Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kataken bujur man TUHAN erkiteken KiniulinNa, KekelengenNa tetap rasa lalap.
2 Ninalah kalak Israel, "KekelengenNa tetap rasa lalap."
3 Ninalah imam-imam Dibata, "KekelengenNa tetap rasa lalap."
4 Ninalah si nembah man TUHAN, "KekelengenNa tetap rasa lalap."
5 I bas kesusahenku erlebuh aku man TUHAN, emaka IdengkehkenNa dingen IpulahiNa aku.
6 TUHAN kap ras aku, emaka la mbiar aku pe, kai kin banci ibahan kalak man bangku?
7 TUHAN kap penampatku, emaka kuidah imbang-imbangku italuken.
8 Madin ernalem man TUHAN, asangken ernalem man manusia.
9 Madin ernalem man TUHAN, asangken ernalem man kalak si erkuasa.
10 Nterem bangsa-bangsa sekelewetku, tapi alu gegeh TUHAN, kukernepken ia kerina.
11 Ikepungna aku, tapi alu gegeh TUHAN, kukernepken ia kerina.
12 Iulung-ulungna aku bagi pengulung-ulung wani, tapi nimpet ia desken permeseng rih, alu gegeh TUHAN kukernepken ia kerina.
13 Alu mesangat iserangna aku, janah menam talu, tapi TUHAN si nampati aku.
14 TUHAN erbanca aku megegeh dingen paguh, Ia si nggo mulahi aku.
15 Begiken sora surak kemenangen i bas kemah bangsa Dibata nari: "Kuasa TUHAN ergegeh i bas peperangen!
16 Kuasa TUHAN erbahanca kita menang, kuasa TUHAN ergegeh i bas peperangen."
17 La aku mate tapi enggeluh, jenari kumomoken kai si nggo ilakoken TUHAN.
18 Tuhu mberat aku iukum TUHAN, tapi la IpelepasNa mate.
19 Pulka man bangku pintu gerbang Rumah Pertoton, maka aku bengket janah ngataken bujur man TUHAN.
20 Enda me pintu gerbang TUHAN, kalak bujur ngenca banci bengket ku bas.
21 Kupuji Kam TUHAN, erkiteken IdengkehkenNdu pertotonku, nggo IberekenNdu kemenangen man bangku.
22 Batu si iambekken tukang, eme jadi batu palas si la banci lang.
23 Eme peraten TUHAN, tuhu mekelek rejin siakap ngidahsa.
24 Enda me wari kemenangen TUHAN, marilah si rayaken alu meriah ukur.
25 Kelini kami TUHAN, kelini kami, bereken kemenangen man kami.
26 Ketuahen kalak reh i bas gelar TUHAN i bas Rumah Pertoton nari ipasu-pasu kami kam.
27 TUHAN kap Dibata; gelgel nari mehuli PerbahanenNa man banta alu encikep dahan-dahan, mulailah erpesta, jenari keleweti batar-batar ingan persembahen.
28 Kam kap Dibatangku, emaka kukataken bujur BaNdu, kumomoken KemulianNdu.
29 Katakenlah bujur man TUHAN sabap mehuli kal kap Ia, KekelengenNa tetap rasa lalap.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA