Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nyanyeyagi nyanyeyan se anyar kaator ka PANGERAN! Mara nyanye ka PANGERAN, saantero bume!

² Mara nyanye kaator ka PANGERAN, ban molja’agi Salerana; sabban are berta’agi kabar gumbira ja’ Salerana la masalamet sengko’ ban ba’na.

³ Careta’agi kaagunganna ka sa-bangsa, ban lalakon raja se elampa’agi Salerana kaangguy ommat manossa.

⁴ Sabab PANGERAN reya agung ban talebat molja, kodu ekatako’e alebbiyan dhari ba-diba.

⁵ Ba-dibana bangsa laen pera’ arca brahala, tape PANGERAN reya se nyepta’agi langnge’.

⁶ Salerana katotoban kamolja’an ban kaagungan, Padalemmanna possa’ ban kobasa sarta kaasreyan.

⁷ Molja’agi PANGERAN, he ommat manossa, molja’agi kaagungan ban kakowadanna!

⁸ Molja’agi asmana se agung, mara ngeba kurban ka dhalem Padalemmanna.

⁹ Semba Pangeran ngangguy pangangguy kabakteyan! Pangetter e ajunanna, saantero dunnya!

¹⁰ Berta’agi ka sa-bangsa, "PANGERAN reya Rato! Bume koko ta’ ekenneng gundhek; Salerana bakal ahakimana sa-bangsa kalaban adil."

¹¹ Mara paperak, langnge’ ban bume! Mara agarudhu’, tase’ ban saessena!

¹² Mara paperak, gal-teggal ban men-tamennanna! Ka’-bungka’an e alas bakal rak-soragana.

¹³ Sabab PANGERAN rabu marenta e bume, ahakimana sa-bangsa kalaban jujur ban adil.