Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani pambobai koor. Inggouni: Almaut Laben. Psalm ni si Daud. (9-2) Sai pujionku do Ham Jahowa humbani gok ni uhurhu, sai baritahononku do sagala halongangan na binahen-Mu in.
2 (9-3) Marmalas ni uhur anjaha marolob-olob do ahu Bamu, dodingkononku do goran-Mu, Ham Sitimbulan in;
3 (9-4) halani ai manginsurut do munsuhku, mangkajurgang anjaha bois i lobei-Mu.
4 (9-5) Tongon, Ham do sipatorsa uhum ampa paharangku, hundul bani hotak-Mu do Ham manguhumi, Ham panguhum na pintor.
5 (9-6) Hona hata do ibahen Ham sipajuh begu-begu, iagouhon Ham parjahat, anjaha isasap Ham do goran ni sidea sadokah ni dokahni.
6 (9-7) Bois do munsuh in, marongrong lalab, maseda do sagala huta ibahen Ham, magou pardingat bani sidea.
7 (9-8) Tapi, ia Jahowa totap do marparatas ronsi sadokah ni dokahni; ipajongjong do hotak-Ni laho manguhumi.
8 (9-9) Ia do manguhum dunia on ibagas hapintoron, anjaha ipapintor uhum bani sagala bangsa sintong-sintong.
9 (9-10) Ase Jahowa do batar-batar bani na hona dorun, anjaha batar-batar bani panorang hasosakan.
10 (9-11) Halani ai martenger ni uhur Bamu do sagala na mananda goran-Mu, ai seng ongga itadingkon Ham sagala na mangindahi Ham, ale Jahowa.
11 (9-12) Dodingkon ma Jahowa, na marparatas i Sion, ambilankon ma pambahenan-Ni bani sagala bangsa;
12 (9-13) ai Ia do siluluhon daroh, anjaha seng lupa Ia bani dilo-dilo ni halak na madoyuk.
13 (9-14) Maidop ma uhur-Mu bangku, Ham Jahowa, kawahkon Ham ma hadoyukonku halani na mandomdomi ahu; Ham do na mandokdok ahu humbani horbangan ni hamatean,
14 (9-15) ase hubaritahon sagala puji-pujian Bamu bani horbangan ni boru Sion, anjaha marolob-olob ahu halani parpaluah-Mu.
15 (9-16) Tarrobung do sipajuh begu-begu bani godung na binahenni, anjaha sangkut naheini bani siding na tinaonni ponop.
16 (9-17) Ipatandahon Jahowa do diri-Ni, idalankon do uhum, marhitei pambahenan ni tangan-Ni tarsangkut parjahat. Higajon. Sela.
17 (9-18) Sai turun do hu nagori toruh halak parjahat, haganup sipajuh begu-begu na mangkalupahon Naibata.
18 (9-19) Seng anjai lalab hona lupahon halak na masombuh, anjaha seng lalab magou pangarapan ni halak na hona dorun.
19 (9-20) Jongjong ma Ham Jahowa, ase ulang sai mangenjeng jolma in, sai hona uhum ma sipajuh begu-begu i lobei-Mu.
20 (9-21) Pasogop Ham ma songgot-songgot bani sidea, Ham Jahowa, ase iahapkon sipajuh begu-begu jolma do sidea. Sela!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA