Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Areya’ laporanna Nehemiya pottrana Hakhalya parkara kon-lalakon se elampa’agi salerana. E bulan Kislew e taon se kapeng dhu polo pamarenta’anna Artahsasta se jumenneng rato Persiya, sengko’, Nehemiya, badha e Susan, ibu kottha karaja’an.
2 E bakto jareya tang taretan, Hanani, dhateng dhari Yehuda abareng ban reng-oreng laenna. Bi’ sengko’ reng-oreng jareya etanyae parkara kabadha’anna Yerusalim sarta reng-oreng Yahudi se abali dhari pambuwangan e Babil.
3 Ca’na reng-oreng jareya, reng-oreng bekkas buwangan se la abali ka nagarana jareya, sateya nyangsara odhi’na ban eya-seya bi’ sa-bangsa manca se badha e sabingkerra. Ban pole, dhung-geddhung Yerusalim gi’ rosak ban ancor ta’ etemmo karowanna, dineng bang-labang sakethengnga gi’ ta’ epateppa’ molae bakto eobbar sabbanna rowa.
4 Ngedhing careta jareya, sengko’ toju’ sambi nanges. Pan-barampan are abidda sengko’ sossa. Sengko’ terros apowasa sambi adu’a ka Allah,
5 "GUSTE Allah se ngobasane sowarga. Junandalem ka’dhinto Allah se Agung; abdidalem sadaja ngadhep ka Junandalem kalaban ate tako’. Junandalem teptep esto sareng neptebbi parjanjiyanna Junandalem ka oreng se taresna ka Junandalem sareng se ta’at ka papakonna Junandalem.
6 Ngereng oladi abdidalem, GUSTE, sareng peyarsa’agi abdidalem, se adu’a seyang malem nyo’onnagi ommat Isra’il, di-abdina Junandalem. Abdidalem ngakone ja’ abdidalem sadaja, ommat Isra’il, dusa ka Junandalem; abdidalem sadaja sareng para bangatowa sadajana padha dusa jugan.
7 Abdidalem sadaja daraka ka Junandalem sareng ta’ atoro’ ka kon-papakonna Junandalem. Abdidalem sadaja ta’ ta’at ka kom-hokom se eparengngagi Junandalem kalaban parantara’anna Mosa, abdiepon Junandalem.
8 GUSTE, Pangeran kaula, kaemodi dhabuna Junandalem se edhabuwagi Mosa kalaban parentaepon Junandalem, se maenga’ ja’ manabi ommat Isra’il ta’ esto ka Junandalem, sareng Junandalem badhi epacar-kalacera e antarana sa-bangsa laennepon.
9 Namong manabi ommat Isra’il abali pole ka Junandalem sarta ta’at ka kon-papakonna Junandalem, sareng Junandalem ommat se ampon car-kalacer ka’dhinto badhi epakompol pole, sanare car-kalacer e co’-konco’na bume. Saamponna gapaneka Junandalem mabaliya abdidalem sadaja ka kennengngan se sareng Junandalem ampon epele ebadhi kennengnganna oreng abakte ka Junandalem.
10 GUSTE, bangsa Isra’il ka’dhinto abdiepon Junandalem, ommattepon Junandalem dibi’, se sareng Junandalem ampon epasalamet sareng kakobasa’an sarta kakowadannepon Junandalem se talebat rajana.
11 Ngereng peyarsa’agi du’a abdidalem sareng du’aepon sadajana abdiepon Junandalem laenna, se abakteya ka Junandalem. Abdidalem nyo’ona tolong ka Junandalem sopaja e are mangken abdina ahasela sareng ekaneserrana sareng rato." E jaman jareya sengko’ se ngoros nom-enomanna rato.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA