Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 IKattemi pa’la’langangku, o, Batara, teaKi’ balang parekangia’ nipakasiri’.
2 Kilappassang laloa’, saba’ iKatte adelekKi’, Kipilangngeria’ siagang Kipasalamaka’.
3 A’jariKi’ untu’ inakke sanrapang moncong batu tampa’ pammantangangku, tuli akkullea kurapi’ kubattui. Saba’ le’ba’mi Kitappuki untu’ ampasalamaka’, iKattemi tampa’ pammantangangku siagang pa’la’langangku.
4 O, Allata’ala, Kilappassanga’ battu ri tau ja’dalaka, battu ri koasana tau pallaka siagang tau sekkeka.
5 Saba’ iKattemi panrannuangku, o, Batara, o, Batara tappaka’ mae ri Katte battu ri wattu rungkaku iji.
6 Lalang sikontu tallasakku tanjenga’ mae ri Katte; iKatte anjagaia’ battu ri nilassukangku nakutuli mammuji mae ri Katte.
7 A’jari contoi tallasakku mae ri tau jaia, saba’ iKattemi pa’la’langang majarrekku.
8 Tuli mammujia’ mae ri Katte, sila’busu’ alloi kukabarrang kalompoanTa.
9 TeaKi’ pelakkia’ ri wattu toakumo teaKi’ bokoia’ punna tenamo kagassingangku,
10 saba’ napa’jari carita’ musu-musungku, assikongkoloki tau eroka ambunoa’.
11 Nakana ke’nanga, "Nibokoimi ri Allata’ala; umba naniondangi siagang nijakkalaki, saba’ tenamo lampasalamaki."
12 TeaKi’ bellai battu ri nakke, o, Allata’ala, Allata’alaku, Kitulunga’ linta’.
13 Boli’mi kamma nipakasiri’ siagang nipa’lanynya’ tau ambakkaia’. Boli’mi kamma a’jari lingu siagang a’jari hina tau eroka ancilakaia’.
14 Mingka inakke tuli lamanrannuanga’ mae ri Katte, na pila’ jai tau mammuji mae ri Katte.
15 Sila’busu’ alloi lakucarita sikamma gau’ adeletTa, na kasalamakkang battua ri Katte nisawalaka nirekeng jaina.
16 Kupuji gau’ malompoTa, o Karaeng Allata’ala, kupa’la’bangi kaadelanTa, kaadelanTa bawang.
17 O, Allata’ala, Kiajarakka’ battu ri wattu rungkaku, sa’genna anne kamma kucaritai bate pare’ malompoTa.
18 O, Allata’ala, tea’ laloKi’ bokoia’, sa’gengku toa siagang kebo’ uukku, sollanna kukabarrang koasaTa siagang kaporeanTa mae ri sikontu turungang labattua.
19 O, Allata’ala, kaadelanTa sanrapangi langika tinggina; tamaka lompona sikamma panggaukanTa; inaimi akkulle ampasangkammaiKi?
20 Kipitujuia’ jai kapa’risang lompo, mingka iKatte lampoterangi kagassingangku siagang lampabangunga’ ammotere’ battu ri kuburuka.
21 LaKipa’jaria’ la’bi la’biri’, siagang Kisaleoria’ ammotere’.
22 Erokka’ mammuji mae ri Katte siagang gambusu’, saba’ tamamminrayaKi’, o, Allata’alaku. Erokka’ akkelong lagu pammuji mae ri Katte siagang kacapi, o, Allata’alana Israel matangkasaka.
23 Akkio’ marannua’ ma’reja-reja, na kumakkelong mammuji ri Katte. Nyawaku siagang tubuku makkelong rannu, saba’ le’ba’ma’ Kipasalama’.
24 Sila’busu’ alloi lakukabarrang kaadelanTa, saba’ sikamma tau eroka ancilakaia’ le’ba’mi nibeta siagang nipakasiri’.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA