Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi Yésus kinuyut Roh iné' su luk ali-ali pad Ieh tetunin Iblis.
2 Idi Ieh mawa' apat ngepulu' aco idi apat ngepulu' alem. Pangeh ineh Ieh melau peh.
3 Idi Iblis iné' Neneh, kebalaneh, "Kudeng matu Iko Anak Allah, do' Iko ngisu' batu-batu ini mangun ku ruti kenenMu."
4 Iamo' kebala Yésus, "Pangeh inayud bang Surat Allah, 'Baken ratnan ruti mo' lemulun miak mulun, iamo' ratnan anid-anid bala luk bila Allah.'"
5 Idi Iblis nenguit Yésus semuet bang Bawang luk Meligan, idi nenganau' Neneh luun buduk Ruma' Allah,
6 idi kebalaneh Neneh, "Kudeng matu Iko Anak Allah, do' Iko ubpa amé' déi' liang, ngaceku pangeh inayud bang Surat Allah, 'Allah miak mada' melaikat-melaikatNeh ratnan Iko; ideh miak ngimet Namu ku ticu'deh, pelé kukudMu na matuk ku batu.'"
7 Idi kebala Yésus, "Pangeh inayud teh bang Surat Allah, 'Aleg iko nutun Allah Tuhanmu.'"
8 Pangeh ineh Iblis nenguit Yésus iné' luun pegkung luk medita', idi ieh nemada' sirenNeh amung-amung imet tana' ini dengan rayehdeh.
9 Idi kebala Iblis Neneh, "Amung-amung imet ini barénku Namu, kudeng Iko tekeradung sembayang negku."
10 Idi kebala Yésus neneh, "Buro iko, Sétan, ngaceku pangeh inayud bang Surat Allah, 'Do' iko sembayang inan Tuhan Allahmu, idi maya' Neneh mo'.'"
11 Idi Iblis neburo rat Neneh, idi melaikat-melaikat nacing idi nengasa' Neneh.
12 Kareb Yésus neninger Yahya pangeh kikem, idi Ieh nelemubed iné' Galilia.
13 Idi na Ieh tudo déi' Nasarét, iamo' Ieh iné' Kapernaum, luk iring tangeb Takung Galilia luk bang babpat Sebulon idi Naptali. Idi Ieh tudo déi',
14 pad nacing luk bila Nabi Yesaya, kebalaneh,
15 "Tana' Sebulon idi tana' Naptali luk déi' dipar Abpa' Yarden, idi luk muneng ku takung, ieh ineh Galilia, tana' lun pupu baken!
16 Pupu luk tudo bang dacem, miak nier acang luk rayeh. Idi kuan lemulun luk tudo bang lungung su luk inan até acang miak macing."
17 Rat kareb idi Yésus nengimun mada', kebalaNeh, "Do' muyuh uren, ngaceku Imet surga pangeh muneng!"
18 Kareb Yésus nenalan tangeb Takung Galilia, Ieh nenier dueh lun ngerabat luk denganak, ieh ineh Simun luk titen Pétrus, idi kinanakneh Andrias, luk uned ngerabat déi' bang takung ineh.
19 Idi kebala Yésus nedidueh, "Do' medueh amé' maya' Negku, idi Ui nganau' nemedueh ku lun ngerabat lemulun."
20 Idi petacu didueh nenecan rabat ineh, idi nemaya' Neneh.
21 Idi Ieh nenalan teh, idi Ieh nenier dueh denganak luk baken teh, ieh ineh Yakub idi Yahya Sabdi, luk tudo bang alud dengan Sabdi taman didueh, idi diteluh ngii' rabatdeh, idi Ieh nenawar nedidueh.
22 Idi petacu didueh nenecan alud ineh dengan taman didueh, idi nemaya' Yésus.
23 Yésus nenalan aput tana' Galilia, idi nemada' bang ruma' sembayangdeh, idi Ieh nemada' Bala luk Do' ratnan Imet ineh, idi Ieh nengedo' amung-amung lun luk mét, idi melaya' burur.
24 Idi bala ratnan Yésus nepiar aput bawang Siria, idi ideh nenguit amung-amung lun luk mét amé' Neneh, idi sebuang mét dengan riput-riput luk mét. Inan sebuang luk sinuet ada', inan teh luk mét meruai, idi inan teh sebuang luk meliai, idi Ieh nengedo' nedeh.
25 Idi pelaba ula' lemulun nemaya' Neneh rat Galilia idi Pulu' Bawang rat Yerusalim idi Yudia, idi rat déi' dipar Abpa' Yarden.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA