Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sada doding. Psalm humbani ginompar ni si Korah. Bani pambobai koor. Inggouni: Almahalat. Doding podah humbani si Heman, halak Esrahi. (88-2) Ham Jahowa, Naibata ni hatuahonku, dilo-dilo do ahu arian, anjaha hu lobei-Mu do ahu roh borngin.
2 (88-3) Sai das ma tonggongku hu lobei-Mu, sai paeleng Ham ma pinggol-Mu bani doruh-doruhku.
3 (88-4) Domma sampur uhur hubani sitaronon, domma darngos goluhku bani nagori toruh.
4 (88-5) Doskon halak na manuruk tanoman mando ahu, songon paramangon na so margolle.
5 (88-6) Doskon na dob matei do ahu ihira, songon halak na dob tarbunuh ragei ibagas tanoman, ai ma halak na so nidingat-Mu be, na dob sirang humbani kuasa-Mu.
6 (88-7) Domma ipatibal Ham ahu hubagas godung sibagasan, hubagas hagolapan, hubagas luhung tene.
7 (88-8) Sai idondoni ringis-Mu do ahu, anjaha sagala gilumbang-Mu mangodohkon ahu. Sela.
8 (88-9) Domma ipaganggang Ham humbangku sagala huanku, domma ibahen Ham hagigi ahu bani sidea, tarhurung do ahu anjaha seng boi mandarat.
9 (88-10) Domma marholok matangku halani hadoyukon, Ham do Jahowa hupadilo-dilo ganup ari, hupaherbang do tanganku hu Bamu.
10 (88-11) Ai mambahen halongangan do Ham bani na dob matei? Ai puho do halinoh mamuji Ham? Sela.
11 (88-12) Ai ambilankononkon do idop ni uhur-Mu ibagas tanoman atap hasintongan-Mu i nagori toruh?
12 (88-13) Ai botohon ni halak ope halongangan-Mu bani ianan na golap, atap hapintoron-Mu bani ianan parlupaan?
13 (88-14) Tapi ahu, hu Bamu do ahu dilo-dilo, Ham Jahowa, anjaha sogod-sogod do tonggongku roh manjumpahkon Ham.
14 (88-15) Mase ma itulak Ham ahu, ale Jahowa, anjaha iponopkon Ham bohi-Mu humbangku?
15 (88-16) Madoyuk do ahu anjaha narus-narus matei humbani hadakdanakonku, manaron do ahu bani songgot-songgot-Mu, mandolei ahu ibahen.
16 (88-17) Ibontas milas ni ringis-Mu do ahu, bois do ahu ibahen panonggoti-Mu.
17 (88-18) Iinggoti sidea do ahu songon bah ganup ari, idorab ahu inggot.
18 (88-19) Ipaganggang Ham do humbangku huan pakon hasomanku, sagala halak na hutanda ibagas hagolapan do.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA