¹ Hom holo gweꞌak aha Hari Sabatkam Yesus dekam zep zere hon de ang ta gwen wenya aban mae gamdum tra san goletaman gweꞌanka. Ëe hwena ama usak hap gandum danna insa kilk li-in kini gweꞌak– desa de twenblandan hap.
² Hwena Farisikam de gubirida gwen wenya kim asa hla nulidak, dekam zep Yesussu nenblak, “Em san home ere hon de ang ta gwen wenya insa hlauludaꞌara? Zen in nere mae mo titi tabin olsa ngip nuꞌin– kirekam de Hari Sabatnak syal gwibinkimye.”
³ Yesus ki zep hwena ding gulzimki, “Em bawalkam esa Alap mo ola an mo eini dam ulsul? – men kim Daud Bak zere hon de ang ta gwen wenya ban goleusak gweꞌankaye.
⁴ Zen kim Alap mo golak til zika, zen dekam Alap hap de roti loneblansa gol kinika. Desa zep zere hon de ang ta gwen wenya ban zitwinbir song gweka. Hwena sap neno mae mo titi tabin olak man lwak: Sap Daud zena hen zebon de ang ta gwen wenya, zen bejen Alap hap de rotina insa twinbin. Zen diki Alap mo golak de syal ta gwen zi en dwin gwibirin. Sap eiwa kirekam, hwena Daud hom Alap mo nwenak karek gweka– zen kim usak hap zitwinbirkiye. Zep hen kirekam, Abon de ang ta gwen wenya an kim usak hap kilk di-in kinzil, zen hom ekarek gwer.
⁵ Hen em bawalkam esa Musa mo titi tabin ola an mo eini dam ulsul? Tingare Hari Sabat jamkam Alap mo golak de syal tan zini Bian mo golak sap de syal ta gwen. Zen dekam man Hari Sabat hap de ol jalse gwenna insa syal gwenkam nulmun gwenan, hwena dekam Alap bejen desa husus gwibiridan, sap zen dekam zere mo golak de syalsa kim su nul sone gwenan.
⁶ Zen in zebe emsa gubiridaꞌan: Sap sa Abon de ang ta gwen wenya an hen kirekam Hari Sabat hap dena nulmun gwer, sap Ëe an Zen, bol zaun tangan Zini. Sap Alap mo gola in Abon onakon man lwala heꞌan.
⁷ Sap Alap mo olak man lwak, ‘Ëe a kirekam de lowehe gwen habe mo emsa dwam gwibiridaꞌanye: Bol-zaun tanganna, aha zi mo karek-kareksa em kwasang tola ban eititi gwe-gwibin. Ere mae mo karek-karek hap de otweransa abe hap tru tasik gweblanna, zen bol-zaun tangan naka hom.’ Eme kirekam de Alap mo ola insa dawemkam lik ei gwibiꞌinam, ki molye Abon de ang ta gwen wenya ansa karek gon sremnak jal eibiridananam.
⁸ Sap ngatan zi mo lang nakore Zi Tanganna, Ëe an Zen tangan– Hari Sabat mo Nolaye. Zep anakarekam de klis gul gwizimdin hip dena, ‘Desa sap esa Hari Sabatnak syal eibir,’ ahaksa, ‘Kirekam bahem,’ zen ano dena.”
⁹ Yesus kim dekon song gweka, dekam zep hwena Yahudi mo aha but srem golak tilki.
¹⁰ Hwena zini zao gweꞌanka, eihya tahana mes sak gweblaka. Farisikam de zini men zen Yesus mo kareksa de hlaulblun hap ealp gweꞌak, ki zep nenblak, “Em banakane Musa mo titi tabin ola dam gulsuꞌura? Hari Sabatkam san ha zi sang-sangsa sap de dawem tabinkim? San ha bejen?”
¹¹ Yesus ki zep ding gulzimki, “Eno mae mo domba zaho de ahanik Hari Sabatkam kama dwraknak dum gwe heꞌanam, san ha em molye dekam er aneꞌanam?
¹² Hwena zini nen Alap mo nwenak domba naban apdenak hom. Zep nen sap esa zi sang-sangna Hari Sabatkam dawem la gwibir.”
¹³ Ki zep hwena Yesus zi taha sakna insa gubluka, “Tahana insa emki inin gilsin.” Ki zep hendep inin gilsiki, dekam zep hendep dawem gweblak– men kiye, eihya tahana.
¹⁴ Farisikam de zini in dekam zep but srem gola in kon wet so gwek, hwena dekam zep Yesussu de tan hap ola aha-en nuꞌik.
¹⁵ Yesus kim Farisikam de zini insa anakan tame tabirki, “Zen Asa de tan hap olsa aha-en nuꞌin,” dekam zep kon song gweka. Hwena zini beya tangan nik ang neblak. Zi sang-sangna hen man ang neblak, dekam zep ze kitak dawem tabirki.
¹⁶ Hwena man ze jalse gwibiridaka, “Bahem aha maesa anakan gubiridan, ‘Asa Yesus dawem taka.’”
¹⁷ Zen dekam zep zauk– Alap mo ola mensa Yesaya Bak orep Yesus hup dena anakan ayang gulkuye,
¹⁸ “An Zen tangan– ere mo dam tasin Zini hen zer sonen Zi niye, ere mo dang tininak de tanganna. Ëe ama tangan sam gwesik gweblanan. Ëre mo Enhona zebe hap asa kitak hle ta soneblal. Zen Zen sa tingare zi ausu hap anakan ayang gul gwizimdi, ‘Alap dam-dam enkam sa tingan klis gulu.’
¹⁹ Zen molya darak ola gu gweka, hen ol al hap ola molya zeno ek tihi nakon te so gwek. Hen ora bol san molya ol mam-mamkam ton nasen gweka.
²⁰ Zen enlala sae-sae enna, zep Zen molya aptyo sin-sin makare wenya zalta dep gweibirida kinika. Hen men zeno mae mo sosonna tap gwen hap golek de gweꞌan, desa molya da tasik gwibirki. Zen kirekam sa kara ta gwibiri, hendep Zen sa ano irik ginni okamanak golhatala.
²¹ Tingare irik gin langnak de zi ausuna engaya gwen hap dena Zebon en onak sa eblol gwe-gwer.”
²² Zao kim lwa seꞌak, ki zep zini Yesus onak dep dowal mo bi gweblan zi ol sremna nerhatazak. Nwena hen man dimin neblak. Yesus kim dawem taka, dekam zep ola tonka hen nwena kara gweka.
²³ Tingare zini man tangan denggwanblak. Zep egu gweꞌak, “An san ha Zen? – Daud Bak mo Auyan-tane naye, mensa anakan nen guk gweblakye, ‘Sa hatala.’”
²⁴ Hwena Farisikam de zini kim kirekam nasalbiridak, ki zep ding nulzimk, “Kirekam hom. Zebe hap mes dowal mo kigi sosonna golblaka– dekam de aha dowal-dowalsa golealsa sone gwen hap denaye.”
²⁵ Hwena Yesus man zeno mae mo enlalana insa tame tazimki, zep gubiridaka, “Aha-ere irik gin nik de hlik-hlik gweꞌanam, zen de eeijaꞌanam, zen molya etatete gweꞌanam. Nabakam maka zenaka timbwas nuꞌin. Hen zenaka de gil-gil gwibiridan nakon de aha-ere golak dinik hliweꞌanam, zen maka hendep sekwak gweꞌan.
²⁶ Zep hen kirekam– dowal mo kigi mo irik gin niye: Aha hlikna bejen aha hlik naka golealsa sonen. Zep man dam gwesinin: Dowal mo kigi bejen abe hap sosonna golblan– dekam de zere mo irik ginnik de wenyaka karek tabin hipye. Ki hwena zeno irik ginni in de hlik-hlik gwenkam, bejen tatete gwen, hwena nabakam sa timbwas gwer.
²⁷ Zep em insa Asa anakan enblal, ‘Zen dowal mo kigi sosonna golblaka, dekam zep dowal-dowala golealsa sone gweꞌara,’ ki hwena em ema dekam ere mae mo aha hlikna enbiridaꞌan, ‘Zen hen dowal mo sosonkam syal taꞌan.’ Sap zen hen man nakasik gwibirin– dekam de dowal-dowalsa golealsa sone gwibin hipye. Zep ere mae mo ahakorena in maka emsa anakan nenbiridaꞌan, ‘Em ema ekarek gwer– kirekam de Yesussu tonblankamye.’
²⁸ Hwena Ëe Alap mo Enho mo sosonkame dowal-dowala golealsa sone gwenan. Zen dekon zep anakan dam gwesiꞌin, ‘Alap Zen de irik gilzin hap angkam man sap kon gwisibir hanaꞌara, hwena em ema desan de ang tan hap baes taꞌan!’
²⁹ Sap Ëe dowal mo kigi mo bi gwibin kire-kire dawemsae jal zi mo kim alal ta gweblaꞌan. Zi jal-jal de zere mo golsa kara taꞌanam, zebe hap de jal zini na-en molya tiꞌin zanam. Diki zini insa de nonol balk tankam hen tahalenkam, dekam zeno kire-kirena maka alal tablaꞌara.
³⁰ “Zini men zen Abon onakon sren gwe hanna, zen ki Asa husus gweblaꞌara. Hen zini men zen Asa mas gweblan sremna, zen ki ano syalsa dri yuꞌura.
³¹ Zen in zebe emsa gubiridaꞌan: Tingare nwe-masekam de karek-karekna mensa zini em ulin halasen gwenan– hen sap Alapsa de lamang tanna, desa maka Zena tap gulsuk gwizimꞌira. Hwena zere mo Enhosa de lamang tankam, desa molya tangan tap gulsuzimki.
³² Hen ngatan zi mo lang nakore Zi Tanganna Asa de ol lamangkam gublunkam, desa maka Alap tap gulsuk gwizimꞌira. Hwena Alap mo Enhosa de lamang tankam, desa Alap molya tangan tap gulsuzimki– sap angkam de okamanak awe, hen sap lamkam de okama esenak.
³³ “Nen tenya ten nakone tame ul gwenan. Tenya men zeno dan naka zini dwinbir srem gwe-gwenan, zen bejen twin gwibin tetan dankam ten. Tenya zen zere mo dan enkam ete gwenan.
³⁴ Zep Farisikam de zini, em hen kirekam. Em in jal-jal tanganna– wanyana kiye! Zep eno mae mo ol toranna banakan dep? – dawem gwen naye. Men zen eno mae mo ek tihi nakon wet so gwenan, zen zen eno mae mo enhonak suwek.
³⁵ Enho dawem-dawem wenya, zeno mae mo ek tihi nakon dawem en nik wet so gwizimnin, sap zeno mae mo enhona mes dawem enlala enkam suweka. Hwena enlala jal-jal wenya, zeno mae mo ek tihi nakon karek en nik zep wet so gwizimnin, sap zeno mae mo enhona mes jal-jal enlala enkam suweka.
³⁶ Zep emki eenlala gwen: Aumwa hap de yakla yawalak de Alap zisi klis gunnuk, tingare zini zen zere mae mo ol toran nakon sa Alap klis gulu– sap zeno mae mo aha zisi de tonsubirida gwen ol maena hendep kitak.
³⁷ Sap dekam ere mae mo ol toran nakon sa Alap anakan klis gul gwera, ‘Zini an karekna,’ ahaksa, ‘An airis.’”
³⁸ Zao kim lwa seꞌak, dekam zep Musa mo olsa de tawa ta gwibin hip de zi niban Farisikam de zi niban Yesussu abe dak, “Bian guru, emki abe mae hap owassa syal gwibir-zimdin– ee akakim emsa anakan dam lasik, ‘An eiwa Alap zer soneka.’”
³⁹ Hwena Yesus ki zep ding gulzimki, “Em angkam de zini eiwa jal-jal tanganna, hen Alapsa mese hli lak, hwena Asae aberbe la gweꞌan– owassa de ebe mae hap syal gwibir-zimdin hipye! Ëe angkam aha-en mae molye owasna ep syal gwibir-zimk. Hwena ngein sin de yaklanak Ëe asa owasna aha-en tangan ep syal gwibir-zim– men kirekam Alap mo ol ayang gul gwen zini Yunus Bak hon lwakke.
⁴⁰ Men kirekam Yunus Bak hogwe yawal ungala mwanak yaklana dan-ahan gweka, zen kirekam sa ngatan zi mo lang nakore Zi Tanganna Abon lwal. Ëe hwena kama mwanak asa yaklana dan-ahan gweon.
⁴¹ Alap de angkam de zini emsa klis gunnuk, dekam Niniwek de zi mo angna sa olsa de mas gun hup ezaul. Zen dekam sa emsa anakan swre dabir, ‘Yunus Bak kim ehalen hap de ola ban golhata zaka, ee dekam ama ehalek. Hwena ebon mae onak kim ngatan zi mo lang nakore Zi Tanganna ehalen hap de ola ban golhata zaka, em hwena ema ehalen hap baes ta gwek.’
⁴² Hen kirekam, Alap de emsa klis gunnuk, selatan kore teipsinkim de wenya in, zen sa hen olsa de mas gun hup zaul– men zen orep teipsin zini Salomo Baksa duwebla zakke. Zen dekam sa anakan emsa swre tabir, ‘Ëe ama langa en nakon Salomo mo enlala blala kore olsa de sane gwen hap hatak. Hwena ebon mae onak kim ngatan zi mo lang nakore Zi Tanganna hataka, em hwena ema asalsik gweblak.’”
⁴³ “Dowal de totoresa zi nikon wet sonna, dekam gwana-gwana san sa hakalada gwera– zao de aha zi maenak tin hip. Hwena aha maenak de tin sremkam,
⁴⁴ dekam sa dowala in enlala gwera, ‘Ëe asa etan ere mo gol hli tan san dep lwahal.’ Kim de lwa haꞌan zaka, gola insa anakan sa hla ta zala, ‘Dan en tangan nik zauꞌura. Gol bina in mes tangan oto tasiki hen ngan tasiki.’
⁴⁵ Dekam sa dowala in song gwera– aha dowalsa de zere onakon de jal-jal taman kinin tangan naka tuju enkam kwang guluda halzan hap. Deban kim de zini iwe golebiti gweꞌan zaka, zini in mo gwenna dekam sa tangan karek gweblal– nonol gwen nakonye. Zen hen kirekam zep angkam de zini eno mae mo jal-jala lwa gweꞌan!”
⁴⁶ Yesus kim nama zi trana in han goletonꞌanka, an zem dekam zep oso wal zeban goleyaing gwezak. Zen e nakon ezauꞌuk. Man kon olsa de zertoran hap nesblaꞌak.
⁴⁷ In deban mae goletonꞌanka ahanik zep gubluka, “Bian, emsa man eno anena oso wal oban e nakon ziesblaꞌanon– olsa de emsa zertoran hap.”
⁴⁸ Yesus ki zep ding gulbluka, “Hwena nonol Ëe anik emsa gubiridak– ano anena hen oso-walya, zen diki a kirekam de zisi moye:”
⁴⁹ Hwena ki zep tahakam zere hon de ang ta gwen wenya asa zi beyana in han goletreka, deban guku, “Diki an zen lowe heꞌan, zen zen– ano anena hen oso walyaye!
⁵⁰ Sap tingan men zen ano ngatan zi mo langnak de Bian mo dwam gwibin sin ang ta gwenan, zen diki zen tangan– ano anena, oso walya hen somol walyaye.”