Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Araq dengan-dengan Parisi dait dengan Saduki parek ojok Deside Isa jari cobe Ie. Ie pade tunas adẽq Deside Isa piaq tande ajaip lẽman sorge.

² Laguq jawab Deside Isa lẽq ie pade, ["Lamun kenyeke serep jelo, side pade bebase, 'Cuace bagus, sẽngaq langitne bẽaq.'

³ Dait lẽq kelẽmaq, side pade bebase, 'Jelo niki gen turun ujan, sẽngaq langitne bẽaq dait gulem.' Nah, side pade tao ngeramal cuace lẽman serioq keadaan langit, padahal tande-tande jaman ndẽq bau side pade ramal!"]

⁴ "Jahat gati dait durhake dengan-dengan lẽq jaman niki! Side pade mẽlẽ serioq Tiang miaq tande? Tipaq side pade ndẽq gen teicanin sopoq juaq tande kecuali tande Nabi Yunus." Sesampun Deside Isa bemanik maraq nike, Ie margi bilin ie pade.

⁵ Waktu pengiring-pengiring Deside Isa rauh lẽq itoqan danao, baruq ie pade nenaoq bahwe ie pade lupaq jauq ruti.

⁶ Deside Isa bemanik lẽq ie pade, "Pade waspade lẽq ragi ruti dengan Parisi dait dengan Saduki."

⁷ Sewaktu ie pade dengah manik Deside Isa nike, pengiring-pengiring-Ne mulai bebase sopoq kance saq lain, "Deside Isa bemanik maraq nike sẽngaq ite ndẽq jauq ruti."

⁸ Deside Isa wikan napi saq ie pade raosang, jari Ie bemanik, "Kembẽq side pade ngeraosang mengenai ndẽq bedowẽ ruti? Side pade kurang percaye!

⁹ Napi side pade ndẽqman ngerti? Napi side pade ndẽq inget mengenai lime ruti saq Tiang peleng-peleng jari keloran lime iyu dengan nike? Pire bakaq salone saq side pade kumpulang?

¹⁰ Dait berembẽ ẽndah mengenai pituq ruti umaq empat iyu dengan nike, pire bakaq salo keloran saq side pade kumpulang?

¹¹ Kembẽq side pade jangke ndẽq ngerti bahwe Tiang ndẽq ngeraos kance side pade mengenai ruti? Pade onyaq-onyaq lẽq ragi ruti dengan-dengan Parisi dait dengan Saduki!"

¹² Ahirne pengiring-pengiring Deside Isa nike ngerti bahwe Ie peringet adẽq ie pade onyaq-onyaq ndẽqne lẽq ragi ruti saq tekadu jari miaq ruti, laguq lẽq pengajahan-pengajahan dengan-dengan Parisi dait Saduki.

¹³ Deside Isa rauh lẽq daẽrah Kaisarea Pilipi. Lẽq derike Deside Isa beketuan lẽq pengiring-pengiring-Ne, "Menurut basen dengan, sai Bije Manusie nike?"

¹⁴ Jawab pengiring-pengiring-Ne, "Araq saq bebase Yahya Pembaptis. Araq ẽndah saq bebase Elia, saq lain malik bebase Yeremia atao salaq sopoq lẽman pare nabi."

¹⁵ "Laguq menurut side pade, Tiang niki sai?" Deside Isa beketuan.

¹⁶ Jawab Simon Petrus, "Pelungguh Almasih, Bije saq asalne lẽman Allah saq idup."

¹⁷ Manik Deside Isa lẽq Petrus, "Bahagie side, Simon bije Yunus! Sẽngaq ndẽqne manusie saq badaq side hal nike, laguq Allah, Bapa Tiang saq lẽq sorge.

¹⁸ Dait Tiang badaq side, bahwe side Petrus, batu saq tegẽng. Dait lẽq atas batu niki Tiang gen anjengang jemaah Tiang, saq ndẽq bau tekalahang; timaqne siq alam maut!

¹⁹ Tiang gen bẽng side kunci Kerajaan Sorge. Dait napi saq side taliq lẽq gumi, gen tetaliq ẽndah lẽq sorge. Dait napi saq side lekaq lẽq dunie niki, gen telekaq ẽndah lẽq sorge."

²⁰ Sesampun nike Deside Isa peringet pengiring-pengiring-Ne adẽq ie pade ndẽq bebadaq lẽq sai-sai bahwe Ie Almasih.

²¹ Mulai lẽman waktu nike, Deside Isa nyatayang secare terus terang lẽq pengiring-pengiring-Ne, bahwe Ie harus lumbar ojok Yerusalem dait ngalamin luwẽq penderitean lẽman pemimpin-pemimpin, imam-imam kepale dait ahli-ahli Taurat. Ie gen tematẽq, laguq lẽq jelo saq ketelu Ie gen teidupang malik.

²² Beterus Petrus ngantuq Deside Isa ojok lempẽng dait peringet Ie, basene, "Junjungan Saq Mulie, semoge Allah jaoqang hal nike lẽman Pelungguh! Sampunang hal nike jangke telaksane lẽq Pelungguh!"

²³ Deside Isa cingakin andang Petrus dait bemanik, "Lalo lẽman tẽ Belis! Side ngalang-ngalangin Tiang. Pikirande pikiran manusie; ndẽqne pikiran Allah!"

²⁴ Beterus Deside Isa bemanik lẽq pengiring-pengiring-Ne, "Sebilang dengan saq mẽlẽ turut Tiang, ie harus ngelupaqang kepentinganne mẽsaq, ngelẽmbah salibne, dait tetep turut Tiang.

²⁵ Sẽngaq dengan saq mẽlẽ nyelametang nyawene, gen kẽlangan nyawene. Laguq dengan saq kẽlangan nyawene lantaran Tiang, dengan nike gen mauq idupne malik.

²⁶ Napi untungne lẽq sopoq dengan, lamun seantẽro dunie niki jari dowẽne, laguq ie kẽlangan nyawene? Napi araq saq bau tekadu siq dengan jari tukah nyawene?

²⁷ Ndẽq ngonẽq malik Bije Manusie, teiring siq malaẽkat-malaẽkat-Ne gen rauh lẽq dalem kemuliean Bapa-Ne. Lẽq waktu nike, Ie gen bales tipaq sebilang dengan menurut perbuatanne sopoq-sopoq.

²⁸ Tiang badaq side pade: Setetune lẽq antare side pade saq araq lẽq deriki, araq saq ndẽq gen ninggal, sendẽqman ie pade serioq Bije Manusie rauh jari Raje dalem Kerajaan-Ne."

Matius

Video Matius 16

Ikuti Kami:

KONTAK | PARTISIPASI | DONASI