Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani pambobai koor. Inggouni: Silundat. Hasaksian humbani si Asap. Sada Psalm. (80-2) Ham Siparmahan Israel, tangar, tangar Ham ma; Ham, na mambobahon Josep songon biribiri, Ham na marhotak bani herubim, roh ma Ham marsinondang.
2 (80-3) i lobei ni Efraim, Benjamin pakon Manase! Puhoi Ham ma gogoh-Mu anjaha roh ma paluahkon hanami.
3 (80-4) Ham Naibata Zebaot, pasuang Ham ma hanami, sondangkon Ham ma bohi-Mu, ase maluah hanami.
4 (80-5) Ham Jahowa Naibata Zebaot, piga dokah nari manringis Ham dompak tonggo ni bangsa-Mu?
5 (80-6) Ipapangankon Ham do bani sidea ruti iluh, anjaha ipainumkon Ham do bani sidea iluh marlobih-lobih.
6 (80-7) Ibahen Ham do hanami gabe mula ni partinggilan bani simbalognami, anjaha sai iapasi munsuhnami do hanami.
7 (80-8) Ham Naibata Zebaot, pasuang Ham ma hanami, sondangkon Ham ma bohi-Mu, ase maluah hanami.
8 (80-9) Iorbat Ham do sada hayu anggur hun Masir, iusir Ham do bangsa-bangsa, laho manuankon ai hujai.
9 (80-10) Ham do pajorei tanoh in i lobei ni, jadi marurat ma ia anjaha igoki tanoh in.
10 (80-11) Rungkub do dolog ibahen halinohni, hayu ares ni Naibata ibahen ranting-rantingni.
11 (80-12) Iherbangkon do dangkahni das hu laut, anjaha tumborni das hu Bah Eprat.
12 (80-13) Mase ma iparseda Ham hondorni, gabe uhur-uhur ni pamontas mambuatisi?
13 (80-14) Iguyang aili na hun harangan do ia, anjaha igagati binatang na i talun.
14 (80-15) Ham Naibata Zebaot, marpangulaki ma uhur-Mu, manatap ma Ham hun nagori atas; pardiatei Ham ma hayu anggur-Mu on,
15 (80-16) anjaha pajongjong Ham ma in, na sinuan ni tangan-Mu siamun in.
16 (80-17) Domma itutung sidea in bani apuy, domma iroboh; sai magou ma sidea marhitei pangondam ni panonggor-Mu.
17 (80-18) Tangan-Mu ma na manramotkon halak parsiamun-Mu, anak ni jolma na pinabanggal-banggal-Mu.
18 (80-19) Seng anjai manginsurut hanami hun Bamu; pagoluh Ham ma hanami ase goran-Mu idilo hanami.
19 (80-20) Ham Jahowa Naibata Zebaot, pasuang Ham ma hanami, sondangkon Ham ma bohi-Mu, ase maluah hanami.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA