Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi lun Parisi idi lun Saduki nacing sikal nutun Yésus, idi nemutuh Neneh maré aceh tanu' rat bang surga sirendeh.
2 Iamo' kebala Yésus, "Kareb aco macep muyuh pebala, 'Merikan ini lek, ngaceku langit ini mesia'.'
3 Idi kareb pekak, muyuh pebala, 'Mudan aco sini lek, ngaceku langit ini mesia' idi medacem.' Matu muyuh mileh kali' ayu langit, iamo' na muyuh mileh kali' ratnan tanu'-tanu' kareb ini!
4 Inul luk dat idi luk na lutep nakap aceh tanu', iamo' na tanu' barén nedeh, iamo' tanu' Nabi Yunus mo'." Idi Yésus nenecan nedeh idi nalan.
5 Kareb anak-anak sekola'Neh iné' déi' dipar, ideh nekelupan nguit ruti.
6 Idi kebala Yésus nedeh, "Ngerawé do'-do'' muyuh, idi matar do'-do' ratnan lamud lun Parisi idi lun Saduki.
7 Idi ideh nepegayam arangdeh sebuleng, keburi'deh, "Tau' na nenguit ruti."
8 Kareb Yésus nekali' baladeh, idi kebalaNeh, "O muyuh luk na petap anu, ngudeh muyuh pegayam arang muyuh sebuleng, ngaceku na luk idi ruti nemuyuh?
9 Naké muyuh kali' idi ngerawé ratnan limeh balad ruti kuan limeh ngeribu lemulun, idi ratnan tudu' ngebuan tecehneh luk imung muyuh?
10 Kudeng apeh tudu' balad ruti kuan apat ngeribu lemulun idi tuda' ngebuan tecehneh luk imung muyuh teh?
11 Kudeng apehké muyuh na kali' idi baken ratnan ruti luk Ui mala kuan muyuh? Iamo' matar do'-do' ratnan lamud lun Parisi idi lun Saduki ineh."
12 Idi ideh nekali' ilung bala Yésus, ieh ineh baken Ieh nepebala ratnan matar bururdeh ratnan lamud ruti, iamo' ratnan luk bida' lun Parisi idi lun Saduki.
13 Idi pangeh Yésus nacing bang tana' Kaisaria Pilipi, Ieh nengitun anak-anak sekola'Neh, keburi'Neh, "Maya' buri' dulun, idéké Anak-Lemulun?"
14 Idi keburi'deh, "Sebuang pebala, Yahya luk Ngerereb; inan teh luk pebala, Elia' inan teh luk pebala, Yeremia, kian, seburur nabi luk baken lek."
15 Idi kebala Yésus, "Idéké Ui ini bang terawé muyuh?"
16 Idi kebala Simun Pétrus, "Iko Keristus, Anak Allah luk mulun."
17 Idi kebala Yésus, "Samal kuanmu, O Simun, anak Yunus! Ngaceku baken lemulun luk ngelio ini kuanmu, iamo' TamanKu luk bang surga.
18 Idi Ui pebala namu teh, O Pétrus, iko ineh aceh batu, idi luun batu ini Ui sikal mudut sidangKu, idi até pana' na miak metueh rat neneh.
19 Ui maré namu amung-amung taka Imet surga; idi anun-anun luk iko ngabet bang tana' ini, ieh ineh betin bang surga, idi anun-anun luk iko neka bang tana' ini, ieh ineh teh takan bang surga."
20 Idi Yésus neperiteteng kuan anak-anak sekola'Neh, pad na mada' kuan seburur lemulun pana', ratnan Ieh Keristus.
21 Rat kareb ineh, Yésus nengimun mada' kuan anak-anak sekola'Neh, kebalaNeh, "Na miak na Ui amé' déi' Yerusalim, idi mabeh mula' dereh ratnan lun rayeh, idi ratnan imam-imam rayeh idi guru-guru Ukum, pad Ui pitayen teh, idi aco luk keteluh Ui miak tuyen teh."
22 Idi Pétrus nenguit Yésus iné' setau', idi ieh nemebpeng Neneh, keburi'neh, "Do' amung ineh uen Allah ngado rat Namu, O Tuhan! Dereh ineh na miak macing Namu."
23 Iamo' Yésus nelumi, idi nepebala ni Pétrus, "Amé' pa ketedKu, O Sétan! Iko luk ngesabeng Negku, ngaceku iko baken ngerawé luk ratnan Allah, iamo' lu ratnan lemulun mo'."
24 Idi kebala Yésus kuan anak-anak sekola'Neh, "Idé-idé luk sikal maya' Negku, do' ieh na ngerawé bururneh sebuleng, iamo' maan salibneh idi maya' Negku.
25 Ngaceku idé-idé luk ngerawé ulunneh, na miak ngalap ulun luk matu; idi lemulun luk na ngerawé ulunneh sebuleng ngaceku Ui, ieh ngalap ulun luk matu.
26 Ngaceku anunké ulekneh kudeng selemulun ngalap amung-amung tana' ini, iamo' na ieh ngalap ulun luk meruked? Idi anunké luk miak barén lemulun ku libal ulunneh?
27 Ngaceku Anak-Lemulun sikal macing dengan rayeh TamanNeh, idi dengan melaikat-melaikatNeh. Kareb ineh Ieh sikal ngua' kuan anid-anid lemulun maya' kekamenneh.
28 Ngerawé do'-do', inan sebuang rat arangdeh luk tuped ieni, luk na miak kali' maté, kareb nateh ideh nier Anak-Lemulun macing dengan ImetNeh."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA