Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pammujina golongang Korah. Kelong mangngamaseang. Untu’ pamimping pakelong. Situru’ lagu: Bunga bakung. (45-2) Kana-kana bajika assulu’ tojemmi battu ri atingku, kupangngadakkangi kelongku mae ri karaenga. Sanrapang pulpenna se’rea tucara’de’ annulisi’, sadiai lilaku appau kana-kana baji’.
2 (45-3) Ikaumi kaminang gammara’ ri alla’na sikontu rupataua, kana-kanannu rassi kabajikang, lanri kammana minjo naNabarakkakiko Allata’ala sa’genna satunggu-tungguna.
3 (45-4) Sele’mi pa’dannu ri aya’nu, he ikau karaeng barania, sanna’ malomponu siagang accayanu!
4 (45-5) Maju mako siagang gammara’ mange ri kalompoanga parjuangkangi katojenganga siagang kaadelang bajika; re’bu’mi pammetang lompoa siagang kagassingannu!
5 (45-6) Ana’ pana cidu’nu natarrusuki atenna musunta, tu’guruki bansa-bansaya ri dallekanna bangkennu.
6 (45-7) Nasareko koasa Allata’ala untu’ ammarenta, attahangi koasanu satunggu-tungguna; ammarentako’ siagang adele’ mae ri ra’ya’nu.
7 (45-8) Nungai katojenganga siagang nukabirisi kaja’dallanga; lanri kammana, Allata’ala, Allata’alata Napile mako, siagang Napakate’ne mako la’biangang na karaeng maraenga.
8 (45-9) Pakeannu mabau’ a’rasa muru’, gaharu siagang cendana; nipakarannuko ri pakarena musika ri balla’ lompo gadinga.
9 (45-10) Ri alla’na dayang-dayang balla’ lompoa nia’ ana’-ana’ tulolonna karaeng. Ri sa’ri kanang empoang kala’biranga ammentengi bainenna karaeng ammake belo-belo bulaeng ti’no’.
10 (45-11) He, Tulolo, pilangngeri kana-kanangku, kaluppaimi bansanu siagang bija pammanakannu.
11 (45-12) Kaga’gannu angkontaki karaenga, ia karaennu, tundu’ mako mae ri ia.
12 (45-13) Pandudu’na Tirus angngerangi passare mae ri kau; tu kalumanynyanga ero’mi naboya pa’mai’nu.
13 (45-14) Antama’mi baine karaeng sanna’ accayana, ro’na nisulang bulaeng.
14 (45-15) Nirurungang ri tujai mange ri karaeng, sangka’ rupa cura’na pakeanna, nirurungang ri sikamma tulolo, bela-belana, ke’nanga pole untu’ karaeng.
15 (45-16) Akkio’ rannumi ke’nanga ma’reja-reja ri wattu niantara’na antama’ ri balla’ lompona karaenga!
16 (45-17) Ikau, karaengku, langgappako jai ana’ bura’ne untu’ angngempoi empoang kala’biranna boe-boeta. Nupa’jari ke’nanga tau koasa mae ri sikontu linoa.
17 (45-18) Iaminne lagua kupake kupa’la’bang namasahoro’ arennu sa’genna sikamma turungannu bansa-bansaya lanapujiko satunggu-tungguna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA