Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ende-enden si ikarang Etan kalak Esrahi.
2 O TUHAN rasa lalap ateku ngendeken keleng AteNdu si tetap. KesetianNdu kuberitaken, man kerina kesusuren.
3 Sabap keleng AteNdu tetap rasa lalap, KesetianNdu nteguh bagi langit.
4 Nindu, "Nggo Kubahan iketen padan ras kalak si Kupilih, nggo Aku ersumpah man Daud suruh-suruhenKu.
5 Kesusurenndu tetap rasa lalap jadi raja, kursi kinirajanndu Kukawali rasa lalap."
6 O TUHAN, PerbahanenNdu si mejin ipuji i Surga, PertetapNdu iendeken perpulungen si badia.
7 I awang-awang pe la lit si bali ras Kam o TUHAN, la lit mahluk Surga si seri ras TUHAN.
8 Kam ihamati perpulungen si badia, dingen kerina ia malang man BaNdu.
9 O TUHAN Dibata si Mada Kuasa, la lit si seri ganjangna ras Kam, i bas kai pe o TUHAN Kam megegeh dingen tetap.
10 IkuasaiNdu lawit si rugup-ugup, IpetenengNdu galumbang si merawa.
11 Rahap, naga lawit e ibunuh dingen IripukkenNdu, alu TanNdu si megegeh ItalukenNdu musuh-MusuhNdu.
12 Lawit ras doni Kam kap empuna, doni ras isina kerina kap TinepaNdu.
13 Kam kap njadiken Utara ras Selatan, Deleng Tabor ras Hermon ersurak kerna Kam.
14 Andiko belinna KuasaNdu! Andiko belinna GegehNdu.
15 Keadilen dingen kebujuren kap palas KinirajanNdu, keleng ate dingen kesetian teridah i bas kerina PerbahanenNdu.
16 O TUHAN, sangap kal bangsa si nembah man BaNdu alu rende, KiniulinNdu nalsali geluhna.
17 Erkiteken Kam, dem i bas ia keriahen, KiniulinNdu ipujina gedang-gedang wari.
18 Kam merekenca man kami kemenangen si mbelin, erkiteken KiniulinNdu nge maka kami menang.
19 Sabap Kam o TUHAN, nggo milih sekawal kami, Kam, o Dibata si badia Israel, nggo nangkuhken raja kami.
20 Nuria nari i bas sada pengenehenen, ngerana Kam man suruh-SuruhenNdu si patuh NiNdu, "Nggo Kusampati kalak si mbisa, nggo Kubereken mahkota man kalak si Kupilih i bas bangsa e nari.
21 Nggo Kujumpai Daud suruh-suruhenku, Kutangkuhken ia alu minak si badia.
22 Kuasangku si engkawali ia lalap, gegehKu si pegegehi ia.
23 La ngasup musuh ngimbangi ia, kalak jahat la ngasup naluken ia.
24 Aku si ngkernepken kerina imbang-imbangna, Kubunuh ise saja si ernembeh ate man bana.
25 Aku setia dingen tetap ngkelengi ia, jenari erkiteken gelarku Kubereken kemenangen man bana.
26 Aku si pebelangken kerajanna, daerahna menaken i Lawit Tengah nari seh ku Lau Eprat.
27 Nina kempak aku, 'Kam kap Bapangku dingen Dibatangku, Kam kap si kawal dingen si engkelini aku.'
28 Ia Kujadiken anakku sintua, i bas kerina raja-raja ia si muliana.
29 Keleng ateKu man bana Kucidahken rasa lalap, dingen perpadanKu man bana tetap rasa lalap.
30 Kerajanna tetap kidekah langit lit denga kesusurenna lalap jadi raja.
31 Tapi adi kesusurenna ngelanggar undang-undangKu, jenari la iikutkenna perentahKu,
32 janah adi mekarus ia nandangi pedahKu, dingen ipersilahangna peraturenKu,
33 kuukum me ia alu ciken ras mara erkiteken kesalahen si ibahanna e, jenari Kubereken man bana kiniseran erkiteken dosana.
34 Tapi Daud tetap Kukelengi, dingen perpadanenKu man bana tetap rasa lalap.
35 La Kupersilahang perpadanenKu man bana, janah sada pe i bas perpadanenKu e la Kuobah.
36 Sekali seh rasa lalap nggo Aku ersumpah i bas gelarKu si badia. Kutera pe la Aku nggit erguak man Daud.
37 Kidekah matawari ersinalsal denga kerajanna tetap rasa lalap, dingen kesusurenna jine si ngerajaisa.
38 Kujadiken kerajanna tetap desken bulan eme saksi si setia i datas awang-awang."
39 Tapi o TUHAN, genduari keke RawaNdu man raja, kalak si IpilihNdu ibuang dingen ItadingkenNdu.
40 IcedakenNdu PerpadanenNdu man suruh-SuruhenNdu, mahkotana IambekkenNdu ku bas kubang.
41 Tembok-tembok kotana IruntuhkenNdu, benteng-bentengna nggo IrontaskenNdu.
42 Kerina kalak si mentas arah e ngerampasisa, ia jadi uru-urun bangsa sekelewetna.
43 IberekenNdu kemenangen man musuhna, IberekenNdu keriahen man imbang-imbangna.
44 IbahanNdu la erguna senjata raja, IpelepasNdu ia talu erperang.
45 ItangtangiNdu kuasana selaku raja, IbenterkenNdu mahkotana ku taneh.
46 IbahanNdu maka pedas kal ia metua, IjurukenNdu ia.
47 TUHAN, seh ndigan Kam cebuni? Ngayak ndigan RawaNdu gurlah bagi api?
48 Ingetlah uga gendekna geluh enda, ula min Kam lupa maka kami TinepaNdu si ermasap-masap.
49 Ise kin tetap nggeluh la mate-mate? Ise kin banci pulah i bas kuburen nari?
50 O Tuhan, i ja KekelengenNdu si nai? Si nggo IpadankenNdu man Daud i bas KesetianNdu.
51 Inget min uga aku suruh-SuruhenNdu igombangi kalak dingen ngaloken penghinan i bas bangsa-bangsa si deban nari.
52 O TUHAN, raja si IpilihNdu ihina ImbangNdu, igombangina raja e ku japa pe ia lawes. <89:53> - Pujilah TUHAN rasa lalap seh rasa lalap. Amin! Amin!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA