Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tempo naparamo ngata Yerusalem, ira nakava ri ngata Betfage ri kente nu Bulu Zaitun. Ri sia i Yesus nantudu randua anaguruNa mokolu.
2 NiuliNa ka ira, "Koimo pokolu rangata moitu. Ane makava hamai, kaliu-liu rakavamiu sangu *keledai besina nitataka nosanggani-nggani ante anana. Volemo kaloro nu keledai ntali ana bo umbu tumai.
3 Ane maria tona mompekutana komiu, uli ka ira, 'I Pue madota mompake keledai hitu sampalai bo rapopanjiliNa ri sii ngena.' Bo kaliu-liu radekeina komiu manggeni binata haitu tumai. "
4 Haitu najadi ala madupa tesa nu Alatala anu niboto nu *nabi nggaulu ivei:
5 Ulimo ka tupu ngata Sion, "Peinta! Ritumo magaumiu makava nte komiu! Ia naede rarana, Ia nesavi keledai,
6 Jadi hau randua anaguru i Yesus novia anu nitevaiNa ka ira.
7 Niumburamo keledai ntali ana hau nte i Yesus. Nakava hamai nidikara baju-baju ndoera ri bengo nu keledai haitu bo nesavimo i Yesus.
8 Tempo i Yesus noliu ri dala jama, nadea mpuu tona nombavoke baju ndoera ri dala, bo naria sanu nangala tava-tava kayu nitalera ri dala ala mombabila i Yesus.
9 Bo todea ri kolu i Yesus ante ira topantuntuni ri puri nongare-ngare, "Hosana! Ratoiyamo Muli Magau Daud! Maoge belo ka Magau anu nakava niposumba nu Alatala! Ratoiyamo Alatala ri suruga!"
10 Tempo i Yesus nesua ri ngata Yerusalem, nagado puramo tona hamai. Ira nosimpekutana-tanamo, "Isema tano tona hitu?"
11 Nesana todea nantuntuni Ia, "Iamo i Yesus, nabi lako ri ngata Nazaret ri bagia Galilea!"
12 Hau i Yesus nesua ri doyata Banua nu Alatala bo nipopalaiNa pura-pura tona nobalu-balu hamai. NisumbolinakaNa meja-meja ntoposula doi bo bangku-bangku ntopobalu tonji banggebodo.
13 NiuliNa ka ira, "Riara Buku Gasa nitulisi ivei: 'BanuaKu kana rauli banua posambaya.' Tapi komiu ri sii nompajadi Banua nu Alatala hitu petabuni ntopeago!"
14 Naliu haitu tona naburo bo tona nakejo bo nakoyo nakava nte i Yesus riara Banua nu Alatala. Bo nipakabeloNamo ira.
15 Tapi *balengga-balengga ntopanggeni pesomba bo *guru-guru agama naraumo rarara nanggita kabaraka-kabaraka nipovia i Yesus. Bo nagigimo rarara nangepe ngana-ngana ri Banua nu Alatala nongare-ngare, "Hosana! Ratoiyamo Muli Magau Daud!"
16 Nanguli ira ka i Yesus, "Ledo niepeMu anu niuli ngana-ngana hitu? Nakuya bo ledo nitagiMiu?" Nesana i Yesus, "NiepeKumo. Nakuya tano? Ledo nibacamiu anu nitulisi riara Buku Gasa ivei: Ngana-ngana bo ngana da netomi nipatudukiMiu mantoiya Komiu."
17 Naupu haitu i Yesus nompalaisi ira, pade nesuvu Ia lako ri ngata Yerusalem hau ri ngata Betania. Bo naturumo Ia sambongi hamai.
18 Naeo mpadondo i Yesus ante anaguruNa nanjili hau ri ngata Yerusalem. Naaramo taiNa.
19 Ri soso dala nikitaNa sanggayu kayu *ara. Jadi hau Ia nanggaparai kayu haitu, tapi nau aga sangu vuana ledo ria nikavaNa, aga tavana bayangi. Jadi niuliNa ka kayu haitu, "Mompamula eo hitu, domo movua iko!" Bo kaliu-liu nalelemo kayu haitu.
20 Nokumaamo rara nu ana-anaguruNa. Nipekutanara nte Ia, "Berimba sampe kayu ara haitu kaliu-liu namate ivehitu?"
21 Nesana i Yesus, "Pariaramo tesaKu hitu. Ane komiu momparasaya, bo ledo molengga-lengga raramiu, komiu muni mamala movia anu nipoviaKu ka kayu haitu. Bo ledo aga ivesia, komiu mamala mangulika bulu hitu, 'Kateunggatakamo! Katedaka rantasi!', bo majadi mpuu.
22 Ane komiu momparasaya Alatala, nuapa-nuapa raperapimiu riara mposambayamiu majadi mpuu."
23 Nesuamo i Yesus riara doyata Banua nu Alatala bo nompaguru. Da ranja nompaguru Ia, nakavamo balengga-balengga ntopanggeni pesomba bo totua-totua *ntoYahudi. Nipekutanara nte i Yesus nangelo saba, "Ante kuasa nuapa nipoviaMiu pura-pura haitu ri Banua nu Alatala? Isema nombadekei kuasa haitu ka Komiu?"
24 Nesana i Yesus, "Kupekutana muni nte komiu. Ane rapesanakamiu, Kuuli isema nombadekei kuasa ka Yaku movia anu haitu.
25 Uli ka Yaku, isema nombadekei kuasa ka i Yohanes mombadiu tona? Alatala atau manusia?" Bo pakeni ntoYahudi haitu nosimpekutana, "Berimba kita mesana ka Ia? Ane raulita i Yohanes nombadiu ante kuasa lako nte Alatala, rauliNa vai ka kita, 'Ane ivesia, nakuya ledo niparasayamiu i Yohanes?'
26 Tapi ane raulita kuasana lako nte manusia, naeka kita nte todea, sabana ira pura-pura nomparasaya i Yohanes mpuu-mpuu *nabi nTupu."
27 Jadi nesana ira ka i Yesus, "Ledo nisani kami lako ri umba kuasana." Jadi i Yesus nanguli ka ira, "Ane ivesia, ledo muni Kuuli ka komiu isema nombadekei kuasa ka Yaku movia mpengaya-ngaya hitu."
28 I Yesus nompekutana pakeni ntoYahudi, "Berimba panggavamiu? Naria saito tuama, randua anana langgai. Nanguli ia ka anana lumbua, 'Anaku, koimo iko mokarajaa ri talua.'
29 Bo nesana ana lumbua, 'Ledo yaku hau!' Tapi naliu haitu nanjoso raramo ia bo kana hau mpuumo ia nokarajaa ri talua.
30 Hau vai tuamana nte anana karanduana bo niulikana, 'Anaku, koimo iko mokarajaa ri talua.' Tapi nesana ngana haitu, 'Iyo, Tata. Hau yaku.' Tano mai, ledo hau ia."
31 Nanguli i Yesus ka pakeni ntoYahudi haitu, "Jadi lako ri ngana randua haitu, isemana nangoseaka dota ntuamana?" Nesana ira, "Ngana paratamana." Nanguli i Yesus ka ira, "Nakana pesanamiu. Tapi pariaramo tesaKu hitu, tona nadaa eva *topesingara balasitee bo bajinga-bajinga mokolu majadi todea riara Poparenta nu Alatala, ledo komiu.
32 Sabana, i Yohanes Topediu neonga nompatuduki dala nanoa ka komiu, tapi ledo niparasayamiu ia. Tapi topesingara balasitee bo bajinga nomparasaya ia. Bo nau nikitamiu pura-pura anu nikitara, ledo najea komiu, bo ledo ntoto niparasayamiu."
33 I Yesus nompapola tesaNa ka pakeni-pakeni ntoYahudi. NiuliNa, "Epe porapa ntanina. Naria saito tupu ntalua nombatuda *anggur ri taluana. Nivalana ntiku talua haitu bo nikaena lovu ri vatu rapompea vua anggur. Bo nipoviana sou pojaga ri talua haitu. Naupu haitu nibolina talua haitu nte bara sako-ndua topokarajaa mojampangina, damo rabagi aselena, bo hau ia ri ngata nakavao.
34 Temponamo mompupu vua anggur, nitudunamo bara sakuya-ndua batuana hau nte topokarajaa talua ala mantarima bagiana lako ri vua anggur.
35 Tapi topokarajaa talua haitu nombasaka batua nituduna, saitopa nibobara, saito nipatesira, bo saito nirempera ante vatu.
36 Jadi tupu ntalua nombatudu batua ntanina hau nte topokarajaa taluana. Nadeapa ira pade ira pamulana, tapi ira muni nipovia ntopokarajaa talua nasimbayu eva batua-batua pamulana.
37 Kaupuna nituduna anana mboto apa nipekirina, 'Natantumo ira kana mombabila anaku!'
38 Tapi tempo topokarajaa talua haitu nanggita ana ntupu ntalua tumai, nosiulikamo ira, 'Eh! Tumaimo ana ntupu ntalua anu rakaboli mbara-mbara ntotuana. Anumo! Rapatesitamo ia ala talua hitu raalata majadi bagiata.'
39 Jadi nisakaramo ana ntupu ntalua haitu bo nikenira hau ri savaliku ntalua bo nipatesira."
40 I Yesus nompekutana pakeni ntoYahudi haitu, "Berimba panggavamiu? Ane tupu ntalua haitu manjili ngena, nuapa rapoviana ka topokarajaa haitu?"
41 Nesana ira, "Natantumo rapatesina ira nadaa haitu bo rabolina taluana ka tona ntanina anu madota mombadekei ka ia bagiana lako ri asele ntalua ri tempona."
42 Nanguli i Yesus ka ira, "Natantu nibacamiumo tesa riara Buku Gasa anu nombatesa Magau Topepakasalama ivei: Vatu nitedeaka ntopovia banua vatu haitumo anu nopokopa ka banua haitu. Haitu nipovia nTupu, bo nabelo mpuu ri panggitata!"
43 Nanguli muni i Yesus ka ira, "Ivesia muni sanu komiu nompoara Yaku. Jadi Kuuli ka komiu, bagiamiu riara Poparenta nu Alatala raala lako nte komiu bo radekei ka tona ntanina anu mangoseaka dota nu Alatala.
44 Bo isema-sema manavu ri vatu haitu marupusaka, bo isema-sema rarumpi nu vatu haitu maoya mpeje."
45 Tempo balengga-balengga ntopanggeni pesomba bo *toFarisi nangepe porapa i Yesus haitu, nisanira porapa-porapa gahaitu nipambela ka ira.
46 Jadi nipasimbukura mombasaka i Yesus. Tapi naeka ira todea magado apa nangoseaka panggava ntodea i Yesus haitu nabi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA