Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma hubani si Musa,
2 “Marsahap ma ho hubani halak Israel anjaha hatahon ma hubani sidea, anggo masuk ma hanima hu tanoh Kanaan, (on ma tanoh ia, na gabe parbagianannima, tanoh Kanaan ronsi parbaloganni)
3 bagiannima hampit dangsina singgan ni halimisan Sin mangihut-ihut tanoh Edom; ase parbalogannima hampit dangsina, ai ma singgan ni ujung ni Laut Garam hampit hapoltakan;
4 anjaha marlegot ma parbalogan ai hun dangsina ni raboyon Akrabim, mandipar hu Sin, anjaha marujung i dangsina ni Kades-Barnea, dob ai luar ma hunjai hu Hazar-Adar, anjaha laho use hu Asmon.
5 Marlegot use, parbaloganni ai hun Asmon hu Bah Masir, anjaha marujung i laut.
6 Parbalogannima hampit hasundutan, ai ma laut na bolon ai pakon topini ai, ai ma parbalogan hampit hasundutan.
7 On ma parbalogan hampit utara, Hun laut na bolon ai pagistangonnima ma ai hu Dolog Hor,
8 anjaha hun Dolog Hor pagistangonnima ma ai das hu dalan na hu Hamat, anjaha ujung ni parbalogan ai, ai ma i Zedad.
9 Dob ai gistang ma parbalogan ai hunjai das hu Zifron, anjaha ujungni, ai ma i Hasar Enan; ai ma parbalogannima hampit utara.
10 Anjaha parbalogannima hampit hapoltakan, gistang do ai hun Hasar-Enan das hu Sefam;
11 hun Sefam tuad ma parbalogan ai hu Ribla, hampit hapoltakan ni Ain, dob ai tuad use ma parbalogan ai anjaha gistang manopi-nopi Tao Kinneret hampit hapoltakan.
12 Dob ai tuad ma parbalogan ai hu Jordan, anjaha ujungni bani laut Garam. Ai ma gabe tanohnima pakon parbaloganni inggot.”
13 Dob ai nini si Musa ma hubani halak Israel, “On ma tanoh ia, sibagionnima marhitei ruji-ruji, na hinatahon ni Jahowa sibereon hubani na siah marga nari pakon hubani na satongah marga Manase.
14 Ai domma dapotan parbagianan marga ni Ruben mar sasaompung pakon marga ni halak Gad mar sasaompung pakon satongah marga Manase;
15 na dua marga pakon na satongah marga nari, domma dapotan parbagianan idipar ni Jordan, tontang ni Jeriko hampit hapoltakan.”
16 Dob ai nini Jahowa ma hubani si Musa,
17 “On do goran-goran ni dalahi na marbagi tanoh in bennima, Malim Eleasar pakon si Josua, anak ni si Nun.
18 Ambah ni ai maningon buatonnima do sada kopala humbani ganup marga laho marbagi tanoh ai.
19 Anjaha on do goran-goran ni dalahi ai: Humbani marga Juda, si Kaleb, anak ni si Jepunne;
20 humbani marga Simeon, si Samuel, anak ni si Amihud;
21 humbani marga Benjamin, si Elidad, anak ni si Kislon;
22 humbani marga Dan, sada kopala, si Buki, anak ni si Jogli;
23 humbani anak ni si Josep, si Haniel, anak ni si Epod, sada kopala humbani marga Manase;
24 humbani marga Efraim, sada kopala, si Kemuel, anak ni si Siftan;
25 humbani marga Sebulon, sada kopala, si Elisapan, anak ni si Parnah;
26 humbani marga Isasar, sada kopala, si Paltiel, anak ni si Assan;
27 humbani marga Asser, sada kopala, si Ahihud, anak ni si Selomi;
28 humbani marga Naftali, sada kopala, si Pedahel, anak ni si Amihud.
29 Ai ma dalahi, sagala na tinonahkon ni Jahowa mambagihon tanoh Kanaan bani halak Israel.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA