Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pammujina Daud. Ri Katte, o, Batara, kupanai’ pappala’ doangku,

² o, Allata’alaku, matappaka’ ri Katte! TeaKi’ lappassangia’ nipakasiri’, na nigorai ri musu-musungku.

³ Tu ta’baleka ri Katte lanipakasiriki, mingka tu tappaka ri Katte tena nalanipassalasa.

⁴ Kipicinikianga’ erotTa, o, Batara, Kipa’nyatai apa musti lakugaukang.

⁵ Ajaraka’ siagang renrenga’ untu’ attallasa’ situru’ erotTa, saba’ iKattemi Allata’ala ampasalamaka’, tuli manrannuanga’ mae ri Katte.

⁶ Kiu’rangi kabajikanTa siagang pangngamaseanTa, o, Batara, le’baka Kipappicinikang battu riolo.

⁷ Pammopporangi dosaku siagang kasalangku ri wattu rungkaku, u’rangia’ situru’ pangngamaseanTa siagang kabajikanTa.

⁸ Saba’ Batara bajiki na adele’, Napicinikiangi oloang tau lingua.

⁹ Narenrengi Batara tu tuna pa’maika, na Naajara’ ke’nanga apa Nakaerokia.

¹⁰ Tau mannurukia ri parjanjianNa siagang hukkunNa, Nagau’ kamasei siagang tamamminrayai.

¹¹ O, Batara, Kipammopporanga’ situru’ janjinTa, saba’ lompoi kasalangku.

¹² Kipangngajarrangi mae ri tumappilangngeria oloang musti naoloa ke’nanga.

¹³ Tuli lasukkuki ke’nanga lalang tallasa’na, lanawarisiki ana’ cucunna ke’nanga tana pisakaya,

¹⁴ Batara belana tu mappilangngeria, Napappiassengangi ri ke’nanga apa Nakaerokia.

¹⁵ Matangku tuli tattujui mange ri Batara, saba’ Napasalamakka’ battu ri bahayaya.

¹⁶ Cinikia’, siagang kamaseanga’, saba’ Napasalamakka’ battu ri bahayaya.

¹⁷ Pila’ katambangi susana pa’maikku Kilappassang laloa’ battu ri kasukkarrangku.

¹⁸ Kiparhatikangi sessaku siagang kasukkarrangku, siagang Kipammopporangi sikontu dosaku.

¹⁹ Kiciniki antekamma jaina musungku; ke’nanga sanna’ nakabirissingku.

²⁰ Jagaia’ siagang Kipasalamaka’, sollanna tena kunggappa siri’ saba’ ma’la’langa’ mae ri Katte.

²¹ Poro nirurungang laloa’ ri kabajikang siagang kalambusang, saba’ manrannuanga’ mae ri Katte.

²² O, Allata’ala, Kilappassangi ummatTa battu ri sikontu kasukkarranna.