Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Malem kal ate kalak si geluhna la erpandangen, si ngikutken undang-undang TUHAN.

² Malem kal ate kalak si ngikutken perentah-PerentahNa, si ndarami Ia alu bulat ukur.

³ Malem kal ate kalak si erdalan i bas dalan TUHAN, si la pernah erbahan kesalahen.

⁴ O TUHAN, nggo IberekenNdu undang-UndangNdu man kami, gelah ipatuhi kami alu tutus.

⁵ Ateku min maka tutus kal, i bas ndalanken peraturen-PeraturenNdu.

⁶ Adi kerina PerentahNdu kuperdiateken, emaka la aku ijuruken.

⁷ Tep-tep kali kupelajari KeputusenNdu alu tutus, kupuji Kam alu ukurku si bersih.

⁸ Kupatuhi ateku undang-UndangNdu, ula kal aku ItadingkenNdu.

⁹ Kuga banci anak perana njagai geluhna maka la erpandangen? Eme alu ngikutken KataNdu.

¹⁰ Alu bulat ukurku kucubaken ndarami Kam, ula pediat aku nilah i bas KataNdu nari.

¹¹ Undang-UndangNdu kubuniken i bas ukurku, gelah ula aku erdosa man BaNdu.

¹² Kupuji Kam, o TUHAN, ajari aku peraturen-PeraturenNdu.

¹³ Usur ateku melaskenca kerina undang-undang si nggo IberekenNdu.

¹⁴ I bas ndalanken perentah-PerentahNdu meriah kuakap, riahen asangken ndatken erta-erta si melala.

¹⁵ Kerina KeputusenNdu ku kusur-kusur i bas pusuhku, kupergermetken pelajaren si IberekenNdu.

¹⁶ Meriah ateku i bas ndalanken undang-UndangNdu, KataNdu la kulupaken.

¹⁷ Mekuahlah AteNdu man bangku suruh-SuruhenNdu, maka alu bage banci aku nggeluh ngikutken AjarNdu.

¹⁸ Pemedak min matangku maka aku banci erpengidah, nandangi kebenaren undang-UndangNdu si rejin.

¹⁹ Geluhku i bas doni enda kentisik ngenca, ula buniken undang-UndangNdu man bangku.

²⁰ Getem pusuhku perban tedeh kal ateku, katawari pe kueteh min ateku PeraturenNdu.

²¹ Kalak si meganjang rukur IpandangNdu, kalak si nilah i bas PerentahNdu nari IsumpahiNdu.

²² Pulahi aku i bas kalak percian ras si nghina nari, sabap kucikep kap KataNdu.

²³ Si erkuasa pulung jenari erpekat ngelawan aku, tapi PengajarenNdu kupekusur-kusur i bas pusuhku.

²⁴ KataNdu kap si ngajari aku, simereken keriahen i bas pusuhku.

²⁵ Aku terdang i bas abu taneh, pegeluh min aku sue ras PadanNdu.

²⁶ Kuakuken kerina perbahanenku, jenari IaloiNdu aku, ajari min aku ndalani DalanNdu.

²⁷ Sampati min aku ngantusi undang-UndangNdu, gelah kupekusur-kusur i bas ukurku PerbahanenNdu si mejin.

²⁸ Pusuhku dem alu ceda ate, bere min bangku gegeh sue ras PadanNdu.

²⁹ Pedauh min aku i bas dalan kepapaken nari, erkiteken KiniulinNdu ajari min aku undang-UndangNdu.

³⁰ Nggo kuputusken maka aku tetap patuh man BaNdu, kuperdiateken me AturenNdu.

³¹ O TUHAN, nggo kuikutken aturen-AturenNdu, ula pelepas maka mela kuakap.

³² Alu ukur ersurak kuayaki perentah-PerentahNdu, sabap Kam simerekenca maka lit pengertinku.

³³ O TUHAN, ajarken bangku pengertin undang-UndangNdu, gelah kuikutken seh kedungenna.

³⁴ Terangken bangku undang-UndangNdu, maka kuikutken, kudalanken alu bulat ukurku.

³⁵ Bahan maka kuerti dingen kupatuhi undang-UndangNdu, sabap i bas matuhisa dat aku kemalemen ate.

³⁶ Bereken bangku kerincuhen ngikutken undang-UndangNdu, lebihen asangken kerincuhen jadi kalak bayak.

³⁷ Jagai min aku maka ula kuayaki si sea-sea, pegeluh min aku sue ras PadanNdu.

³⁸ Cikeplah enteguh PadanNdu man bangku suruh-SuruhenNdu, padan si IbahanNdu man kalak si erkemalangen man BaNdu.

³⁹ Pedauh min i bas aku nari penaling-nalingen si kubiari, andiko jilena keputusen-KeputusenNdu.

⁴⁰ Metedeh ateku aturen-AturenNdu, bereken bangku kegeluhen si mbaru, erkiteken KebenarenNdu.

⁴¹ O TUHAN, cidahken man bangku uga belinna keleng AteNdu, jenari kelini aku rikutken PadanNdu.

⁴² Maka banci kujabap kalak si encekuraki aku, erkiteken tek aku man KataNdu.

⁴³ Sampati maka lalap banci aku erkata tuhu kerna kebenaren, sabap aku erpengarapen nandangi KeputusenNdu.

⁴⁴ Ateku lalap ngikutken undang-UndangNdu, rasa lalap seh rasa lalap.

⁴⁵ Nggeluh me aku i bas kebebasen, erkiteken kudarami AjarNdu.

⁴⁶ Kumomoken ateku peraturen-PeraturenNdu man raja-raja, dingen la aku ermela-mela.

⁴⁷ I bas ngikutken PerentahNdu, jumpa aku kemalemen ate, keleng pe ateku PedahNdu e.

⁴⁸ Kuhamati dingen kukelengi PerentahNdu, aturen-AturenNdu kuukuri.

⁴⁹ Inget min PadanNdu kempak aku suruh-SuruhenNdu, padan si mereken pengarapen man bangku.

⁵⁰ Tupung i bas kiniseran pe terapul aku, erkiteken PadanNdu mereken kegeluhen man bangku.

⁵¹ Kalak si meganjang rukur, megombang man bangku, tapi la aku nilah i bas undang-UndangNdu nari.

⁵² O TUHAN, kuinget undang-UndangNdu si lit nuria-nuria nari, emaka terapul me aku.

⁵³ Adi kuidah kalak jahat ngelanggar undang-UndangNdu, gara kal ateku.

⁵⁴ Kidekah geluhku si gendek i babo doni enda, undang-UndangNdu kujadiken ende-enden pujin.

⁵⁵ Tupung mbages berngi, kuinget Kam, TUHAN, janah undang-UndangNdu tetap kuukuri.

⁵⁶ Malem kal ateku, i bas ngikutken undang-UndangNdu.

⁵⁷ O TUHAN, Kam saja ngenca ateku, erpadan aku maka tetap kuikutken undang-UndangNdu.

⁵⁸ Alu mesek-sek, mindo aku man BaNdu, cidahken bangku perkuah AteNdu sue ras si nggo IpadankenNdu.

⁵⁹ Nggo kuukuri lagu langkahku, dingen erpadan aku matuhi aturen-AturenNdu.

⁶⁰ Alu lanai alang-alangen, minter kuikutken perentah-PerentahNdu.

⁶¹ Itogeng kalak jahat siding man bangku, tapi la aku lupa nandangi undang-UndangNdu.

⁶² I bas paksa tengah berngi e, keke aku, kupuji Kam sabap bujur kal PemutusenNdu.

⁶³ Kerina kalak si nembah man BaNdu, eme temanku, kerina si ngikutken undang-UndangNdu.

⁶⁴ O TUHAN, doni enda dem alu keleng AteNdu si tetap, emaka ajarilah aku undang-UndangNdu.

⁶⁵ O TUHAN, nggo ItepatiNdu PadanNdu, dingen melias Kam man bangku suruh-SuruhenNdu.

⁶⁶ Bereken man bangku kepentaren dingen pemeteh, erkiteken ernalem aku man perentah-PerentahNdu.

⁶⁷ Ope denga aku iukum Kam, semal aku erbahan salah, tapi genduari kuikutken KataNdu.

⁶⁸ Andiko melias kal Kam, mehuli kal Kam! Ajarken man bangku aturen-AturenNdu.

⁶⁹ Kalak megombang nggo erkata guak kerna aku, tapi alu bulat ukurku tetap kuikutken aturen-AturenNdu.

⁷⁰ Kalak si bage la iantusina undang-UndangNdu, tapi man bangku, eme si mereken kemalemen ate.

⁷¹ UkumenNdu man bangku payo kap, gelah banci kupelajari aturen-AturenNdu.

⁷² Man bangku ergan undang-UndangNdu, asangken kerina erta-erta i doni enda.

⁷³ Kam kap si nepa ras si ngkawali aku, bereken man man bangku pengertin, maka banci kupelajari undang-UndangNdu.

⁷⁴ Kalak si nembah man BaNdu, senang ukurna jumpa ras aku, sabap ernalem aku man PadanNdu.

⁷⁵ Kueteh, o TUHAN, maka adil kap KeputusenNdu, erkiteken KesetianNdu maka aku IukumNdu.

⁷⁶ Petetap min ukurku alu keleng AteNdu si tetap, sue ras IpadankenNdu man bangku, suruh-SuruhenNdu.

⁷⁷ Mekuah min AteNdu, gelah aku nggeluh, sabap malem ateku i bas undang-UndangNdu.

⁷⁸ Mela min iakap kalak si megombang, erkiteken guak pengadunna kerna aku, tapi aku, tetap kuukuri PengajarenNdu.

⁷⁹ Rehlah min ndahi aku, kalak si nembah man BaNdu, maka itandaina aturen-AturenNdu.

⁸⁰ Sertalah pendalankenku perentah-PerentahNdu, maka ula pagi kuakap mela.

⁸¹ Mejehe aku nimai keselamaten i bas kami nari, o TUHAN, aku ernalem man KataNdu.

⁸² Nggo latih matangku nima-nimai kai si IpadankenNdu, nungkun Ukurku "Ndigan kin ndia aku IsampatiNdu?"

⁸³ Aku kesip desken gajut kulit si lanai ipake, amin bage pe la aku lupa man PerentahNdu.

⁸⁴ Asa kai nari aku dekahna nimai? Ndigan IukumNdu kalak si nindih aku?

⁸⁵ Kalak megombang, si la ngikutken undang-UndangNdu, nggo ikalina lubang nidingi aku.

⁸⁶ PeraturenNdu terteki kap, emaka sampati min aku, alu la ersebap kalak perguak ngelis-ngelis aku.

⁸⁷ Narus aku mate ibunuhna, tapi la kupersilahang aturen-AturenNdu.

⁸⁸ Erkiteken keleng AteNdu si tetap, pegeluh aku, gelah banci aku patuh ngikutken undang-UndangNdu.

⁸⁹ O TUHAN KataNdu tetap rasa lalap, rasa lalap seh rasa lalap i Surga.

⁹⁰ PertetapNdu enteguh rasa lalap, IpajekkenNdu doni, tahan rasa lalap.

⁹¹ Sinasa lit seh paksa enda, lit erkiteken PerentahNdu, sabap kerina e suruh-SuruhenNdu kap.

⁹² Undang-UndangNdu kap ulu kemalemen ateku, adi lang, nggo me aku mate perban kiniseranku.

⁹³ Asa ndigan pe la kupersilahang PerentahNdu, sabap arah PerentahNdu eme aku IpegeluhNdu.

⁹⁴ SikerajangenNdu kap aku, kelini min aku, nggo kuikutken ndalanken PerentahNdu.

⁹⁵ Kalak jahat nggempangi aku, lako munuh aku, tapi kupekusur-kusur ateku i bas ukurku kerna undang-UndangNdu.

⁹⁶ Nggo kueteh maka kai pe lit nge jangkana, tapi perentah-PerentahNdu serta kap.

⁹⁷ Lanai tanggung keleng ateku man undang-UndangNdu, kukusur-kusur i bas ukurku gedang-gedang nu wari.

⁹⁸ Kerina PerentahNdu tetap kuinget katawari pe, emaka pentaren aku asangken imbang-imbangku.

⁹⁹ Pengertinku ngelebihi pengertin guru si ngajari aku, erkiteken kupekusur-kusur PerentahNdu i bas ukurku.

¹⁰⁰ Belinen kepentarenku asangken orang-orang tua, erkiteken kuikutken kerina PerentahNdu.

¹⁰¹ Kerina perbahanen si jahat kusilahken, sabap kuikutken ateku KataNdu.

¹⁰² AturenNdu la kupersilahang, erkiteken Kam jine gurungku.

¹⁰³ Andiko, entebu kal AturenNdu, tebun asangken tengguli.

¹⁰⁴ Dat aku kepentaren i bas undang-UndangNdu nari, emaka ciga kal ateku kata la tuhu.

¹⁰⁵ KataNdu kap tendang man nahengku, nerangi dalan si kudalani.

¹⁰⁶ Padan si nggo kusumpahken, kusehken me, AturenNdu si bujur kupatuhi.

¹⁰⁷ Mekelek kal kiniseranku, jagai min geluhku sue ras si nggo IpadankenNdu.

¹⁰⁸ O TUHAN, aloken pertoton pengataken bujurku, jenari ajarken man bangku AturenNdu.

¹⁰⁹ Geluhku tetap i bas kebiaren, tapi la pernah kulupaken undang-UndangNdu.

¹¹⁰ Itogeng kalak jahat siding nangkap aku, tapi la aku nilah i bas PerentahNdu nari.

¹¹¹ Perentah-PerentahNdu tetap jadi sikerajangenku rasa lalap, eme kap si pesenangken ukurku.

¹¹² Nggo tetap ateku lalap ngikutken undang-UndangNdu, seh kutampuk umur geluhku.

¹¹³ Nembeh ateku man kalak si la bulat ukurna ngikutken Kam, tapi undang-UndangNdu keleng kal ateku.

¹¹⁴ Kam kap pengawalku dingen pembelangku, kutamaken pengarapenku ku bas PadanNdu.

¹¹⁵ O kalak jahat, laweslah i bas aku nari! Kupatuhi me perentah-perentah Dibatangku.

¹¹⁶ Bere gegeh man bangku sue ras PadanNdu, gelah banci aku nggeluh. Ula min cengkal pengarapenku man BaNdu.

¹¹⁷ Cikep min maka terkelin aku, jenari lalap kuperdiateken PerentahNdu.

¹¹⁸ ItulakNdu kerina kalak si nilahken undang-UndangNdu, sura-surana si dem alu tipu, sia-sia me kerina.

¹¹⁹ Kerina kalak jahat IpedirepNdu ras sampah, emaka keleng kal ateku PeraturenNdu kerina.

¹²⁰ Nggirgir aku perbahan mbiar man BaNdu, gentar aku erkiteken KeputusenNdu.

¹²¹ Nggo kulakoken kai si mehuli dingen si payo, ula aku iendesken man imbang-imbangku.

¹²² Erpadanlah maka Kam si nampati aku suruh-SuruhenNdu, ula pelepas kalak megombang nindihi aku.

¹²³ Meser matangku nimai PenampatNdu, nimai pembebasen si nggo IpadankenNdu.

¹²⁴ Bahan min bangku rikut keleng AteNdu si tetap, dingen ajarken min man bangku peraturen-PeraturenNdu.

¹²⁵ Suruh-SuruhenNdu kap aku, bereken min bangku pengertin, gelah banci kuantusi PengajarenNdu.

¹²⁶ O TUHAN, nggo seh paksana Kam bertindak, erkiteken nterem kal kalak la matuhi undang-UndangNdu.

¹²⁷ Keleng ateku man PeraturenNdu, lebihen asangken engkelengi emas murni.

¹²⁸ Eme sabapna kuikutken kerina PerentahNdu; dingen dalan si lepak nembeh ateku.

¹²⁹ Erdolat kap PengajarenNdu, emaka kupatuhi alu bulat ukurku.

¹³⁰ Adi ituriken AjarenNdu, mereken terang kap, mereken pengertin man kalak si langa erpemeteh.

¹³¹ Kesah-kesah aku, i bas kerincuhen man PeraturenNdu.

¹³² Tulihken dingen mekuah min AteNdu aku, bali ras PengkelengiNdu kerina kalak si ngkelengi Kam.

¹³³ Jaga maka ula aku guling, sue ras si nggo IpadankenNdu, ula pediat aku italuken si jahat.

¹³⁴ Tangtangi aku i bas kalak si nindihi aku, maka banci kuikutken PeraturenNdu.

¹³⁵ Pasu-pasu min aku alu siang AyoNdu, jenari ajarken man bangku undang-UndangNdu.

¹³⁶ Mambur iluhku desken lau belin, erkiteken undang-UndangNdu la ipatuhi kalak.

¹³⁷ Bujur kap Kam, o TUHAN, kerina AturenNdu pinter kap.

¹³⁸ Peraturen-peraturen si IberekenNdu, kerina mehuli dingen bujur.

¹³⁹ Gara pernembeh ateku, sabap la iperdiateken imbang-imbangku AjarenNdu.

¹⁴⁰ Andiko, seh kal teguhna PadanNdu, seh kal ateku jadina.

¹⁴¹ Kitik dingen hina kal aku, tapi la kupersilahang AjarenNdu.

¹⁴² KebenarenNdu tahan rasa lalap, undang-UndangNdu benar rasa lalap.

¹⁴³ Ceda kal ateku dingen getem pe pusuhku, tapi PeraturenNdu mereken keriahen man bangku.

¹⁴⁴ PeraturenNdu tetap bujur, bereken min bangku pengertin, maka aku nggeluh.

¹⁴⁵ Alu bulat ukurku erlebuh aku man BaNdu, o TUHAN, aloi kal aku, gelah kuikutken PerentahNdu.

¹⁴⁶ Erlebuh aku man BaNdu, kelini min aku, jenari kuikutken me undang-UndangNdu.

¹⁴⁷ Ope pultak matawari erlebuh aku man BaNdu, pengarapenku kutamaken ku bas PadanNdu.

¹⁴⁸ Gedang-gedang berngi matangku la tertunduh, aturen-AturenNdu kuukuri i bas pusuhku.

¹⁴⁹ O TUHAN, aloi min aku, erkiteken keleng AteNdu si tetap, cidahken min KeadilenNdu dingen jagai min geluhku.

¹⁵⁰ Nggo ndeher kalak si ngayak-ngayak aku, eme kalak si ndauh i bas undang-UndangNdu nari, dingen jahat ukurna.

¹⁵¹ Tapi Kam o TUHAN, ndeher ras aku, dingen kerina PerentahNdu tetap rasa lalap.

¹⁵² Nai-nai nari nggo kupelajari kerna AturenNdu, maka Kam si erbahanca ia tetap rasa lalap.

¹⁵³ Tatap min kesusahenku dingen tangtangi min aku, erkiteken labo kupersilahang undang-UndangNdu.

¹⁵⁴ Bela perkarangku dingen kelini min aku, bere maka aku nggeluh sue ras si IpadankenNdu.

¹⁵⁵ Kalak jahat, kutera pe labo terkelin, sabap la IikutkenNa undang-UndangNdu.

¹⁵⁶ O TUHAN, seh kal belinna perkuah AteNdu, bere maka aku nggeluh sue ras undang-UndangNdu.

¹⁵⁷ Nterem imbang-imbangku ras nindih aku, tapi la kupersilahang undang-UndangNdu.

¹⁵⁸ Ciga kal ateku ngidah penghianat-penghianat e, sabap la iikutkenna AjarenNdu.

¹⁵⁹ Nehen o TUHAN, uga kelengna ateku aturen-AturenNdu, keleng AteNdu la sambar-sambar, kelini min aku.

¹⁶⁰ KataNdu kap ulih kebenaren, kerina PenghakimenNdu benar.

¹⁶¹ Kalak si erkuasa nindas aku la ersabap, tapi nandangi undang-UndangNdu ngenca aku malang.

¹⁶² Andiko riahna ukurku erkiteken PerpadanNdu, bali ras keriahen kalak si rempet ndatken erta-erta.

¹⁶³ Kerina si la tuhu nembeh dingen ciga ateku, tapi undang-UndangNdu keleng kal ateku.

¹⁶⁴ Pitu kali sada wari kukataken bujur man BaNdu, sabap bujur kap KeputusenNdu.

¹⁶⁵ Tuhu-tuhu senang iakap kalak si engkelengi undang-UndangNdu, la lit kai pe si banci erbanca ia guling.

¹⁶⁶ O TUHAN, kutimai Kam engkelini aku, janah ngelakoken kai si IperentahkenNdu.

¹⁶⁷ Kuikutken AjarNdu, alu bulat ukurku kukelengi ia.

¹⁶⁸ Kerina perentah dingen AturenNdu kuikutken, IdahNdu kap kai pe si kubahan.

¹⁶⁹ Mbera seh sorangku man BaNdu, o TUHAN! Bere min bangku pengertin sue ras PadanNdu.

¹⁷⁰ Dengkehken min pertotonku, jenari kelini aku sue ras PadanNdu.

¹⁷¹ Kupuji ateku Kam rasa lalap, erkiteken IajarkenNdu bangku undang-UndangNdu.

¹⁷² Rende ateku kerna undang-UndangNdu, sabap bujur kap PerentahNdu.

¹⁷³ Kam min si lalap nampati aku, sabap kuikutken PerentahNdu.

¹⁷⁴ Metedeh kal ateku PenampatNdu, o TUHAN, undang-UndangNdu jadi keriahen man bangku.

¹⁷⁵ Bereken man bangku kegeluhen, maka banci Kam kupuji, AturenNdulah si nampati aku.

¹⁷⁶ Mampa-mampa aku bagi biri-biri si bene, tapi PerentahNdu la kupersilahang. Marilah, darami aku, sabap suruh-SuruhenNdu kap aku.

Mazmur

Video Mazmur 119

Ikuti Kami:

KONTAK | PARTISIPASI | DONASI