Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq taun kelime olas pemrẽntahan Kaisar Tiberius, Pontius Pilatus jari gubernur lẽq Yudea, dait Herodes mrẽntah lẽq Galilea, Pilipus semetonne Herodes mrẽntah lẽq wilayah Iturea dait lẽq Trakonitis, dait Lisanias mrẽntah lẽq Abilene.

² Saq jari imam-imam agung, Hanas dait Kayapas. Lẽq taun nike Allah bemanik tipaq Yahya, bije Zakaria lẽq padang gurun.

³ Make Yahya lumbar ojok selapuq daẽrah Kokoq Yordan dait nyampẽang berite lẽman Allah. Yahya behotbah, "Pade tobat lẽman dose-dosende, dait side harus tebaptis, adẽq Allah ngampunin side."

⁴ Nike sesuai maraq saq tetulis lẽq dalem kitab Nabi Yesaya: "Araq dengan bekuih-kuih lẽq padang gurun, 'Pade siepang langan umaq Tuhan, rateang langan umaq Ie.

⁵ Sembilang tembẽrẽng gen teuruk, sebilang gunung dait bukit terateang. Langan saq bẽngkok-bẽngkok gen telomboqang, dait langan saq lekok-lekok terateang.

⁶ Dengan-dengan lẽq seantẽro dunie gen serioq keselametan saq lẽman Allah!'"

⁷ Luwẽq dengan dateng ojok Yahya jari tebaptis. Yahya bebase lẽq ie pade, "Side dengan jahat! Sai saq badaq bahwe side bau selamet lẽman hukuman Allah saq gen dateng?

⁸ Nyatayang siq perbuatande bahwe side sampun betobat lẽman dose-dosende! Ndaq bebase dalem angende bahwe Ibrahim nike bapaq tiang pade. Tiang badaq side: Lẽman batu-batu niki ẽndah Allah sanggup miaqang Ibrahim keturunan.

⁹ Kandik sampun tesadangang jari ngerebaq lolo jangke akah-akahne. Sebilang lolo saq ndẽq ngasilang buaq saq solah gen terebaq dait tetetẽh ojok dalem api!"

¹⁰ Dengan-dengan nike beketuan lẽq Yahya, "Jari, napi saq harus tiang pade piaq?"

¹¹ Jawab Yahya, "Dengan saq bedowẽ due kelambi, harus ngebẽng sopoq tipaq dengan saq ndẽq bedowẽ; dait dengan saq bedowẽ keloran, gawẽq maraq nike ẽndah."

¹² Penagih-penagih pajek ẽndah dateng ojok Yahya jari tebaptis. Ie pade beketuan, "Bapaq Guru, napi saq harus tiang pade piaq?"

¹³ Jawab Yahya, "Ndaq nagih luwẽqan lẽman napi saq sampun tetentuang."

¹⁴ Araq ẽndah prajurit saq beketuan, "Berembẽ lẽq tiang pade? Napi saq harus tiang pade piaq?" Jawab Yahya, "Ndaq peres sai juaq dait ndaq ngerampas kẽpẽng kadu tuduhan-tuduhan palsu. Cukupang diriqde siq gajinde!"

¹⁵ Waktu nike, dengan-dengan mulai beketuan-tuan, napi Yahya nike Almasih saq ie pade antih.

¹⁶ Keranaq nike Yahya bebase lẽq ie pade selapuq, "Tiang baptis side kadu aiq, laguq laun gen rauh Dengan saq belẽqan kuasene lẽman tiang. Jari lekaq tali sepatu-Ne doang tiang ndẽq patut. Ie gen baptis side kadu Roh Suci dait api.

¹⁷ Lẽq gading-Ne araq klẽong jari nampiq selapuq gandum jangke bersi. Selapuq gandumne gen tekumpulang lẽq dalem lumbung, laguq selapuq gambasne gen Ie tunuq lẽq api saq ndẽq iniq pedaq!"

¹⁸ Siq luwẽq nasẽhat lain Yahya beriteang Kabar Solah tipaq dengan luwẽq.

¹⁹ Laguq Herodes, penguase Galilea, teperinget siq Yahya, lantaran Herodes merariq kance Herodias, sebiniq sanakne, dait mengenai selapuq kejahatan lain saq sampun ie piaq.

²⁰ Laguq Herodes malahan ngeromboq kejahatan-kejahatanne, ie tamaq Yahya ojok dalem bui.

²¹ Sesampun selapuq dengan nike tebaptis, Deside Isa ẽndah tebaptis. Dait sewaktu Deside Isa kenyeke bedo'e, langit kebukaq,

²² dait Roh Suci turun ojok atas-Ne maraq ruen kedit dare. Dait kedengahan suare lẽman langit, "Side Bije Tiang saq Tiang kasihin. Side nyenengang Tiang."

²³ Lẽq waktu Deside Isa mulai karye-Ne, Ie beumur kire-kire telung dase taun. Menurut pendapet dengan, Ie bijene Yusup, Yusup bijene Eli,

²⁴ Eli bijene Matat, Matat bijene Lewi, Lewi bijene Malki, Malki bijene Yanai, Yanai bijene Yusup,

²⁵ Yusup bijene Matica, Matica bijene Amos, Amos bijene Nahum, Nahum bijene Hesli, Hesli bijene Nagai,

²⁶ Nagai bijene Maat, Maat bijene Matica, Matica bijene Simei, Simei bijene Yosek, Yosek bijene Yoda,

²⁷ Yoda bijene Yohanan, Yohanan bijene Resa, Resa bijene Zerubabel, Zerubabel bijene Sealtiel, Sealtiel bijene Neri,

²⁸ Neri bijene Malki, Malki bijene Adi, Adi bijene Kosam, Kosam bijene Elmadam, Elmadam bijene Er,

²⁹ Er bijene Yesua, Yesua bijene Eliezer, Eliezer bijene Yorim, Yorim bijene Matat, Matat bijene Lewi,

³⁰ Lewi bijene Simeon, Simeon bijene Yehuda, Yehuda bijene Yusup, Yusup bijene Yonam, Yonam bijene Elyakim,

³¹ Elyakim bijene Melea, Melea bijene Mina, Mina bijene Matata, Matata bijene Natan, Natan bijene Daud,

³² Daud bijene Isai, Isai bijene Obed, Obed bijene Boas, Boas bijene Salmon, Salmon bijene Nahason,

³³ Nahason bijene Aminadab, Aminadab bijene Admin, Admin bijene Arni, Arni bijene Hezron, Hezron bijene Perez, Perez bijene Yehuda,

³⁴ Yehuda bijene Yakub, Yakub bijene Ishak, Ishak bijene Ibrahim, Ibrahim bijene Terah, Terah bijene Nahor,

³⁵ Nahor bijene Serug, Serug bijene Rehu, Rehu bijene Peleg, Peleg bijene Eber, Eber bijene Salmon,

³⁶ Salmon bijene Kenan, Kenan bijene Arpaksad, Arpaksad bijene Sem, Sem bijene Nuh, Nuh bijene Lamek,

³⁷ Lamek bijene Metusalah, Metusalah bijene Henok, Henok bijene Yared, Yared bijene Mahalaleel, Mahalaleel bijene Kenan,

³⁸ Kenan bijene Enos, Enos bijene Set, Set bijene Adam, Adam manusie penembẽq saq tecipteang siq Allah.

Lukas

Video Lukas 3

Ikuti Kami:

KONTAK | PARTISIPASI | DONASI