Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ PANGERAN ngotos Mosa

² manapa’ kon-pakon reya ka bangsa Isra’il, "Sakejja’ aggi’ ba’na bakal maso’a ka nagara Kana’an, nagara se bi’ Sengko’ ebagi ka ba’na menangka tana sangkolan. Areya’ tes-batessa nagara jareya.

³ E bagiyan lao’, bates jareya molae dhari ra-ara beddhi Zin noro’ salanjangnga batessa Edom. E temor bates jareya molae dhari konco’ lao’na Tase’ Mate,

⁴ abiluk ka lao’ nojju ka Lorong Akrabim ban terros ka Zin sampe’ ka Kades-Barnea e bagiyan lao’. Dhari jadhiya abiluk ka bara’ lao’ sampe’ ka Hazar-Adar, ban terros ka Azmon.

⁵ E jadhiya abiluk ka cora e batessa Messer sampe’ ka Tase’ Tengnga.

⁶ Tase’ Tengnga daddi batessa nagarana ba’na se bagiyan bara’.

⁷ E bagiyan dhaja, bates jareya molae dhari Tase’ Tengnga terros ka Gunong Hor

⁸ dhari jadhiya ka Jalan Hamat, terros ka Zedad

⁹ ban ka Zifron sampe’ gan Hazar-Enan.

¹⁰ E bagiyan temor, batessa molae dhari Hazar-Enan ka Sefam.

¹¹ Dhari jadhiya toron ka Ribla e temorranna Ain, pas terros ka nong-gunong e paseser temorra Talaga Galilea,

¹² pas ka lao’ salanjangnga Songay Yordan sampe’ ka Tase’ Mate. Jareya nagarana ba’na menorot tes-bates e sakalenglengnga."

¹³ Dhabuna Mosa ka bangsa Isra’il, "Jareya tana se etarema’a ba’na kalaban ngangguy ellot, tana se menorot dhabuna PANGERAN kodu ebagi ka ku-sukuna bangsa Isra’il se bannya’na sanga’ satengnga.

¹⁴ Ku-suku Ruben ban Gad sarta sabagiyan dhari suku Manasye la narema bagiyanna, tana jareya la egi-bagi ka sabala’anna ku-suku jareya dibi’.

¹⁵ Tana sangkolanna ku-suku jareya e bagiyan temorra Songay Yordan, e seddi’anna kottha Yerikho."

¹⁶ Dhabuna PANGERAN ka Mosa,

¹⁷ "Se kodu magi tana jareya iya areya Imam Eleyazar ban Yusak ana’na Nun.

¹⁸ Pele keya settong pamimpin dhari saneyap suku, soro nolonge Eleyazar ban Yusak magi tana jareya."

¹⁹ Nyamana reng-oreng jareya iya areya: Suku ~~ Pamimpinna; Yehuda ~~ Kaleb ana’na Yefune; Simeyon ~~ Samuwel ana’na Amihud; Benyamin ~~ Elidad ana’na Kislon; Dan ~~ Buki ana’na Yogli; Manasye ~~ Haniyel ana’na Efod; Efraim ~~ Kemuwel ana’na Siftan; Zebulon ~~ Elisafan ana’na Parnah; Isakhar ~~ Paltiyel ana’na Azan; Asyer ~~ Ahihud ana’na Selomi; Naftali ~~ Pedayel ana’na Amihud;

²⁰ (34:19)

²¹ (34:19)

²² (34:19)

²³ (34:19)

²⁴ (34:19)

²⁵ (34:19)

²⁶ (34:19)

²⁷ (34:19)

²⁸ (34:19)

²⁹ Jareya reng-oreng se epakon PANGERAN magi tana sangkolan ka bangsa Isra’il e nagara Kana’an.