Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ La'ondrasi Yesu ira Farizai'o ba Sadukai'o. Omasi ira latandraw̃aisi Ia. La'andrõ khõ-Nia ena'õ Ifazõkhi dandra sahõlihõli dõdõ ba wangoroma wa si otarai Lowalangi Ia.

² Itema lira Yesu, ["Na tanõ owi, ba mimane, 'Molõkhõ, bõrõ me oyo mbanua.']

³ [Ba zahulõ wongi mimane, 'Moteu ma'õkhõ andre, bõrõ me oyo mbanua ba alu.' Tola mifa'ele'õ hadia moteu ba ma molõkhõ, na mifaigi lawuo, ba tandra ginõtõ andre ba tebai mifa'ele'õ!"]

⁴ "Ha wa'alõsõkhi ami ba ha wa'afaito niha ba ginõtõ andre. Mi'andrõ khõ-Gu ena'õ Ulau zahõlihõli dõdõ. Lõ hadõi tola mube'e khõmi, baero dandra andrõ salua khõ Yona." Me no aefa Iw̃a'õ da'õ Yesu, Irõi ira, mofanõ Ia.

⁵ Me no larugi yefo mbaw̃a ira nifahaõ Yesu, awena la'ila wa no olifu ira wolohe roti.

⁶ Imane khõra Yesu, "Mi'angelama ba laru Warizai'o ba Sadukai'o andrõ."

⁷ Me no larongo wehede Yesu andrõ ira nifahaõ-Nia, ba faoma lamane khõ nawõra, "Iw̃a'õ da'õ me lõ ni'oheda roti."

⁸ I'ila Yesu hadia nifahuhuosira. Imane khõra, "Hana wa miw̃a'õ lõ hadõi roti? No ambõ famatimi!

⁹ Hadia lõ aboto ba dõdõmi nasa? Hadia lõ mitõrõ tõdõmi zi lima ngawua roti andrõ niboboto-Gu, nibe'e õ ba zi lima ribu niha?

¹⁰ Ba hewisa gõi zi fitu ngawua roti ba niha si õfa ribu andrõ? Hadia lõ mitõrõ tõdõmi? Ha'uga daga ni'owuloimi?

¹¹ Hana wa lõ aboto ba dõdõmi wa tenga roti niw̃a'õ-Gu? Mi'angelama ba laru ndra Farizai'o ba Sadukai'o!"

¹² Awena aboto ba dõdõ ndra nifahaõ andrõ niw̃a'õ-Nia. Ifangelama ira Yesu, wa tenga ba laru soguna ba wamangamõi roti. Hiza sa famahaõ ndra Farizai'o ba Sadukai'o niw̃a'õ-Nia khõra.

¹³ Mõi Yesu ba danõ ahatõ ba mbanua Kaizarea-Filifi. Ba da'õ Isofu khõ ndra nifahaõ-Nia, "Molo'õ fanguma'õ niha, haniha Nono Niha andrõ?"

¹⁴ Latema li ira nifahaõ Yesu, "So zanguma'õ Yohane Samayagõ Idanõ. So gõi zanguma'õ Elia. Ba tanõ bõ'õ law̃a'õ Yeremia, ma zui samõsa ba gotalua zama'ele'õ."

¹⁵ Isofu khõra Yesu, "Molo'õ ya'ami haniha Ndra'odo andre?"

¹⁶ Itema li Simoni Fetero, "Razo Sangorifi Ndra'ugõ, Ono Lowalangi sauri."

¹⁷ Iw̃a'õ Yesu, "Ya'ahowu sibai ndra'ugõ, Simoni ono Yona! Bõrõ me tenga niha zangombakha khõu da'õ, no Ama-Gu andrõ si so ba zorugo.

¹⁸ Bõrõ da'õ haogõ wanõngõni, Fetero! No gowe saro ndra'ugõ. Ba yaw̃a ba dete gowe andre Ufasindro mbanua-Gu dania, si tebai ni'alani, he fa'amate!

¹⁹ Ube'e dania khõu nono kusi ba Mbanua si Bohou khõ Lowalangi. Hadia nitenaw̃au ba gulidanõ andre, ba no nitenaw̃a gõi ba zorugo. Ba hadia ni'atulõ'õu ba gulidanõ andre, ba no gõi te'atulõ'õ ba zorugo."

²⁰ Aefa da'õ Ifangelama ndra nifahaõ-Nia ena'õ bõi la'ombakha'õ gofu ha'õkhõ wa Ya'ia Razo Sangorifi andrõ.

²¹ I'otarai da'õ, I'ombakha'õ zi so ba dõdõ-Nia Yesu khõ ndra nifahaõ-Nia. Lõ tola lõ'õ mõi Ia ba Yeruzalema, ba lafakao Ia ira sondrõnia'õ ba Ere Sebua ba Sangila Amakhoita. Nibunu dania Ia. Ba ba ngaluo si tõlu maoso dania Ia mangawuli!

²² Maoso Wetero idõni danga Yesu ba zinga ba ifangelama Ia. Imane Fetero, "He So'aya, ya'I'arou'õ Lowalangi da'õ. Bõi ya'alua zi manõ!"

²³ Ibali'õ Ia Yesu ba Imane khõ Wetero, "He sanandraigõ, ofanõ ba da'e! Hana wa õtahataha Ndra'odo. Fangerangera niha wangerangerau, tenga fangerangera Lowalangi!"

²⁴ Imane Yesu khõ ndra nifahaõ-Nia, "Na so zomasi molo'õ Ya'o, ya mu'ositengagõ wa'aurinia, ya mulu'i rõfania, ya mu'o'õ Ndra'o.

²⁵ Bõrõ me niha sobelegõ fa'aurinia, da'õ dania zi taya fa'auri. Ba niha sanehegõ fa'aurinia khõ-Gu, da'õ dania zanõndra fa'aurinia.

²⁶ Hadia hare niha na i'okhõgõ fefu gulidanõ andre ba te'ala ia fa'aurinia? Tatu lõ harenia. Fa'auri niha tebai mufalali faoma hadia ia!

²⁷ Lõ ara tõ mangawuli Nono Niha andrõ si fao kuaso Nama-Nia, awõ ndra mala'ika. Ba luo da'õ Isulõni ba zamõsana molo'õ amuatania.

²⁸ Mitõngõni! So ba gotaluami ba da'e zi lõ mate fatua lõ i'ila wa'atohare Nono Niha, tobali Razo."

Matius

Video Matius 16

Ikuti Kami:

KONTAK | PARTISIPASI | DONASI