Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Napassareangi Batara mae ri Musa

² anne parenta-parentaya untu’ bansa Israel, "Sinampe’ mami nanuntama’mo ri pa’rasangang Kanaan, iamintu pa’rasangang Kupassareanga mae ri kau a’jari butta pisaka. Iaminne pa’baeng-baenna anjo pa’rasanganga.

³ Ri bageang timboro’ anjo pa’baeng-baenga appakkaramulai battu ri parang lompo Zin tulusu’ mange ri Edom. Ri bageang iraya anjo pa’baeng-baenga appakkaramulai battu ri cappa’ timboro’na Tamparang Matea,

⁴ a’lekko timboro’ mange ri Oloang Akrabim siagang tulusu’ mange ri Zin sa’genna mange ri Kades-Barnea ri bageang timboro’. Battu anjoreng a’lekko kalau’ sike’de’ sa’genna mange ri Hazar-Adar, na tulusu’ mange ri Azmon.

⁵ Anjoreng a’lekkoi mange ri Ka’bung ri pa’baeng-baenna Mesir na kala’busang ri Tamparang Tangngaya.

⁶ Tamparang Tangngaya a’jari pa’baeng-baenna pa’rasangannu ri bageang ilau’.

⁷ Ri bageang wara’, anjo pa’baeng-baenga appakkaramulai battu ri Tamparang Tangngaya mange ri Moncong Hor

⁸ nampa battu anjoreng mange ri Oloang Hamat, nampa tulusu’ mange ri Zedad

⁹ siagang mange ri Zifron nampa kala’busang ri Hazar-Enan.

¹⁰ Ri bageang iraya, anjo pa’baeng-baenga appakkaramulai battu ri Hazar-Enan mange ri Sefam.

¹¹ Battu anjoreng na naung mange ri Ribla ri bageang rayanganna Ain, nampa tulusu’ mange ri bulu’-buluka ri biring rayanganna Tamparang Galilea,

¹² nampa a’lampa timboro’ amminawang ri siapa area la’buna Binanga Yordan sa’genna mange ri Tamparang Matea. Iaminjo pa’rasangannu situru’ pa’baeng-baenga ri tammulilina."

¹³ Nakanamo Musa mae ri bansa Israel, "Iaminjo butta lanutarimaya, iamintu punna nugoccang kamma loterei; butta mustia nubage mange ri salapang assitangnga suku bansa Israel situru’ parentaNa Batara.

¹⁴ Suku-suku Ruben siagang Gad kammayatompa bageruanna suku Manasye le’ba’mi natarima tawana ke’nanga, siagang le’ba’ tommi nabage-bage anjo buttaya mae ri massing-massing kaluargana ke’nanga.

¹⁵ Anjo butta pisakana ke’nanga ri bageang rayanganna Binanga Yordan, ri ampi’na kota Yerikho."

¹⁶ Nakana Batara mae ri Musa,

¹⁷ "Ia mustia ambagei anjo buttaya mae ri kau ngaseng iamintu Imang Eleazar, siagang Yosua ana’na Nun.

¹⁸ Jo’jo’ tongi tassitau pamimping battu ri massing sukua untu’ ambantui Eleazar siagang Yosua ambagei anjo buttaya."

¹⁹ Na ia areng-arenna anjo taua iamintu: Suku ~~ Pamimping; Yuda ~~ Kaleb ana’na Yefune; Simeon ~~ Samuel ana’na Amihud; Benyamin ~~ Elidad ana’na Kislon; Dan ~~ Buki ana’na Yogli; Manasye ~~ Haniel ana’na Efod; Efraim ~~ Kemuel ana’na Siftan; Zebulon ~~ Elisafan ana’na Parnah; Isakhar ~~ Paltiel ana’na Azan; Asyer ~~ Ahihud ana’na Selomi; Naftali ~~ Pedael ana’na Amihud;

²⁰ (34:19)

²¹ (34:19)

²² (34:19)

²³ (34:19)

²⁴ (34:19)

²⁵ (34:19)

²⁶ (34:19)

²⁷ (34:19)

²⁸ (34:19)

²⁹ Iaminjo sikamma tau Naparentakanga Batara untu’ ambagei anjo butta pisakaya mae ri bansa Israel ri pa’rasangang Kanaan.