Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaminne laporang napabattua Nehemia, ana’na Hakhalya, ri passala’na sikamma jama-jamang nagaukanga. Lalang ri bulang Kislew, ri taung makaruampulona ammarenta Artahsasta salaku karaeng ri Persia, inakke Nehemia, niakka’ ri Susan, ibukotana kakaraenganga.
2 Anjo wattua niaki battu ri Yehuda sari’battangku iamintu niarenga Hanani, siagang siapa are tau. Kukuta’nammi ke’nanga angkana antekamma antu mae kaadaanna kota Yerusalem siagang sikamma tu Yahudi ammoterekamo battu nipela’ ri Babel.
3 Nacaritami ke’nanga angkana sikamma anjo tau le’baka nipela’ ammotere’mi mange ri anjo pa’rasanganga. Mingka kamma-kamma anne teai sipato’ sessana katallassanna, siagang sangnging nihinai ri sikamma bansa maraeng niaka a’reppese’. Nampa pole sikamma tembo’ kalli’na Yerusalem ancuru’ iji tassimbung-simbung, kammayatompa sikamma pakke’bu’ lompona tenapa nale’ba’ nipakabaji’ baku’ le’ba’na nitunu ri wattu allaloa.
4 Kulangngere’na anjo kabaraka, ammempoma’ naung nampa angngarru’. Pirangallo arei tuli si’na kusa’ring pa’maikku. Tulusu’ appuasama’ siagang appala’ doang ri Allata’ala,
5 kukana, "O, Karaeng Allata’ala makoasaya ri suruga. IKattemi Allata’ala Malompoa, na mandallekammo ikambe ri Katte lalang malla’. TamamminrayaKi’ ri janjinTa mae ri tau mangngaia ri Katte siagang mannurukia ri parentaTa.
6 Kicinikima’ o Batara, siagang Kipilangngeri anne pappala’ doang kupanaika ri Katte allo bangngi untu’ umma’ Israel, anjo atanTa ngaseng. Kumangakui angkana ikambe, umma’ Israel, dorakami. Inakke siagang boe-boeku doraka tonga’.
7 Dorakami ikambe mae ri Katte siagang nidakkaimi sikamma parentaTa. Tamannurukiai ikambe ri hukkung-hukkung le’baka Kipassareang ri kambe tete ri Musa, anjo atanTa.
8 O, Batara, Kiu’rangi kana-kananTa napabattua Musa saba’ parentaTa. Angkanaya, punna ikambe, umma’ Israel, amminrai mae ri Katte, laKipasisa’la’-sa’laki mae ri alla’na bansa maraenga.
9 Mingka punna ammotereki pole ikambe mae ri Katte siagang mannuruki ri parentaTa, ikambe le’baka tassa’la’-sa’la’ laKipa’rappungi ammotere’, manna pole niaki ikambe ri cappa’-cappa’na linoa. Nampa laKipoterang ikambe mange ri tampa’ le’baka Kipile untu’ a’jari tampa’ panynyombang mae ri Katte.
10 O, Batara, ikambe anne ata-atanTa, umma’ kalenTa le’baka Kipasalama’ lalang koasaTa siagang kahebakkanna kagassinganTa.
11 Kipilangngeri laloi anne pappala’ doangku siagang pappala’ doanna atanTa maraenga, eroka ampakala’birikKi’. Kipabattumi pannulunTa sollanna anne alloa akkullei anne atanTa anggappa pangngamaseang battu ri karaenga." Anjo wattua inakke pangngurusu’ inunganna karaenga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA