Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Katakenlah bujur man TUHAN, momokenlah KemulianNa. Turikenlah PerbahanenNa, ku kerina bangsa-bangsa.
2 Rendelah muji TUHAN, turikenlah PerbahanenNa si mejin.
3 Meriahlah ateta sabap Ia kap si mada kita, asa kalak si nembah Ia meriahlah ukurna.
4 Dahilah TUHAN mindo penampat, sembahlah Ia rasa lalap.
5 Kam, kesusuren Abraham, suruh-suruhen Dibata, dingen kesusuren Jakup si IpilihNa ingetlah kerina tanda kuasa si IbahanNa, dingen putusen-putusen si nggo IberekenNa.
6 (Mzm 105:5)
7 TUHAN kap Dibatanta, perentah-PerentahNa arus ipatuhi i belang-belang doni enda.
8 Perpadanen si IbahanNa lalap IingetNa, PadanNa seh ku sundut peseribuken.
9 IngetNa kap PerpadanNa ras Abraham, PadanNa man Isak la IlupakenNa.
10 Man Jakup perpadanen e IpeteguhiNa, jadi ketetapen man Israel rasa lalap.
11 Nina, "Man bandu Kubereken taneh Kanaan, jadi taneh pusakandu."
12 Nai bagi kalak pertandang nge bangsa Dibata e i je, beliganna pe la kasa kai.
13 Tandang-tandang ia i bas sada bangsa nari ku bangsa si deban, miser i bas sada negeri nari ku negeri si deban.
14 Tapi la ipediat TUHAN ise pe ndeheri bangsa e, janah guna ngkawalisa ipersingeti Dibata raja-raja nina,
15 "Ula suhsahi bangsa pilihenKu ula bahan jahat man nabi-nabingKu."
16 Ibahan TUHAN maka jadi me kelihen i bas negeri kalak enda, jenari IbuatNa i bas kalak enda nari kerina persedian pangan.
17 Tapi nggo IsuruhNa sekalak dilaki ngelebei ia, Jusup, si nggo idayaken jadi budak.
18 Erdalan ia alu nahena igari, kerahungna iiket alu rante besi.
19 Dungna teridah maka payo bagi kata Jusup ndube, kata TUHAN encidahkenca maka ia benar.
20 Jenari raja Mesir, penguasa bangsa-bangsa, mbebasken ia i bas tutupen nari.
21 Iendeskenna man bana tugas ngurus istana, jenari iangkatna ia jadi si merentah kerina negeri e.
22 Alu kuasana jine iaturna menteri-menteri, pertua-pertua kerajan iajarina.
23 Emaka lawes Jakup ku Mesir, dingen tading ia i je.
24 Ibahan TUHAN maka ertuah BangsaNa, emaka nggo gegehen ia asangken imbangna.
25 Ibahan TUHAN maka nembeh ate kalak Mesir man bangsa e, jenari itipu kalak Mesir suruh-suruhen TUHAN.
26 Kenca bage isuruh TUHAN si Musa, suruh-suruhenna, ras Harun, kalak PilihenNa.
27 I Mesir ilakokenna tanda kuasa, perbahanen-perbahanen si mbelin i bas TUHAN nari.
28 Ibahan TUHAN maka gelap tuhu-tuhu negeri e, tapi bangsa Mesir la ngikutken PerentahNa.
29 Lau belin i Mesir isalihken TUHAN jadi dareh, emaka mate kerina binurungna.
30 Katak erkemut i belang-belang negerina, seh bengket ku kamar raja.
31 Kenca e iperentahken Dibata rehen rengit-rengit ras laneng, rulung-ulung i bas kerina negeri e.
32 Gancih udan ipesusur TUHAN baho, dingen perkas ras kilap si erdepar-depar.
33 Mbulaken IbanNa batang anggur ras batang ara, kerina batang kayu i negerina ItombangkenNa.
34 IberekenNa perentah, emaka rehen labang, beliganna la teralang.
35 Keri kerina ipanganina sinuan-sinuan i negeri e, kerina si man peranin kernep ibanna.
36 Emaka kerina anak kalak Mesir sintua IbunuhNa, mate kerina anak-anak perana sintua i bas tep-tep keluarga.
37 Jenari maka ibabai TUHAN bangsa Israel ndarat, ibabana emas ras pirak. Iteruh pengkawali TUHAN, kerina megegeh ras mejuah-juah.
38 Kerina kalak Mesir mbiar ngenehenca, emaka meriah ukurna tupung lawes kalak enda.
39 Ikimbangken Dibata sada embun i babona, tupung berngi IberekenNa man kalak enda sada api si erbahanca terang.
40 Erkiteken pemindon bangsa e IsuruhNa reh leto, ipanganina ngayak besur pangan si reh i Surga nari.
41 Itakana deleng batu, emaka erburak lau i jenari, maler desken lau belin i gurun pasir.
42 Sabap iinget TUHAN PerpadanNa man suruh-SuruhenNa Abraham.
43 Bage me ItaruhkenNa ndarat bangsa PilihenNa alu ukur meriah rende bangsa e janah ersurak-surak.
44 IberekenNa man kalak enda taneh bangsa-bangsa si deban, ulih latih kalak jadi sikerajangen BangsaNa,
45 gelah tetap ipatuhi kalak enda undang-UndangNa, dingen ngikutken perentah-PerentahNa. Pujilah TUHAN!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA