Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ojo karoonya i Yesu mangandonge loo etu, Ia nasale i Nosa Mapasing yako ri koro Yordan nto’u pada bone danagoda i ngKepala nto pantipu.
2 Wali ndate ria opo mpuyu mbengi kasaenya ponto wuri ponto eo i Yesu mangorop, wali see naka Ia moro kojo kompoNya.
3 Wali yako etu rata i panggoda resi Ia. Panggoda etu manganto’oka Ia, “Ane monso pu’u Komi Ana i mPue Allah, to’oka watu si’i, ‘Powali yau roti.’”
4 Pei i Yesu mangansono, Ia manganto’o, “Aku taa damangika ewa wetu apa re’e to ratulis ri raya ntuntu i mPue Allah to manganto’o, ‘Naka pei to lino re’e katuwunya si’a ojo saba mangkoni pangkoni. To bae wo’u batuanginya tau nempo mawali moro komponya pei ia tiroo mampolaika kasamparianya gombo to nato’o i mPue Allah.’ Etu semo to re’e ratulis ri raya ntuntu i mPue Allah.”
5 Wali yako etu, i Kepala nto pantipu mangkeni i Yesu nto’u Yerusalem, kota to i Pue Allah puenya. Rata ndate ria, ia mangkeni i Yesu nto’u wumbu to malangan kojo ri banua i mPue Allah panewa manganto’oka Ia makore ndate ria.
6 Ia manganto’oka i Yesu, “Ane monso pu’u Komi Ana i mPue Allah, patimbesi lo’u aranya, apa re’e ratulis ri raya ntuntu i mPue Allah, to’onya, ‘I Pue Allah manganto’oka pomakauNya damampalaes Komi. Wali pale nsira damangokotaka Komi naka ne’e pasiwa witiMu dakono ri watu.’”
7 Pei i Yesu mangansono wo’u gombo i ngKepala nto pantipu etu, Ia manganto’o, “Bo’ongKu matimbesi, apa re’e seja ratulis ri raya ntuntu i mPue Allah, to’onya, ‘Ne’e mangansoba kuasa i mPue Allahmu.’”
8 Wali yako etu i Kepala nto pantipu mangkeni wo’u i Yesu nto’u rapa ntongku to malangan kojo. Ojo karata nsira ndate ria, ia mangansuduka i Yesu samparia lipu ntau to nakuasang makole pasi kasugi to meyawa kojo to nja’u lipu-lipu etu.
9 Ia manganto’oka i Yesu, “Samparia lipu to meyawa pasi to bae batuanginya to nukita ngKomi etu aku damangawaika Komi damangkuasang ane Komi madungku yau ri wawo ntana damampue mampakabae aku.”
10 Wali i Yesu manganto’oka ia, “Gete, bo’ongku! Apa re’e porenta to ratulis ri raya ntuntu i mPue Allah to manganto’o, ‘Ne’e mampakabae anu to yusa wo’u kasimbalinya yako resi i Pue apa Ia semo Allah ngkomi. Pasi tare yusa to danupalaika kasimbalinya yako Ia.’ Ewa wetu ratulis ri raya ntuntu i mPue Allah, wali piyaimo Kepala Measa!”
11 Wali tempo i Yesu manganto’o gombo etu, i Kepala nto pantipu miyai yako resi Ia. Panewa ma’i pomakau i mPue Allah yako ri saruga, ma’i mangansawang i Yesu.
12 Wali yako etu i Yesu mangandonge kareba i Yohanes ia ratarungku. Ojo pandongeNya kareba etu, i Yesu mawolili muni njo’u lipu to si Ia, etu semo kota Nasaret to nja’u propinsi Galilea.
13 Yako etu Ia mayoko muni yako Nasaret pei yau maroo nja’u kota Kapernaum pei mampotundeka tau nja’u ria. Kapernaum etu re’e ri towo ndano Galilea ri lipu to tempo owi nakaroo nto Zebulon pasi to Naptali.
14 Palaong to naika i Yesu ri Galilea etu mawali see tibanang gombo nto pantuntu tuntu i mPue Allah, i Yesaya, tempo owi. Ia manganto’o,
15 “Re’e to damawali nja’u lipu nto Zebulon pasi lipu nto Naptali ri sambote koro Yordan, lipu-lipu to naka liu ntau dayau ri rano. Lipu etu rato’oka Galilea, pasi tau to maroo nja’u ria kaborosinya tau to si’a to Yahudi.
16 Wali tau to maroo nja’u ria raporapaka ewa tau to maroo ri raya ngkawuri. Pei ri tempo to darata sira damangkita reme to makilo kojo. Tempo si’i sira meka kojo mampobuuka kapate, pasi kameka ndaya nsira etu maya raporapaka ewa tau to meka malinja ri raya mburi, pei re’e reme to damampakareme jaya nsira.” Etu semo gombo to natulis i Yesaya tempo owi mangkonong tau to damangkenika to Galilea reme, etu semo kareba mangkonong i Pue Allah.
17 Wali yako tempo etu, i Yesu mula mampakarebaka tau, Ia manganto’o, “Pojeamo, apa daratamo temponya i Pue Allah damawali Makole ri lino.”
18 Wali re’e seore i Yesu malinja ri wii ndano Galilea. Ri raya mpalinjaNya etu Ia re’e mangkita dua mba’a tau sintua’i. Sanga ntau dua etu i Simon to rato’oka i Petrus sira dua i Andreas. Sira dua mangajala bau ri rano etu apa sira dua to panjala.
19 Wali i Yesu mangansale sira dua, Ia manganto’o, “Yau lulu Aku pei mawali anagurungKu. Apa tempo si’i komi to panjala bau, pei Aku damangawaika komi palaong to bou. Wali si’amo bau to danuliwu ngkomi. Aku damampotundeka komi yau damansale tau see sira damangalulu seja Aku.”
20 Wali ojo pangandonge nsira dua gombo i Yesu etu, sira mampiyaikamo jalanya, mansaka yau mangalulu Ia.
21 Wali yako etu sira togo malinja wo’u. Ri raya mpalinja nsira etu sira mangkita wo’u tau dua to sintua’i. Tau dua etu ana i nSebedeus, i Yakobus sira dua i Yohanes. Wali sira dua re’e sindarandara pei pa’anya ri raya bangka. Sira tongo-tongonya mangkariang jala-jala nsira. Wali i Yesu mampokio i Yakobus sira dua i Yohanes, Ia mangansale sira dua mangalulu seja Ia.
22 Wali sira dua mansaka mampiyaika yau bangka nsira etu pasi pa’anya pei mangalulu Ia.
23 Wali yako etu i Yesu mangalinjak propinsi Galilea. Ia mampotunde nja’u banua-banua to napampotunde nto Yahudi, pasi Ia mampakarebaka resi samparia tau kareba matao mangkonong ewa wimba i Pue Allah damawali Makole nto lino. Pasi Ia mampakatao muni tau boros nempo panyaki kesaa to re’e resi sira.
24 Wali kareba to mangkonong palaong to naika i Yesu nja’u Galilea etu napakarebaka ntau ri propinsi to ri awe mpropinsi Galilea, etu semo propinsi Siria. Wali kareba mangkonong i Yesu natikarebarebamo seja juku ri propinsi Siria etu. See naka tau mangkenika Ia samparia yunu nsira to kono panyaki mpangaya-ngaya, pasi tau to narata ntida to mapari kojo. Pasi sira mangkenika seja Ia tau to naposuak measa, tau to kanjonjo-njonjo, pei tau to malulu koronya. Wali i Yesu mampakatao muni samparia tau to rata etu.
25 Wali boros kojo tau to mangalulu-lulu Ia. Tau etu yako Galilea, pasi yako lipu to sampuyu kota, lipu etu sanganya Dekapolis. Pasi re’e seja tau to yako Yerusalem, yako propinsi Yudea pasi yako ri lipu ntau to sambote ngkoro Yordan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA