Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kaisar Tiberius be akarijo titive no munijo Roma rai ama tume abusyinara eane radani, umba Amisye po raura Zakaria apa kavo Yohanes Pembaptis ai no nugo vabukane vono maninimbe. Arono naije, Pontius Pilatus be gubernurive no munijo Yudea, muno Herodes be akarive no munijo Galilea, muno Herodes apa arakovo Pilipus be akarive no munijo Iturea muno munijo Trakonitis, muno Lisanias be akarive no Abilene. Muno Hanasa pe Kayapasa pe ibe syeno titive vatano Yahudi mansai.
2 (3:1)
3 Arono naije Yohanes Pembaptis siso no mana Yordan ama varodore rai tenambe. Po ayao Amisye raura pare, “Wasakinav irati wapa ayao kakaije rai muno wade ramu syo wasaugasyo kuvuni mana rai indamu Amisye po wapa ayao kakaije rapaya wasai.”
4 Maisyare muno anawae Yesaya po ratoe no apa bukuge rai wemaisy pare: “Vatane inta ugwaimbe no nugo vabukane vono maninimbe pare, ‘Wapo unanuije ratayao irati Amisye ai, wapo ratayao da nsarokir inda panya rai.
5 Kambibive ratutun da mavae, unate muno papukame rakaro da majea mavae. Unanuijo nanto nande rarae nsarokibe, muno unanuijo sakanate rayare da ngkakavin.
6 Indati vatano mine tename so wo raen, ware Amisye po vatane mapaya ayao kakaije rai.’”
7 Vatane wanui ude Yohanes ai, ubeker indamu po maugasyo kuvuni mana rai. Weramu po raura mai pare, “Weapamo vatano mamun maisyare tawae mamunoe! Wabeanimaibe wade no so? Wapo rakarae wapare syo wasaugasya kuvuni mana rai, wea indati wanajivo Amisye apa pari mangke makare akatoe rai. Weramu wapa ana wapo ratantona mamaisye ramu.
8 Syare wasakinavo wapa ayao kakaije rai rati, umba ana ngkove obo mi wapo rarijat, wea umba mamaisy. Weramu vemo wasararin wapare, ‘Abraham opamo wama anena pije, ti munije ama akari indati Amisye po mangke raugaje wansai jewen,’ wemai nora! Syo raura wasai: Amisye pamo bambunin po orame wato ranigwan ube vatanbe ti Abraham apa ajavi waino mai, yara Po wasatugaro marambe.
9 Apa mangke po ratayao vatane mai mamo mararai kobe to. Omamo raurata irati Apa tama mawes, pare Po inyoe rate no ama ruke rai. Weti inyowo rui mirati mo mano kove rauguje ramu, weamo tama veano rate ti ramaugasyo taname rai.”
10 Umba vatane wo Yohanes anajo ware, “Weti animaisye mirati nyare reamo rave?”
11 Yohanes Pembaptis po raura akananto mai pare, “Are pirati apave ansune jiruma rai, weamo po inta raunanto vatano apa ansune meweno aije inta ai. Are pirati apave anaisye inta rai, weamo po inta raunanto vatano apa anaisye meweno aije inta ai tavon.”
12 Umba vatano wo pajak ranugande pemerinta aije inta ude no Yohanes Pembaptisa nui indamu po maugasyo kuvuni mana rai. Umba wo anajo ware, “Injayo Kurune, animaisye mirati nyare reamo rave?”
13 Umba Yohanes po raura akananto mai pare, “Wapo doije ranugande pemerinta ai mamaisyo po rapatimuge obo rai. Yara vemo taune wapo nake inta raijanande tavon, nseo mo rapatimu to rakivan nora.”
14 Umba naite inta ude wo anajo ware, “Maisyare omai ti, reamamo animaisye mirati reamo rave?” Umba po raura akananto mai pare, “Vemo wapo vatane mantitidi indamu wo doije raunande wasai jinya, muno vemo wapangkarive wapo rangkivano vatane mai jinya. Muno vemo wapo nuge rapanan inya, yara wapare doijo pemerinta po rave wasavae mamo mamaisy.”
15 Naije vatano wanuije umaso wo ratantona no manuga ware, “Yohanes Pembaptis sopamo Mesias wamo anyubeye opije dako?”
16 Weramu Yohanes Pembaptis po raura akananto mansai tenambe pare, “Syo wasaugasyo kuvuni mana rai. Yara indati Vatane inta de opamo panakoe irati inakivan, weti Apa waijo nowo ajo kokome raije mamo syo rapaya kakai weye risyamo imamaisye ramu. Indati Opamo po wasaugasya kuvuni mana rai jewen, yara Po Anawayo Vambunine ratutir maje wasai muno taname ntavon.
17 Opamo aurata irati vatano po bayaije raijar no anem, po veano gandume rarayan bintabo. Po ama ine ranugan siso tuna no apa yavare rai, yara po ama kea ramero tanamo nen tutire rai.”
18 Maisyare omaisy, Yohanes Pembaptis po Ayao Kovo Amisye raura muno po ananyao kotare raura vatane mai.
19 Umba Yohanes po Herodes, opamo be akarive no munijo Galilea, apa ayao kakaije raura kakavimbe nanto ai, weye Herodes po apa arakovo Pilipus apa anamu Herodias raovan to muno apa ayao kakai kaijinta manui.
20 Umba po ayao kakaije so raijanande tavon: omamo po Yohanes ausiso makova no tanoano makova rai. Maisyare omai ti, Herodes no tawan no apa ayao kakaije umawe rai ti miridije nseo tutir.
21 Arono Yohanes Pembaptis po vatano wanuije maugasyo kuvuni mana rai, umba Yesus de, Yohanes po augasyo kuvuni tavon. Yesus be sambayambe, umba naume nsaneka
22 ti Anawayo Vambunine maje Ai maisyare insanijo punamoe. Naije danito Po Amisye anamote ranaun, ngkinde no no munijo ntiti mare, “Winyamo Sya Arikainyo inanuga no Nai. Inanayanambe Nai rave.”
23 Arono Yesus po apa anakere raijar, weamo Apa tume nanto no tenamara eane abusyin. Vatane wo ratantona ware Opamo Yusup apa kavo pije. Yusup umaso opamo Eli apa kavo pije.
24 Eli opamo Matat apa kavo pije. Matat opamo Lewi apa kavo pije. Lewi opamo Malki apa kavo pije. Malki opamo Yanai apa kavo pije. Yanai opamo Yusup apa kavo pije.
25 Yusup opamo Matika apa kavo pije. Matika opamo Amos apa kavo pije. Amos opamo Nahum apa kavo pije. Nahum opamo Hesli apa kavo pije. Hesli opamo Nagai apa kavo pije.
26 Nagai opamo Maat apa kavo pije. Maat opamo Matika apa kavo pije. Matika opamo Simei apa kavo pije. Simei opamo Yosek apa kavo pije. Yosek opamo Yoda apa kavo pije.
27 Yoda opamo Yohanan apa kavo pije. Yohanan opamo Resa apa kavo pije. Resa opamo Zerubabel apa kavo pije. Zerubabel opamo Seatiel apa kavo pije. Seatiel opamo Neri apa kavo pije.
28 Neri opamo Malki apa kavo pije. Malki opamo Adi apa kavo pije. Adi opamo Kosam apa kavo pije. Kosam opamo Elmadam apa kavo pije. Elmadam opamo Er apa kavo pije.
29 Er opamo Yesua apa kavo pije. Yesua opamo Eliezer apa kavo pije. Eliezer opamo Yorim apa kavo pije. Yorim opamo Matat apa kavo pije. Matat opamo Lewi apa kavo pije.
30 Lewi opamo Simeon apa kavo pije. Simeon opamo Yehuda apa kavo pije. Yehuda opamo Yusup apa kavo pije. Yusup opamo Yonam apa kavo pije. Yonam opamo Eliakim apa kavo pije.
31 Eliakim opamo Melea apa kavo pije. Melea opamo Mina apa kavo pije. Mina opamo Matata apa kavo pije. Matata opamo Natan apa kavo pije. Natan opamo Daud apa kavo pije.
32 Daud opamo Isai apa kavo pije. Isai opamo Obed apa kavo pije. Obed opamo Boas apa kavo pije. Boas opamo Salmon apa kavo pije. Salmon opamo Nahason apa kavo pije.
33 Nahason opamo Aminadab apa kavo pije. Aminadab opamo Admin apa kavo pije. Admin opamo Arni apa kavo pije. Arni opamo Hezron apa kavo pije. Hezron opamo Peres apa kavo pije. Peres opamo Yehuda apa kavo pije.
34 Yehuda opamo Yakob apa kavo pije. Yakob opamo Isak apa kavo pije. Isak opamo Abraham apa kavo pije. Abraham opamo Tera apa kavo pije. Tera opamo Nahor apa kavo pije.
35 Nahor opamo Seruk apa kavo pije. Seruk opamo Rehu apa kavo pije. Rehu opamo Peleg apa kavo pije. Peleg opamo Eber apa kavo pije. Eber opamo Salmon apa kavo pije.
36 Salmon opamo Kenan apa kavo pije. Kenan opamo Arpaksad apa kavo pije. Arpaksad opamo Sem apa kavo pije. Sem opamo Noak apa kavo pije. Noak opamo Lamek apa kavo pije.
37 Lamek opamo Metusala apa kavo pije. Metusala opamo Henok apa kavo pije. Henok opamo Yared apa kavo pije. Yared opamo Mahalalel apa kavo pije. Mahalalel opamo Kenan apa kavo pije.
38 Kenan opamo Enos apa kavo pije. Enos opamo Set apa kavo pije. Set opamo Adam apa kavo pije. Adam opamo Amisye apa kavo pije.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA