Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pammujina Asaf. Tamaka baji’na Allata’ala mae ri umma’Na, mae ri tau ci’nonga pa’mai’na.
2 Mingka ranggaselama’, la’birimmi tena tappakku,
3 saba’ angngiri mata’ mae ri tau tampoa, ri wattunna kucini’ kaupakkanna tau ja’dalaka.
4 Saba’ tena nasessa ke’nanga napakamma garring, tuli baji’na siagang kassa’na tubuna ke’nanga.
5 Tena susana ke’nanga, tena nitujui ri kasukkarrang sangkamma tau maraenga.
6 Lanri kammana minjo na’jari borromo ke’nanga, siagang tuli ero’ a’gau’ katerassang.
7 Tattumpai kaja’dallanga battu lalang ri atinna ke’nanga; sibuki ke’nanga a’rancana kaja’dallang.
8 Nacau-caui siagang napakka’-pakkanai taua, siagang akkana tampoi anggaratta’ lanajallakkang taua.
9 Napitinai ke’nanga Allata’ala ri suruga, nakkana borro mae ri sikamma taua ri lino,
10 sa’genna manna umma’Na Allata’ala ta’giling todong mae ri ke’nanga, na tappa’ mae ri bicaranna ke’nanga.
11 Nakana ke’nanga, "Tanaassengai Allata’ala, Kaminang Tinggia tena napahangi."
12 Kammaminjo lampa-lampana tau ja’dalaka; sannangi tallasa’na, tuli katambangi barang-baranna.
13 Sia-siaji kujagai katangkassanna atingku; tena matu-matunna kupakabella kalengku battu ri dosaya.
14 Saba’ sila’busu’ alloa’ natuju nakasa’; bari’-bari’basakka’ nisessa.
15 Ebara’ angkana akkana kamma’ anjo, kubaliammi ana’-ana’ ri bokoku.
16 Mingka kuusahaina untu’ ampahangi, teai sipato’ susana anjo mae ri nakke.
17 Kale’bakkanna antama’ ri Balla’Na Batara mae ri Allata’ala, nakupahammo antekamma kale’bakkanna sallang tau ja’dalaka.
18 Kiboliki ke’nanga ri agang laccuka, na Kibalang parekang ke’nanga tu’guru’ a’jari posso’.
19 Lalang sipakkida mataji bawang naancuru’mo ke’nanga, tamaka heba’na kapanrakang kale’bakkanna ke’nanga.
20 Sanrapang so’na lanynyaka ri wattu bari’basa’; ri wattu ambangunTa, o, Batara, lanynya’ memammi ke’nanga.
21 Ri wattu birisi’na kusa’ring, nasangkamma nito’do’ atingku,
22 dongoka’ natena kupahangi, sanrapanga’ olo’-olo’ ri dallekanTa.
23 Mingka tuli niaka’ ri ampitTa, Kita’galaki lima kanangku.
24 Kirenrenga’ siagang pappakainga’, siagang Kitarima’ lalang kala’birang sallang.
25 Inai kupatang ri suruga pantaranganna iKatte? Pantaranganna iKatte tena kukaeroki ri lino.
26 Manna pole na’jari lamma nyawaku siagang batangkalengku, iKatte kagassingangku, o, Allata’ala; iKattemi yangasenna kupatanga sa’genna satunggu-tungguna.
27 Lacilakai tau ambokoiaKi’ Kiballassi tau tenaya majarre’ mae ri Katte.
28 Mingka untu’ inakke tamaka baji’na ma’reppeseka mae ri Allata’ala, Karaeng Allata’ala kupa’jari tampa’ pa’la’langangku, sollanna akkulle kukabarrang sikontu panggaukanNa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA