Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kaangguy pamimpinna koor. Jaburra Daud. Nyanyeyan. (65-2) Ya Allah, ampon sapantessa abdidalem sadaja amolja’agi Junandalem e Siyon, sareng neptebbi janji abdidalem sadaja ka Junandalem.
2 (65-3) Sabab Junandalem se ngabbuli du’a; sadajana oreng ngadhep ka Junandalem lantaran dusa.
3 (65-4) Sa-dusa abdidalem talebat berra’ rassana, namong sareng Junandalem esapora.
4 (65-5) Pojur onggu oreng se epele Junandalem, se edikane epaenneng e kalenggiyannepon Junandalem. Abdidalem sadaja badhi epatobuga sareng sadajana se sae, e dalemmepon Junandalem, kalenggiyannepon Junandalem se socce.
5 (65-6) Junandalem nyaodi abdidalem sadaja kalaban marenge kamennangan, Junandalem mabadha sabarang se ajib kaangguy masalamet abdidalem sadaja. Junandalem se earep sadajana bangsa, kantos ka kennengngan se alengka tase’ raja e jauna.
6 (65-7) Junandalem majaga nong-gunong kalaban kakowadannepon Junandalem dibi’, kaangguy noduwagi kobasana Junandalem se parjuga.
7 (65-8) Junandalem maceddu garudhu’na tase’ raja sareng omba’ se raja, sareng masabbar sa-bangsa se padha baridhu.
8 (65-9) Sadaja pandhudhu’ bume tako’ sareng hormat nengale lalampa’annepon Junandalem se tadha’ bandhinganna. Saantero bume dhari konco’ se settong ka settongnga sareng Junandalem epasorak talebat gumbirana.
9 (65-10) Tana gapaneka sareng Junandalem epeyara sareng eparenge ojan, epalandhu kantos ce’ bannya’na hasella. Ngay-songay sareng Junandalem eesse’e kantos possa’ aengnga, reng-oreng esadhiyai gandum sadajana; kadi ka’dhinto caraepon Junandalem apareng hasel bume.
10 (65-11) Tana se elebadi salaga sareng Junandalem eaenge, tanana se apel-kempel ebaccae. Tanana epaardhung sareng ojan, bi’-selbi’na epajurno.
11 (65-12) Lantaran kasaeyannepon Junandalem, sabban taon Junandalem nyadhiya’agi hasel tamennan; kennengngan se erabuwi Junandalem hasella ce’ bannya’na.
12 (65-13) Ra-ara possa’ embi’ sareng dumbana, sadaja gumo’na anga-bunga.
13 (65-14) Lon-talon katotoban dumba, ra-cora possa’ sareng gandum. Sadaja padha asorak sareng anyanye ce’ peragga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA