang ommat, nyoragi reng-oreng se nanggung kasossa’an, apa pole arampok dhi’-andhi’na e are teppa’na aba’na palang!

¹⁴ Ta’ sapantessa ba’na manjeng e tapadhangdhang ngaddhanga reng-oreng se buru dhari moso otabana massra’agi reng-oreng jareya ka mosona e are teppa’na reng-oreng jareya nemmo kasossa’an."

¹⁵ "Onggu, la para’ arena, Sengko’, PANGERAN, se ngadilana sa-bangsa. Apa se elakone Edom bakal ebalessa ka aba’na. Edom bakal taowa rassana keya apa se la elakone aba’na.

¹⁶ E attassa Tang gunong se socce Tang ommat la ngenom nom-enoman okoman se pae’. Tape nom-enoman kaangguy sa-bangsa e bume reya jang pae’an pole. Okomanna jareya ta’ ekenneng tolak. Kodu eenom sampe’ tadha’, saellana jareya reng-oreng jareya bakal mosna’a tadha’ lampadda."

¹⁷ "Tape e Gunong Siyon bakal badha’a se salamet, ban gunong jareya daddi kennengngan kaangguy Sengko’ malolo. Toronanna Yakub bakal ngaandhi’a pole tana sangkolanna.

¹⁸ Tang ommat Isra’il bakal padha’a ban apoy se ngello’ toronanna Esau sampe’ katonon tadha’ karena akantha apoy se ngello’ darameyan e teggal. Tadha’ settonga dhari toronanna Esau se lopoda. Sengko’, PANGERAN, la ngoca’!

¹⁹ Reng-oreng Yehuda Lao’ bakal ngobasa’ana Edom. Reng-oreng dhari pagunongan bagiyan bara’ bakal makala’a baba Filistin. Suku Benyamin bakal ngobasa’ana Gileyad, ban Isra’il Tang ommat bakal ngobasa’ana saantero Efraim ban Samaria.

²⁰ Oreng Isra’il dhaja bakal abaliya dhari pambuwanganna ban ngobasa’ana Fenisia sampe’ ka Zarfat. Reng-oreng Yerusalim se ebuwang e Sardis, bakal abaliya ban ngaandhi’a tha-kottha e bagiyan lao’na Yehuda.

²¹ Pandhudhu’ Yerusalim se jaja bakal nyerranga Edom ban matellok nagara jareya. Ban Sengko’, PANGERAN, bakal marenta’a menangka rato."

Obaja

Video Obaja 1

Ikuti Kami:

KONTAK | PARTISIPASI | DONASI