Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sukkurukko mae ri Batara, kabarrangi kalompoanNa, caritai panggaukanNa mae ri bansa-bansaya.
2 Akkelongko kelong pammuji mae ri Batara, kabarrangi sikontu bate pare’Na appakalannasaka.
3 Iami Batara Kaminang Matangkasaka; rannu mako saba’ Ia ampatangki’ sikontu anynyombaya siratang rannu.
4 Appalakko kagassingang battu ri Ia, tuli sombai.
5 He, turunganna Abraham, atanNa, siagang turunganna Yakub tunipileNa, u’rangi sikontu gau’ appakalannasa’ sikontu le’baka Nagaukang, teako kaluppai sikamma kaputusanNa.
6 (105:5)
7 Batarami Allata’alata, kaputusanNa Napabattui ri sikontu linoa.
8 Tuli Nau’ranginna parjanjianNa, tappakei janjinNa satunggu-tungguna.
9 Anjo parjanjianNa Napareki siagang Abraham, nampa mae ri Ishak;
10 nampa nipakajarre’ siagang Yakub, a’jari parjanjiang mannannungang mae ri umma’ Israel.
11 Nakana, "Butta Kanaan laKupassareangi mae ri kau, a’jari pisaka nupatanga."
12 Riolo sangkamma tubattu-battu umma’Na Allata’ala anjoreng tena nasiapa jaina ke’nanga.
13 A’labaki’ ke’nanga battu ri pa’rasangang se’rea mae ri pa’rasangang maraeng.
14 Mingka tena Nalappassangi Batara manna inai anjallakkangi ke’nanga; Napakaingaki sikamma karaenga lanri ke’nanga, Nakana,
15 "Teako ganggui tunipileKu, teako a’gau’ ja’dalli mae ri na’bi-na’biKu!"
16 Napabattui Batara kacipuranga ri anjo pa’rasanganga, na Naalle sikontu parsadiaang kanrea.
17 Mingka Napajappa rioloi sitau ri dallekanna ke’nanga, Yusuf, le’baka nabalukang ke’nanga a’jari ata.
18 Nisikkoki rante bangkenna, nasarei kallonna rante bassi.
19 Kale’bakkanna kajariammi apa le’baka nitappu riolo, nipattojeng ri kananNa Batara.
20 Nampa karaeng Mesir, koasaya ri bansa-bansaya, napakabebasaki battu ri tarungkua.
21 Nisaremi tugasa’ angngurusuki balla’ lompona karaenga, nisarei koasa mae ri sikontu barang-baranna;
22 kammayatompa koasa untu’ angngatoroki sikamma pagawena karaenga, siagang ampimpingi sikamma tutoa-toaya.
23 Nampa a’lampamo Yakub mange ri Mesir nammantang tuli anjoreng salaku tubattu-battu.
24 Napa’jari Batara pila’ katambang jaina umma’Na, sa’genna la’bi kassa’mi nabalinna.
25 Napinrai pa’mai’na tu Mesir sa’genna birisi’ ri umma’Na na nagau’ jekkommo ke’nanga sikamma ata-atanNa.
26 Nampa Nasuro Musa atanNa siagang Harun tunipileNa.
27 Ri Mesir Nagaukangi ke’nanga gau’ appakalannasaka, gau’-gau’ malompo battua ri Batara,
28 na mannuruki ke’nanga ri parentaNa. Nampa Napa’jari sassang makkappu’ Batara anjo pa’rasanganga.
29 Napinrai binangana ke’nanga a’jari cera’, sa’genna panra’ ngaseng juku’na.
30 A’lemere’mi tumpanga ri pa’rasanganna ke’nanga, ba’lalo antamaki ri balla’ lompona karaenga.
31 Lanri parentaNa Allata’ala battumi katingaloa, siagang sikamma lamuka angkatulungi anjo sikontu pa’rasanganga.
32 Napaturummi es batua sambe bosi, Napabattui kila’ akkila’-kilaka.
33 Narumbangi poko’ anggoroka siagang poko’ araya, Napara’bai sikontu poko’-poko’na ke’nanga.
34 Lanri parentaNa, battui katimbanga, teai sipato’ jaina, takkulleai nirekeng jaina.
35 Napaccappuki sikontu lamung-lamunga ri kokoa, nakanre sa’genna la’busu’ wassele’na buttaya.
36 Nampa nabuno ngaseng sikontu ana’ bura’ne toaya lalang sikontu kaluargana tu Mesir.
37 Nampa Naantara’ bansa Israel assulu’, angngerangi ke’nanga pera’ siagang bulaeng; yangasenna baji’ ngaseng tubuna siagang gassing.
38 Tu Mesir nitujui ri malla’ siagang malla’ lompo, jari sannammi ke’nanga a’lampana tu Israel.
39 Naka’rangi Batara rammanga untu’ alla’langi umma’Na, siagang pepe’ untu’ ansingari ke’nanga ri wattu bangngi.
40 Appalaki ke’nanga, nampa nipabattu jangang-jangang kurammua, Nasarei ke’nanga roti battu ri suruga sa’genna bassoro’.
41 Nareppeki moncong batua, nampa assulu’ je’neka assolong sangkamma je’ne’ ri parang lompoa.
42 Saba’ Nau’rangi Batara janjinNa mae ri Abraham, atanNa.
43 Nampa naantara’ umma’Na siagang rannu, tunipileNa siagang makkio’ rannu.
44 Buttana bansa-bansaya Nasareangi ke’nanga, koko-kokonna ke’nanga Napa’jari umma’Na pata,
45 sollanna mannuruki anjo umma’Na ri hukkung-hukkunNa na napinawang parenta-parentaNa. Nipujimi Batara!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA