Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Naopu etu Yesus nikeni Nosa Nagasa nu Alatala nantende mpaka ri karawa baina ala rapesoba Magau nu Seta.

² Ri setu patampulu eo patampulu mbengi Yesus da'a nanggoni nuapa-nuapa. Naopu etu naoro mpu'umo ta'ina.

³ Pade naratamo Magau nu Seta nompakamosu I'a ante nanguli, "Ane Iko mpu'u-mpu'u Ana nu Alatala pakaumo watu-watu e'i majadi roti."

⁴ Tapi nesonomo Yesus, "Naria nitulisi riara Buku Nagasa iwe'i: Da'a aga nggari roti manusia mamala matuwu, tapi nggari pura-pura tesa to nitesa nu Alatala."

⁵ Naopu etu Yesus nikeni Magau nu Seta mpaka ri ngata Yerusalem, ngata to nagasana etu, pade I'a nitu'una ri wumbu nu Sapo Mpepue.

⁶ Pade niulina ka Yesus, "Ane Iko Ana nu Alatala, potingganawumo Iko nggari se'i mpaka ri tana. Iko da'a ria mokuya sabana naria nitulisi riara Buku Nagasa iwe'i: 'Pue Alatala kana mompakau malaeka-malaekana mombajagai iko. Ira kana mantinande iko ante pale ira, ala kadamu ne'e mawela watu.'"

⁷ Tapi nesonomo Yesus ka i'a, "Naria wo'u nitulisi riara Buku Nagasa to nanguli iwe'i: 'Ne'e iko mombasoba Pue Alatalamu!'"

⁸ Pade sangganipa Yesus nikeni Magau nu Seta mpaka ri bunggu bulu to nalanga mpu'u. Pade nipopokitana ka I'a pura-pura poparenta to naria riara dunia e'i ante mpengele-ngele kuasana.

⁹ Pade niulina ka I'a, "Pura-pura etu kana kuwai ka Iko ane Iko mekadede mombasomba aku."

¹⁰ Tapi nesonomo Yesus ka i'a, "E, Magau nu Seta, palaimo iko nggari se'i! Sabana naria nitulisi riara Buku Nagasa iwe'i: 'Iko kana mombasomba Pue Alatalamu. Aga I'amo to masipato mupepue.'"

¹¹ Nangepe etu nalaimo Magau nu Seta nompalasi Yesus, pade naratamo malaeka-malaeka i Pue nantulungi I'a.

¹² Tempo Yesus nangepe lele Yohanes Topediu nitarunggu, natinggulimo I'a mpaka ri Bagia Galilea.

¹³ Narata ri setu nolinjamo I'a nggari ngata Nazaret nalau neto'o ri ngata Kapernaum ri wiwi Rano Galilea ri Bagia Zebulon bo Naftali.

¹⁴ Nipowiana iwetu ala madupamo tesa i Pue to niboto nabi Yesaya nggaolu iwe'i:

¹⁵ "Tana Zebulon bo tana Naftali ri jala mpaka ri rano ri sambote Binangga Yordan, ri Bagia Galilea to nipeto'o tau-tau da'a to Yahudi.

¹⁶ Tau-tau to natuwu ri karumauna ri setu nanggita reme to nabetena. Ira to naeka-eka mamate niwanta nu rememo."

¹⁷ Nompamula nggari tempo etu Yesus nompatolele ka tau-tau iwe'i: "Kajeamo nggari silaka komi, sabana namosumo tempona Alatala moparenta ri dunia ewa magau."

¹⁸ Naria sanggani Yesus nolumako ri wiwi Rano Galilea. Ri setu I'a nanggita romba'a tau nosampesuwu, etumo i Simon to nidae i Petrus ante tua'ina Andreas. Tempo etu ira nantendeaka jala nompemala bau ri rano etu sabana ira topompemala bau.

¹⁹ Nangulimo Yesus ka ira, "Kamaimo, tukimo Aku pade Aku mompatuduki komi mangelo tau majadi topantuki Alatala."

²⁰ Nangepe etu kaliu-liu ira romba'a nompalasi jala ira ri setu pade nalau nantuki Yesus.

²¹ Naopu etu napolamo Yesus sampe I'a nanggita romba'apa tau nosampesuwu, etumo Yakobus bo Yohanes ana-ana i Zebedeus. Tempo etu ira nompakabelo jala ira riara saongu sakaya mpasanggani-nggani ante uma ira i Zebedeus. Yesus nompokio ira romba'a mantuki I'a.

²² Nangepe etu kaliu-liu ira nompalasi sakaya bo uma ira pade nalau nantuki Yesus.

²³ Nalaumo Yesus nompebutu ngata ri Bagia Galilea. Ri ngata-ngata etu I'a nompatuduki tau ri sapo mpodade nto Yahudi pade I'a nompatolele Kareba Belo to nanguli mana masaeka Alatala moparenta ri dunia ewa magau. Pade nipakabelona pura-pura tau to naju'a bo nalente.

²⁴ Karebana natolele mpaka ri umba-umba ri Bagia Siria, sampe tau-tau nanggeni ka I'a pura-pura roana to nawela mpengele ju'a bo kasusana, tau-tau nipesua seta, tau-tau nadola, pade tau-tau napunggu. Pade Yesus nompakabelo ira pura-pura.

²⁵ Nadea mpu'u tau to nantuki I'a. Naria ira nggari Bagia Galilea, Bagia Sampulu Ngata, ngata Yerusalem, Bagia Yudea pade naria ira nggari bagia sambote Binangga Yordan.

Matius

Video Matius 4

Ikuti Kami:

KONTAK | PARTISIPASI | DONASI