Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ralo yakama me bee oro fae reufi mbai bele (15) meujeuboke Kaisar Tiberius meungekeukoke. Nebei hee yae Yudea kani naei Ondofolore Pontius Pilatus yae hebewole, Herodes yae Galilea kanire. Iturea bele Trakonitis bele kanire wa Herodes naka baeke Filipus yae, Abilene kanire Lisanias yae ikileuboke.
2 Imam-imam naei kaban sele Hanasle Kayafasle hebewote. Ralo yakama yae Zakhariale fa Yohanes a kala-kalane nekewole yae Allah a meke uwounge.
3 Yohanes Yordan Wi kelaeunga kanine meke nekewole, ro miyaere Allahle a huwoumi weumi, “Mai beko bakora nulu kenayembe, kelemmibombe naeise bu konayembe, Allah mai beko bakora faeinyenengkombe.”
4 Yendo kayaalo Yesaya Yohanesle naeise nda wanen moloukoke, “Ro mbai a kala-kalane ekekaenele, ‘Tuhanbe nibi a hiyei ranennebo. Kalo-kalo ran-dan ijen alommi.
5 Moko faufe mokonnele, nibi yeli-yeli yo alommile, eleiso akoibore honate nibi ro hiyei ranen.
6 Allah ro miyaere hole molommibonde nibire nda kanina kelana ro miyae nemene na ijoko yae erenate.’”
7 Ro miyae Yohanes bure kommilere nekai mewate nebeibe Yohanes yae weumi, “Nda ro miyae mewaube rami orona mena wanen. Nde yae angkaa yobombokembene Allahlena ehee bukulu menensayembera henensombe.
8 Mayae na hele bekora nulure kembokembe naeise kelemmilere u mekai foi mokombe. Mayae Abrahambe orona menane wali hena bona yarongkombe naeise u benera enekemmae, rabuhine ban nda rukara Allah na hului Abrahambe orona menare mokongkonde!
9 Rame kahu relahi mokainyehake o na kambura kahenate onatere. Nane merau Allah relahi mokoungehake ani foise omokoi yo kahenate i ranne mo hainyate.”
10 Nebei ro miyae yae Yohanesre hinainye, “Nebei uwana rahebe meyae mokomabonde?”
11 Nebeinye Yohanes yae weumi, “Nde na malo beena, ro miyae malo ban kate yore hakommile. Nane merau nde raman belena, ro miyae hiwa raman ban yore hakommile.”
12 Pajakre arileyate yo bele Yohanes bure kommilere mekate mo, wainye, “Guru, rahebe meyae mokomabonde?”
13 Nebeibe Yohanes yae weumi, “Mare ukayembe hului yae mo pajak riyemmiyembe, mai kenana hului bele yae eriyeijae.”
14 Nane merau felayona ro hiwa mekate hinainye, “Meyae bae rahebe mokomabonde?” Nebeibe Yohanes yae weumi, “Ro naei miyae naei roi na mera einukeijae hele, ro miyae naei ro nendon naise eiseijae. Wali waei roi buna yae nekewende.”
15 Nda a weumikoke heera ro miyae na kena ura elate, “Nauwae nda Yohanes nebei Wali Ondofolo rakeimeyannele Kiyae niyae era?”
16 Nebeibe Yohanes yae weumi, “Reyae mare bu yae kamale. Nekemakonde mo, Ro hi ro bele Kiyae mende. Naei oro mehau ha kulaiboise reyae na hului ban, rabuhine ban Naei bene reyae ro ban sele. Reyae mare bu yae kamale wanen Neyae mende mare Allahle Roh bele, i bele yae konembe.
17 Neyae ro miyae kayee memmimolonde. Nare hila rabore halaeinye yo yawemmibonde Nangkele mbainye nekenate. Naei are moise haiwate yo yarongkonde hekelengkonde ralone yakamane italo ranne enaibende.”
18 Mehi mehi yae Yohanes ro miyaere a usaei uwoumi, a foi faeu foi huwoumi.
19 Nebei hee Herodes Galilea kani naei Ondofolo, na aka baekele miyae na ro Herodiasbe roukene nane merau na me hilae u hilae hiwa nekai mokowolene, Yohanes yae a usaei wasaei a elae yae horoungeboke.
20 Herodes naei me u beko benen elaeibo-elaeibo hele kowolene, Yohanesre kawane heungekoke.
21 Yohanes namman Herodes yae kawane eheikoi hee yae, ro miyae hiware bu kowoumi hee nane merau Yesusre koungeboke. Nebeisa Yesus Naekore ebeline bowounge mo, yaku uke raweukoke,
22 Allahle Roh yakura aye merpati wanen mae Naei uwa rande owole nane merau a yakura weunge, “Weyae Raei kenare kawale Kelu, Weyae Raei kenare foi mokoyarae.”
23 Yesus na ralo yakama ro rele u mbai u hine me bee bele (30) hului yae, na kalia huba raweuboke. Ro miyae yae na kena u eisa bae elewate Yesus Yusufle kelu. Yusuf Elile kelu,
24 Eli Matatle kelu, Matat Lewile kelu, Lewi Malkhile kelu, Malkhi Yanaite kelu, Yanai Yusufle kelu,
25 Yusuf Maticale kelu, Matica Amosle kelu, Amos Nahumbe kelu, Nahum Heslile kelu, Hesli Nagaite kelu,
26 Nagai Maatle kelu, Maat Maticale kelu, Matica Simeite kelu, Simei Yosekhle kelu, Yosekh Yodale kelu,
27 Yoda Yohananle kelu, Yohanan Resale kelu, Resa Zerubabelle kelu, Zerubabel Sealtielle kelu, Sealtiel Nerite kelu,
28 Neri Malkhile kelu, Malkhi Adile kelu, Adi Kosamle kelu, Kosam Elmadamle kelu, Elmadam Erle kelu
29 Er Yesuale kelu, Yesua Eliezerle kelu, Eliezer Yorimbe kelu, Yorim Matatle kelu, Matat Lewile kelu,
30 Lewi Simeonbe kelu, Simeon Yehudale kelu, Yehuda Yusufle kelu, Yusuf Yonambe kelu, Yonam Elyakimbe kelu,
31 Elyakim Meleale kelu, Melea Minale kelu, Mina Matatale kelu, Matata Natanbe kelu, Natan Daudle kelu,
32 Daud Isaite kelu, Isai Obedle kelu, Obed Boasle kelu, Boas Salmonbe kelu, Salmon Nahasonbe kelu,
33 Nahason Aminadable kelu, Aminadab Adminbe kelu, Admin Arnile kelu, Arni Hezronbe kelu, Hezron Peresle kelu, Peres Yehudale kelu,
34 Yehuda Yakuble kelu, Yakub Ishakle kelu, Ishak Abrahambe kelu, Abraham Terahle kelu, Terah Nahorle kelu,
35 Nahor Serugle kelu, Serug Rehule kelu, Rehu Pelegle kelu, Peleg Eberle kelu, Eber Salmonbe kelu,
36 Salmon Kenanbe kelu, Kenan Arpakhsadle kelu, Arpakhsad Sembe kelu, Sem Nuhle kelu, Nuh Lamekhle kelu,
37 Lamekh Metusalahle kelu, Metusalah Henokhle kelu, Henokh Yaredle kelu, Yared Mahalaleelle kelu, Mahalaleel Kenanbe kelu,
38 Kenan Enosle kelu, Enos Setle kelu, Set Adambe kelu, Adam Allahle kelu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA