Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O TUHAN, inget min kempak Daud, dingen kerina kiniseranna.
2 Ingetlah o TUHAN kai si ipadankenna, sumpah si ibelaskenna man BaNdu, o Dibata si Mbisa nu Jakup,
3 nina, "La aku mulih ku rumah, ntah medem i bas ingan medemku,
4 la kupediat matangku tertunduh, la kupediat seliben matangku terpit-pit,
5 ope denga kusikapken sada Rumah man TUHAN, sada ingan man Dibata si Mbisa nu Jakup."
6 O Betlehem si ndengkehken kerna Peti Perpadanen, jenari jumpai i mbalmbal Jearim.
7 Emaka ninta, "Ota kita ku Rumah TUHAN, nembah i adep-adepen kursi KinirajanNa."
8 Rehlah Kam ku InganNdu tading o TUHAN, radu ras Peti Perpadanen tanda KuasaNdu.
9 Ersurak-suraklah BangsaNdu, kerina imam-ImamNdu lalaplah erbahan si ngena AteNdu.
10 Nggo Kam erbahan perpadanen ras suruh-SuruhenNdu Daud, ula tulak raja PilihenNdu o TUHAN.
11 Alu sumpah erpadan Kam ras Daud, sumpah si lanai banci iobah, "Sekalak i bas anakndu si dilaki Kujadiken raja, janah ia pagi si kundul i bas kursi kinirajanndu.
12 Adi kerina anakndu encikep perpadanKu, dingen ngikutken perentah-perentah si Kuajarken, emaka kesusurenna pe rasa lalap nggancihi kam jadi raja."
13 TUHAN nggo milih Sion, IbahanNa AteNa e man InganNa.
14 Nina, "I jenda me Aku tading rasa lalap, i jenda nari Aku jadi raja.
15 Kai si iperluken Sion, Kubereken alu simpar, kalak si musilna Kubesuri alu pangan.
16 Imam-imam Kupasu-pasu i bas kerina pendahinna, dingen rayatna rende janah ersurak-surak meriah.
17 I jenda Kujadiken sekalak raja mbelin i bas kesusuren Daud nari, Aku erbahanca maka kinirajan raja pilihenKu tetap nteguh.
18 Kerajanna paguh, dingen ermulia tapi imbang-imbangna mela akapna Kubahan."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA