Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Cilaka me kalak si la tunduh-tunduh i bas inganna medem taren ngukurken kejahaten. Nggo kenca matawari pultak erpagi-pagi, adi lit kenca kesempaten, idalankenna minter kejahaten si nggo irencanakenna.
2 Mengga atena juma kalak, irampasna; mengga atena rumah kalak, ibuatna. La lit ibahanna aman jabu ras erta kalak.
3 Erdandanken si e nina TUHAN, "Aku ersura-sura maba cilaka man bandu, dingen la ngasup kam pulah i je nari. Reh me man bandu paksa keguluten, janah kenca bage lanai bo kam erdalan alu ukur meganjang.
4 Kenca paksa si e nggo seh, ibahan kalak me kam jadi kuan-kuan penguru-ngurun, janah iendekenna me ende-enden aru ate kerna kai si jadi man bandu nina: Nggo keri kal kami radas! TUHAN nggo muat taneh kami, janah IberekenNa taneh e man kalak si naban kami."
5 Erkiteken si e, kenca seh pagi paksana IberekenNa ka taneh e man bangsa TUHAN, la lit sada pe kam si dat bagin i je.
6 Erkhotbah kalak ndai man bangku nina, "Ula kam erkhotbah man kami. Ula inubuatkenndu kerna si ndai kerina. Dibata labo nggit njuruken kami.
7 Akapndu kin kalak Israel kena sumpah? Nggo kin bene kesabaren TUHAN? Tuhu-tuhu kin AteNa ngelakoken si e? Ma mehuli kin CakapNa man kalak si ngelakoken si benar?"
8 Nina TUHAN njabapsa, "Tapi bagi musuh perbahanenndu man bangsangKu. Kalak si mulih i bas perang nari, iakapna aman i kuta; tapi i je me kam nimai, janah nangko jubahna i bas gurungna nari.
9 Diberu bangsangKu ipelawesndu i bas rumahna nari si ngena atena, dingen i bas anak-anakna nari irampasndu kemulianKu seh rasa lalap.
10 Kekeken, je nari laweslah! Lanai lit ketenengen i jenda. Dosa-dosandu nggo maba cilaka man ingan enda gelah ikernepken.
11 Bangsa enda ngena atena man nabi si lawes ku jah ku jenda nuriken kata guak dingen penipu alu ngataken, "Kunubuatken anggur ras inemen keras maler man bandu."
12 Tapi Kupepulung me kam kerina, o kam kalak Israel si tading denga. Kupersada kam kerina desken biri-biri mulih ku rarasenna. Desken mbalmbal dem alu biri-biri, tanehndu enda pe dem pagi mulihi alu jelma."
13 Italangi Dibata me dalan man bana janah IbabaiNa ia mulih i bas pembuangen nari. Ndarat ia arah pintu gerbang kuta, je nari bebas. Rajana, e me TUHAN, Ia jine me si naruhkenca.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA