¹ “Sap lamkam dep dena insa emsa gubiridanan, Alap kim de kitak irik giꞌinka, zen mae makan: Nga yawal mo bi nik de kak tangannak zi hip hakanna kiye– zere mo anggur ngasa de syal gweblan hap.
² Kim ola anakan ziaha-en gulku, ‘Aha-ere yakla blalkam de syal hap, ee asa te-alana aha-ere-ala aha-ere-ala enkam ebe mae hap lop tazim,’ dekam zep syal tan hap sek gwek.
³ Jam sembilankam zep nga bina in etan song gweka, dekam zep ahakore zini syal srem naka etan hlauludaꞌanka. Pasarak ewal-wale gweꞌak.
⁴ Zao zep gubiridaka, ‘Em ano anggur nganak de syal tan hap sek gwen. Ëe asa ebe mae hap te-alasa ere mo syal jam enkam golzim.’
⁵ Zen hen dekam zep hendep sek gwek. Yakla bolak denaban hen jam tigakam nga bina in kire enkam ahakore naka hen kwang guluda gweꞌanka.
⁶ Jam limakam kim etan song gweka, etan dekam zep zini syal srem naka hlauludaꞌanka, nama esa nyaubluꞌak. Zao zep takensibiridaka, ‘Em ba habe yakla blala an yaublu tiner– ba maesa de syal gwibin sremkamye?’
⁷ “Zini in ki zep ding nulblik, ‘Abe mae hap hom am mae zini syal maena nolzim– zao de syal tan hapye.’ “Nga bina in ki zep gubiridaka, ‘Ki ano anggur nganak de syal tan hap em sek gwen.’
⁸ “Nga bina in dapse gwesin niban zep zere mo irgwa tahana kore zini gubluka, ‘Dekam syal zini insa tagam gul. Zao te-alana kae gwebla-zim. Nonol aumwa hap de syal tan wenya kon kon gwesibir hana, hendep aumwa hap nonol syal tan wenya kip golzim.’
⁹ Dekam zep jam limakam de syal tan wenyik nonol yaing gwezak. Zebe mae hap te-alana aha-ere ala enkam zep kae gwebla-zimki.
¹⁰ Aumwa hap zep hwena kak tangannak de syal tan wenya yaing gwezak. Zen man ekil giꞌik, ‘Abe mae hap mam tolkam sa kae gwebla-zimdi,’ hwena zebe mae hap hen kire enkam kae gwebla-zimki.
¹¹ Kim ki te-alana insa kap daink, dekam zep nga bina insa jala ban donblaꞌak,
¹² ‘Aumwanak in zen syal tal, zen aha-ere jam enkam syal tal. Ëe hwena yakla langasae syal ta tiner. Em hwena apde enkam te-alana abe mae hap golzimdi, hwena ee yakla sal-sal yawalake waba hap syal ta tiner!’
¹³ “Nga bina in ki zep ahanaka ding gulbluka, ‘Ano wal bose, ee home emsa karek tabir. Ki san ha nen home ola aha-en ul? – te-alana ebe mae hap aha-ere ala enkam de golzimdin hipye, aha-ere yaklakam de syal hapye.
¹⁴ Zep ebe mae hap dena in desa emki kap ta irin, deban sek gwek. Sap emsa ee kirekame dwam gwibiridaꞌan– aumwanak in zen hen mas tal zebe mae hap hen kire enkam de kap tazimdin hip.
¹⁵ San ha ebon mae onakon ee kirekam babe ere mo enlalakam syal gwen– ere mo te-alakamye? San ha ee de aha zi hip kirekam kae-kae gwen hap em ema asa husus eblaꞌan?’”
¹⁶ Yesus ki zep etan asa gubiridaka, “Zen lamkam kirekam sa hen lwal: Men zen angkam bose srem wenya egweꞌan, zen zen sa hwena lamkam ngein sin loweher. Hwena men zen angkam bose naban lowehe gweꞌan, zen hwena lamkam zen sa lure san egwer.”
¹⁷ Yesus kim zi beyam-bya naban Yerusalem san asa golesek gweꞌanka, oranak zep dua-blaskam de zini asa en sren tagal gulsuku, zao zep asa gubiridaka,
¹⁸ “Ola ansa emki esan: Nen an angkam Yerusalemk debe yaing gwe seꞌan. Zewe ngatan zi mo lang nakore Zi Tanganna Asa sa tapbla dazim– Alap mo golak de syal tan zi mo mam-mam wenya kip, hen Musa mo olsa de tawa ta gwibin wenya kip. Zen sa hwena Asa de tan hap ola aha-en nul,
¹⁹ hendep Asa sa Yahudi srem zi mo tahanak dep tapbla dazim. Zen sa hwena Asa lamang da gwer, hen dangole gwer. Hendep te-lidak sonnak sa Asa makan dain. Hwena yaklana dan-ahan, ki sa etan Alap tin nikon Asa ngaya tala.”
²⁰ Zebedeus Bak mo wenya ki zep walas dare zem Yakobus ne Yohanis neban Yesus onak zihatazak. Yesus mo nwenak zep boklena kom sozak– dekam de abe tan sremnak blikip gwesiblin hap.
²¹ Yesus ki zep ze takensibirki, “Em basae dwam gwibiꞌira? – desa de ebe hap golbin hipye.” Wenya in ki zep ding gulbluk, “Ëe mae habe dwam gweꞌan: Em kime teipsinkim irik giꞌinka, ano walas darena an dikire hen teipsinkim eno alp nakon inikink– ahana eno dam taha nakon, ahana irgwa taha nakon.”
²² Yesus ki zep gubiridaka, “Hwena ena home tame uꞌin– in zebe eabe gwenanye.” Ki zep hwena walas dare zem insa guzimki, “Karek yawala men desae goltoweꞌak, em wehe desa de oltowen hap hen hohle eꞌara?” Ki zep ding ulblika, “Ëe ama hen hohle eꞌan.”
²³ Zao zep etan guzimki, “Eiwa, em hen esa tol oltowera– Ëe men kiresae goltoweꞌakye. Hwena men zen de ano irgwa taha nakon hen dam taha nakon inikinꞌinka, desa Ëe bejene dam sosun. Zewe de inikirin hip dena, zen diki ano Bian Zena mensa dam sosuku, zen diki zen sa ze inikiri.”
²⁴ Hwena ee dare taha-tapkam de ahakore ang ta gwen wenya kime zeno nik mo abe lan ola insa esak, ee dekam zebe mae hap sisngin eizimꞌik, “Zen bap zen de mam en hap abe lala!”
²⁵ Dekam zep Yesus asa kitak tagal gulsuku, zao zep asa gubiridaka, “Ena dwan tawa nakake: Alapsa de tame tan srem lang-langnak men zen teipsin-teipsinkim teinikin gwenan, zen man zere kore naka jap nul sonenda gwenan hen nyaubirida gwenan.
²⁶ Hwena em zeno mae mo kim bahem. Ebon mae onakon men zen mam gwen hap dwam gweꞌara, zen diki tingare zi mo babu gwen zi makan zen gwen.
²⁷ Hen ebon mae onakon men zen teipsin hip dwam gweꞌara, zen diki tingare zi mo tana iltikinnik zen nikirin.
²⁸ Sap ngatan zi mo lang nakore Zi Tanganna, Ëe an zi de Asa babu gweblan hap home hatazak. Zep em hen ano tana wei san emki Asa zertro gwen. Sap Ëe tingare zi mo tana iltikinnik de nikirin hibe hatazak– hendep ere mo angsa de tingare zisi dikim hil ti sonebin hip sosok tazimdin hip.”
²⁹ Yesus kim e yala Yerikosa asa zihli taꞌanka, zini beyam-bya tangan nik zep ang neblak.
³⁰ Hwena zi nwe dimin darena ora alpnak inikinꞌinka. Kim anakan asalka, “In Yesus man-am tamanꞌan zala,” ki zep aherhe hana gweꞌanka, “Daud Bak mo Auyan-tane, ano nik mo Teipsinni, asa Em kwasang gwizimdin.”
³¹ Zi beyam-byana in zep jalse neizimk, “Balkkam!” Hwena zen dekam tangan zep mam tangankam aherhe hana gweꞌanka, “Daud Bak mo Auyan-tane, ano nik mo Teipsinni, asa tol Emki kwasang gwizimdin!”
³² Yesus ki zep zausuku, ki zep takenzimki, “Em basae dwam eibiꞌira– Ëe de desa ebe nikip syal gwibir-zimdin hipye?”
³³ Ki zep ding ulblika, “Bian, ee nwesa de kara en habe dwam eꞌan.”
³⁴ Yesus zao zep dawemkam kwasang gwizimki, ki zep zeno nik mo nwena insa olk sozimki. Hendep dekam zep ki nwena kara eka. Dekon hendep Yesussu zep ang eblaka.