Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pertoton sekalak tupung ia i bas kiniseran.
2 O TUHAN, begiken min pertotonku, dengkehken min pingko-pingkongku.
3 Ula ItundalkenNdu aku, tupung aku i bas kesusahen. Dengkehken min pingko-pingkongku, minter min aloi aku.
4 Geluhku masap bali ras cimber, dagingku melas bali ras api.
5 Pusuhku getem bagi nggala, nakan pe lanai terpan aku.
6 Megang sorangku ndehereng, dagingku kertang tading kuling maluti tulan.
7 Bali aku ras perik si meliar i bas gurun pasir, bagi kalingkupa i bas rumah si nggo meruntuh.
8 Matangku la banci tunduh, bagi perik si kelungunen i babo tarum rumah.
9 Gedang-gedang nu wari megombang imbangku bangku, ibelaskenna gelarku i bas sumpah.
10 Kupan abu gancih roti, inemenku singgur ras iluh.
11 Gara RawaNdu perban NembehNdu, o TUHAN, emaka ItatangNdu aku jenari IdampeskenNdu.
12 Geluhku desken awih tupung karaben, melus me aku desken dukut.
13 Tapi Kam kap raja rasa lalap seh rasa lalap, o TUHAN, kerina kesusuren la ngelupaken Kam.
14 Keke me Kam guna ngkelengi Sion, nggo seh paksana encidahken perkuah ate man bana, enda me paksana.
15 Sabap keleng kal ate suruh-SuruhenNdu nandangi kota e, aminna pe kota e nggo meruntuh, keleng kal atena kota e aminna pe nggo meruntuh.
16 Bangsa-bangsa mbiar nandangi TUHAN, kerina raja-raja malang man KuasaNa.
17 Sabap ipanteki TUHAN me mulihi Sion, IcidahkenNa me KemulianNa.
18 IdengkehkenNa me pingko-pingko BangsaNa si nggo itadingken dingen IbegikenNa me pertotonna.
19 Suratken min kerina perbahanen TUHAN enda, guna kesusuren si nandangi reh, maka bangsa si langa tubuh pe, banci muji Ia.
20 Itatap Dibata i bas InganNa si badia si meganjang nari, i Surga nari IpernehenNa ku doni,
21 lako ndengkehken kelsehen kalak si tertaban, dingen lako mulahi kalak si iukum mate.
22 Emaka imomoken me GelarNa i Sion, ipuji me Ia i Jerusalem,
23 tupung bangsa-bangsa ras kerajan-kerajan pulung lako ersembah man TUHAN.
24 Tupung aku nguda denga, lanai aku ergegeh ibahan TUHAN, IpegendekNa umurku.
25 Emaka ningku, "O Dibata, ula buat kesahku adi langa aku metua." O TUHAN, Kam nggeluh rasa lalap seh rasa lalap,
26 nuria nai Kam si nepa pertibi enda, alu TanNdu jine, ItepaNdu langit.
27 Kerina nge pagi kernep, Kam ngenca lang, bagi uis kerina nge tapes, IambekkenNdu ia bagi uis si nggo merigat, emaka bene me kerina.
28 Tapi Kam tetap seh rasa lalap, GeluhNdu tetap la erkeri-kerin. <102:29> - Teneng me pergeluh anak-anak kami, erkiteken PengkawaliNdu, teneng me kempu-kempuna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA