Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani pambobai koor. Doding podah humbani ginompar ni si Korah. (44-2) Ham Naibata, domma ibogei pinggolnami sandiri ibaritahon ompungnami bennami, pasal pambahenan na binahen-Mu bani goluh ni sidea, bani panorang na basaia.
2 (44-3) Marhitei tangan-Mu iusir Ham do bangsa sipajuh begu-begu, tapi isuankon Ham do ia sidea; iboiskon Ham do bangsa-bangsa, tapi ipararat Ham do ia sidea.
3 (44-4) Ai sedo marhitei podang ni sidea dapot sidea tanoh in, sedo botohonni mambahen monang sidea; tapi tangan siamun-Mu pakon botohon-Mu ampa haliharon ni bohi-Mu do tene, ai iharosuhkon Ham do sidea.
4 (44-5) Ham do Rajangku, ampa Naibatangku, na manongos haluahon bani Jakob.
5 (44-6) Marhitei Ham ijuar hanami munsuhnami, marhitei goran-Mu ilotloti hanami do imbangnami.
6 (44-7) Ai sedo bani siorhu ahu marpangajaman, anjaha sedo podangku pamonang ahu.
7 (44-8) Ham do paluah hanami humbani sagala imbangnami, Ham do mambahen tarbador na mandomdomi hanami.
8 (44-9) Ibagas Naibata do marmogah-mogah hanami ari-ari, anjaha pujionnami do goran-Mu sadokah ni dokahni. Sela.
9 (44-10) Hape sonari itulak Ham do hanami, anjaha ipaturut Ham hanami bador; seng bingkat Ham mangkasomani balanami.
10 (44-11) Ibahen Ham do hanami manginsurut humbani munsuhnami, gabe irampas na mandomdomi hanami do hanami.
11 (44-12) Iondoskon Ham do hanami songon biribiri sisayaton, ierap Ham do hanami i tongah-tongah ni bangsa sipajuh begu-begu.
12 (44-13) Ijual Ham do bangsa-Mu seng pala marboli, anjaha seng maruntung Ham humbani harga ni sidea.
13 (44-14) Ibahen Ham do hanami sipahiri-hirion ni simbalognami, parbileian pakon siapason ni halak na marianan inggot hanami.
14 (44-15) Ibahen Ham do hanami gabe umpama i tongah-tongah ni sipajuh begu-begu, siupirhonon ni ulu i tongah-tongah ni bangsa-bangsa.
15 (44-16) Jongjong do i lobeihu habadoronku ari-ari, anjaha hailaon do manrungkub bohingku,
16 (44-17) halani sora ni na mangapasi pakon na manrisai, halani pangkawah ni munsuh pakon na mandomdomi ahu.
17 (44-18) Ganupan ai domma mangonai bennami, tapi seng lupa hanami Bamu, anjaha seng mangeluk hanami humbani padan-Mu.
18 (44-19) Seng marbalik uhurnami, anjaha seng manlembang langkahnami humbani dalan-Mu;
19 (44-20) age sonai iropuki Ham do hanami bani ianan ni sorigala, anjaha irungkubkon Ham do hagolapan bennami.
20 (44-21) Porini ihalupahon hanami goran ni Naibata, anjaha ipaherbang hanami tangannami bani Naibata silegan,
21 (44-22) mintor lang ma pareksaon ni Naibata ai? ai Ia do na mananda rusia ni uhur.
22 (44-23) Tongon, halani Ham do ibunuhi hanami manipat ari, doskon biribiri sisayaton do hanami ihira sidea.
23 (44-24) Puho ma Ham, mase sai modom Ham Tuhan? Puho ma Ham anjaha ulang ma tulak Ham hanami sadokah ni dokahni.
24 (44-25) Mase ma iponopkon Ham bohi-Mu, lupa Ham bani hasombuhon ampa hasosakannami?
25 (44-26) Ai unduk do tonduynami das bani orbuk, longkot bani tanoh do boltoknami.
26 (44-27) Marugas ma Ham mangurupi hanami, anjaha paluah Ham ma hanami halani idop ni uhur-Mu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA