Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Barita ni si Nehemia, anak ni si Hakalya. Masa do bani bulan siah, paduapuluh-tahunkon, tudu sanggah i huta Susan ahu, ibagas rumah ni raja ai,
2 jadi roh ma si Hanani, sada humbani saninangku, rap pakon piga-piga dalahi hun Juda; jadi husungkun ma sidea pasal halak Jahudi, sagala na maluah, na tading humbani halak na tarbuang, pakon pasal Jerusalem.
3 Dob ai nini sidea ma hu bangku, “Ia simasima ni halak, na tading humbani halak na tarbuang, marhasunsahan banggal do i nagori ai anjaha madorun; ai mareong do tembok ni Jerusalem, anjaha seda do horbanganni ibahen apuy.”
4 Jadi dob hubogei barita ai, hundul ma ahu anjaha tangis, pusok uhurhu piga-piga dokah; marpuasa ma ahu anjaha martonggo i lobei ni Naibata na i surga.
5 Ningku ma, “Ham Jahowa, Naibata na i surga, Naibata na timbul anjaha sihabiaran, na tongtong mardingat padan idop ni uhur hubani na mangkaholongi-Si anjaha na mandalankon titah-Ni.
6 Sai tangi ma pinggol-Mu anjaha tonggor panonggor-Mu manangihon tonggo ni juakjuak on, na hutonggohon nuan i lobei-Mu borngin pakon arian, laho mangapiti halak Israel jabolon-Mu, sonai homa pangakuan dousa, na binahennami dompak Ham. Ahu pe, sonai homa ginompar ni bapa, mardousa do.
7 Bajan tumang do hanami marparlahou dompak Ham; seng ihorjahon hanami titah, aturan pakon uhum, na tinonahkon-Mu hubani si Musa juakjuak-Mu.
8 Sai dingat Ham ma hata, na tinonahkon-Mu hubani si Musa, juakjuak-Mu, nimu, ʻAnggo mangosei hanima, erapkonon-Ku do hanima hu tongah-tongah ni sagala bangsa
9 Tapi anggo mulak uhurnima, iramotkon anjaha ihorjahon hanima titah-Ku, porini pe domma mambur hanima das bani ujung ni langit, sai patumpuon-Ku do hanima hunjai, anjaha mulak hanima boanon-Ku hu ianan, na dob Hupilih bahen ianan ni goran-Ku.ʼ
10 Jabolon-Mu do sidea tongon anjaha bangsa-Mu, na dob pinaluah-Mu marhitei hagogohon-Mu na banggal pakon marhitei tangan-Mu na gogoh.
11 Ham Tuhan, sai tangi ma pinggol-Mu manangihon tonggo ni juakjuak-Mu on pakon tonggo ni jabolon-Mu, sagala na marosuh marhabiaran bani goran-Mu; sai manumpak ma Ham bani langkah ni juakjuak-Mu on sadari on, sai jumpahan idop ni uhur ma ahu bahen Ham i lobei ni raja in! Sitahu anggur ni raja in do ahu.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA