Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nyanyeyan. Jaburra kaom Korah. Kaangguy pamimpinna koor. Menorot nyanyeyan: Mahalat Leyanot. Nyanyeyan pangajaranna Heman, oreng Ezrahi. (88-2) Adhu GUSTE, Allah se masalamet abdidalem, e baja seyang abdidalem lok-ologan Junandalem, e baja malem abdidalem ngadhep ka Junandalem.
2 (88-3) Moga du’a abdidalem napa’a ka Junandalem, ngereng peyarsa’agi sowara abdidalem.
3 (88-4) Abdidalem manggi kasossa’an sabannya’na, maot ampon badha e adha’na labang.
4 (88-5) Abdidalem akadi oreng se torona ka lobangnga koburan, oreng se ta’ gadhuwan kakowadan.
5 (88-6) Abdidalem edinggal apolong sareng oreng mate, akadi oreng se epate’e oreng, agentang e dhalem makam. akadi oreng se ta’ ekaemodi pole sareng Junandalem, oreng se ta’ eparenge partolongan pole.
6 (88-7) Junandalem melpallagi abdidalem ka jurang se dhalem, ka lobangnga kobur se dhalem sareng petteng.
7 (88-8) Dadukanna Junandalem ce’ berra’na nyecce’e abdidalem, abdidalem ancor tacecce’ babendunnepon Junandalem.
8 (88-9) Junandalem majau abdidalem dhari sadajana kennalan, abdidalem epakadi ka’dhinto, kantos majitjit ka reng-oreng gapaneka. Abdidalem tabebbeng ta’ kengeng kalowar;
9 (88-10) mata abdidalem rabeng lantaran nyangsara. Sabban are abdidalem lok-ologan ka Junandalem, GUSTE, ngangka’ tanang adu’a ka Junandalem.
10 (88-11) Ponapa Junandalem mabadha kaajiban-kaajiban kaangguy oreng mate? Ponapa reng-oreng mate gapaneka jaga ngagungngagi Junandalem?
11 (88-12) Ponapa kataresna’annepon Junandalem eberta’agi e dhalem koburan, ban kaestowanna Junandalem e kennengnganna maot?
12 (88-13) Ponapa badha oreng se oneng ka kaajibannepon Junandalem e kennengngan se petteng, otabana kabecce’annepon Junandalem e kennengnganna oreng se ta’ ekaenga’e oreng?
13 (88-14) Namong abdidalem nyo’on partolongannepon Junandalem, GUSTE, sabban gi’ laggu abdidalem adu’a ka Junandalem.
14 (88-15) Adhu GUSTE, aponapa Junandalem me’ nolak abdidalem? Aponapa Junandalem me’ malengos ka abdidalem?
15 (88-16) Ngabidi gi’ kene’ abdidalem nyangsara sareng eencer maot, abdidalem ce’ payana se nanggung okomannepon Junandalem.
16 (88-17) Babendunnepon Junandalem se nako’e maancor abdidalem; serrangannepon Junandalem se ce’ berra’na mamate abdidalem.
17 (88-18) Dadukannepon Junandalem saare benteng ngeppong abdidalem akadi banjir, dhari kangan sareng kacer, dhari adha’ sareng budhi.
18 (88-19) Ca-kanca abdidalem se rapet sareng Junandalem epajau dhari abdidalem, namong kare papetteng se asarengnge abdidalem.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA