Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 He, sikamma tu bajika, akkio’ rannu mako lanri apa le’baka Nagaukang Batara; siratangi mammuji-muji tu lambusu’ pa’maika.
2 Appala’ sukkurukko mae ri Batara siagang kacapi, akkelongko mae ri Ia nirurungang ri sa’ra musi’.
3 Akkelongko lagu beru mae ri Batara, ko’bi’ bajiki kacapinnu siagang akkio’ rannu mako!
4 Sikontu kananNa Batara akkullei nipatappa’; tamamminrayai lalang sikontu panggaukanNa.
5 Nangai kalambusanga siagang kaadelanga; sikontu linoa rassi siagang pangngamaseanNa.
6 Assarei parenta Batara, na’jarimo langika; mataallo, bulang, na bintoeng nipa’jari ri kananNa.
7 Sikontu je’ne’ tamparanga Napasse’rei ri se’reang tampa’, tamparang lompoa Natahangi lalang se’re pannahangngang je’ne’.
8 Boli’mi kamma namalla’ sikontu linoa mae ri Batara na mappakala’biri’ mae ri Ia pandudu’na linoa.
9 Saba’ akkanaji bawang, na’jarimo yangasenna; ammarentaji bawang, nania’mo yangasenna.
10 Napassalasai Batara rancanana bansa-bansaya, Napattaenai apa nakaerokia ke’nanga.
11 Mingka rancanaNa Batara tuli attahanna, majarreki apa le’baka Narancang sila’busu’na jammanga.
12 Mate’nei bansa mangakua ri Batara salaku Allata’alana, mate’nei umma’ Napilea a’jari umma’ Napatanga!
13 Battu ri suruga accini’ naung Batara, na Nacini’ sikontu umma’ rupataua.
14 Battu ri empoang kala’biranNa Najannangngi Batara sikontu apa ammantanga ri lino.
15 Iami ampareki atinna ke’nanga, na Naasseng sikontu panggaukanna ke’nanga.
16 Teai lanri jaina tantarana nammeta karaenga, tena nasalama’ surudadua lanri kagassinganna.
17 Takkulleai jaranga nipattoang untu’ ammeta, takkulleai appasalama’ kagassingang lompona.
18 Najagai Batara tu mappilangngeria ia manrannuanga ri pangngamaseanNa.
19 Napasalamaki ke’nanga battu ri kamateanga, na Natallassi ke’nanga ri wattu kacipuranga.
20 Umba kimanrannuang mae ri Batara, Iami pannulunta siagang mappatojenta.
21 Ma’rannu-rannuki’ lanri Ia na kitappa’ ri areng matangkasa’Na.
22 Poro tuli Kikamaseang laloi ikambe, o, Batara, lanri manrannuangi ikambe mae ri Katte.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA