Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Palang reng-oreng se andhi’ sajja jahat sabatara aba’na dhung-tedhungan e katedhunganna e baja malem, sarta pas ajalannagi sajjana jareya e baja laggu polana aba’na la andhi’ kakowadan kaangguy ajalannagiya jareya.

² Mon badha teggal se ekaterrowe reng-oreng jareya pas terros erampas. Mon badha bengko se ekaterrowe pas esarobot. Dhi’-andhi’na oreng sarta ana’ binena padha tadha’ se amana.

³ Daddi PANGERAN adhabu, "Sengko’ asajja madhatengnga balai ka ba’na, sampe’ ba’na ta’ talopot. E bakto se na’as jareya ba’na ta’ kera ngenneng ajalan ko-maangko pole.

⁴ Papasthenna ba’na se juba’ jareya bi’ oreng bakal ekagabaya mon-semmonan, ban reng-oreng jareya bakal agabaya nyanyeyan kasossa’an reya, ‘PANGERAN la nyendhal tang nagara reya, pas eparengngagi ka tang moso se nawan sengko’. Sengko’ sateya la ancor tadha’ karena.’"

⁵ Daddi, mon la napa’ baktona nagara reya epabali pole ka ommadda PANGERAN, tadha’ settonga e antarana ba’na se melowa bagiyan.

⁶ Reng-oreng akotbah ka sengko’, oca’na, "Ja’ akotbah ka sengko’. Ja’ akotbah parkara jareya kabbi. Sengko’ ta’ kera olle malo.

⁷ Ja’ ngera ommat Isra’il la ebasto PANGERAN! PANGERAN ta’ kera alampa’agi pa-apa se kantha jareya. Pangeran salanjangnga ta’ tao kaelangan sabbarra. Salerana laba mon abu-dhabu ka reng-oreng se teppa’ tengkana."

⁸ PANGERAN adhabu, "Ba’na se nyerrang Tang ommat akantha moso. Oreng mole dhari paperrangan kalaban pangarebban arassa’a aman neng e bengkona, tape neng e jadhiya ba’na la anante’ se arampasa bengkona.

⁹ Babine’an e antarana Tang ommat bi’ ba’na eojuk dhari bengkona se ekasennengnge, ban ba’na arampas kaangguy salanjangnga berkat se bi’ Sengko’ ebagi ka na’-ana’na babine’an jareya.

¹⁰ Mara jaga pas mangkat; e dhinna’ la ta’ aman. Sa-dusana ba’na la madhateng balai se nako’e ka kennengngan reya.

¹¹ Se earep ba’na nabbi se dujan acaca lecegan ban nepowan sarta aramal ja’ ba’na bakal andhi’a anggur ban nom-enoman kerras se talebat bannya’na."

¹² PANGERAN adhabu pole, "He, re-karena ommat Isra’il se gi’ ta’ mate! Bi’ Sengko’ ba’na masthe epakompola ban epasettonga akantha dumba se abali ka kandhangnga. Padha ban talon se possa’ ban dumba, bariya keya nagarana ba’na bakal possa’a pole ban oreng sabannya’na.

¹³ Sengko’ mokka’a jalan ban ngeba’a ba’na kalowar dhari pambuwangan. Ba’na bakal magujura bang-labang saketheng sarta ajalana ta’ kalaban badha alangan. Sengko’, PANGERAN dibi’, Sengko’ reya Ratona ba’na, ban Sengko’ se mimpina ba’na kalowar."

Mikha

Video Mikha 2

Ikuti Kami:

KONTAK | PARTISIPASI | DONASI