Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ende-enden anak Korah; ende-enden keleng ate.
2 Pusuhku dem alu kata-kata si mejile, tupung kubahan ende-enden enda guna raja. Desken pena pujangga si pentar, bage me dilahku ngendeken ende-enden.
3 I bas kerina dilaki rupandu kap si mejilena, rananndu e kiniulin, erkiteken si e Dibata tetap mereken pasu-pasu man bandu.
4 Genditken pedang i bas awakndu, o raja si mbisa, kam si terpuji dingen mulia!
5 Berkatken alu kemulian nuju kemenangen, majekken kebenaren ras keadilen. Gegehndu mereken bandu kemenangen si mbelin.
6 Panahndu si entelap nustus pusuh musuh, bangsa-bangsa gulingen ku teruh tapak-tapak nahendu.
7 Iperentahndu rayatndu alu keadilen, KinirajanNdu o, Dibata tetap kap rasa lalap.
8 Ngena atendu si benar dingen nembeh atendu si jahat, erkiteken si e ipilih Dibata kam, IberekenNa man bandu sampur kemalemen ate lebihen asang raja-raja si debanna.
9 Pakenndu merim bauna, bau mur, gaharu ras cendana. Istanandu ihiasi gading si meherga, i je iendeken ende-enden si erbahan meriah ukur raja.
10 Dayang-dayang istana, lit deba putri raja-raja. Arah kemuhen kursi kinirajan tedis kemberahen, make perhiasen emas murni.
11 O putri raja-raja, begiken si kukataken, lupakenlah bangsa dingen keluargandu.
12 Kinijilenndu erbahanca leket pagi ukur raja man bandu, ia tuanndu, patuhlah man bana.
13 Kalak Tirus maba persembahen man bandu; iusahaken kalak bayak muat ukurndu.
14 Putri raja si mbaru lit i bas istana, uisna isulam benang emas.
15 Alu paken si erbage-bage rupana, iarakken ia ku adepen raja, iikutken dayang-dayangna, ia pe ikut ngadap man raja.
16 Andiko riahna ukurna, tupung ia bengket ku bas istana raja!
17 Kam o rajangku, nterem nge pagi pupusndu dilaki, guna nggantiken nini-ninindu jadi raja. Kam pagi nangkuhken ia kerina, jadi raja, guna merentah kerina doni enda. <45:18> - Ende-endenku enda erbahanca Kam terberita rasa lalap, Kam tetap ipuji bangsa-bangsa i bas paksa si reh enda pe.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA