Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali tempo etu i Kaisar Tiberius maporenta nja’u Roma. Wali ojo kagananya sampuyu pei lima nto’u kasaenya ia maporenta, tempo etu i Pontius Pilatus semo gubernur ri propinsi Yudea. Pasi tempo etu i Herodes semo makole nja’u propinsi Galilea pasi a’inya, i Pilipus, ia makole nja’u lipu to rato’oka Iturea pasi Trakhonitis. Panewa re’e seja i Lisanias to makole nja’u Abilene.
2 Pasi tempo etu i Hanas sira dua i Kayapas semo to mawali kepala nto pampue to bae angganya. Wali tempo etu semo i Yohanes, ana i nSakharia, maroo-roo nja’u pada bone. Tempo ia nja’u ria i Pue Allah mampotuunaka resi ia manganto’oka ia yau mampakarebaka resi tau tuntuNya.
3 See naka ia yau njo’u samparia lipu to ri awe ngkoro Yordan. Ia mampakarebaka resi tau, manganto’o, “Pojeamo see i Pue Allah damangalapa dosa ngkomi. Panewa rabaptis see palaong etu damawali tondong to mampaponsanika tau boros komi roomo majea.”
4 Wali palaong to etu singkonong kojo pei gombo to ratulis nja’u buku to natulis i Yesaya tempo owi. Gombo etu mangkonong i Yohanes semo, to’onya, “Re’e tau maroso loonya mampogomboka tau boros nja’u pada bone, ia manganto’oka tau etu, ‘Tamo masae i Pue darata. Wali see naka ewa naika ntau mampasilongaka yami i makole jaya see taa masuli palinjanya, ewa wetu seja nika ngkomi mampasilonga raya ngkomi damangaya i Pue.
5 Ane dama’i makole, tau mampasilonga yami jaya to danalinjak makole etu, wali samparia lemba to nja’u jaya etu ratampok yau pasi samparia tongku pasi pantana rapakalempe. Jaya to maneo rapakanoto pasi jaya to taa lempe rapakalempe. Wali ewa naika ntau mangkariang samparia to damangantalas palinja i makole etu, ewa wetu seja danuika mampasilonga ruyu raya ngkomi damangaya i Pue
6 see samparia to lino damangkita ewa wimba danaika i mPue Allah mampalaes tau.’” Wali etu semo gombo i Yesaya tempo owi mangkonong palaong i Yohanes.
7 Wali boros tau to mangampago i Yohanes see ia damangabaptis sira. Pei i Yohanes mangansani taa samparia sira to monso pu’u majea, see naka ia manganto’oka tau etu, to’onya, “Gete, komi ewa ule to mampeyaa mampiyaika apu nja’u pada! Wimba, komi bara mampobuuka ane ma’i darabaptis, ane ewa see komi maya mampiyaika huku to danaporata i mPue Allah? Gete, taa mawali ewa wetu, apa ane ojo gombo ngkomi to manoto, nempo roomo rabaptis pei komi tiroo damangarata huku nu dosa ngkomi.
8 Pei ane monso pu’u komi majeamo yako ri dosamu, ika lengko to masipato naika ntau to majeamo. Pasi ne’e mampobuuka, ‘Kami taa darahuku apa kami wiyaa i Abraham.’ Ne’e mampobuuka ewa see apa ane naporoe, i Pue Allah nakoto mampakaja’aka yau komi panewa mangawali yau watu mayunu si’i damawali wo’u tau to wiyaa i Abraham damangabolos komi.
9 Wali huku i mPue Allah resi komi maya raporapaka ewa wase to raokotaka damangantowo yau kaju. Wali samparia kaju to taa mampowuaka wua to matao, kaju etu daratowo yau pei darapanasok yau la’u apu.” Etu semo rapa to nato’oka i Yohanes sira.
10 Wali tempo tau boros mangandonge gombo i Yohanes etu, sira mampotanaka, sira manganto’o, “Ane ewa see, kesaa to danaika mami damampakanasa kami monso pu’u majeamo?”
11 Panewa i Yohanes manganto’oka sira, “Ewa si’i danuika ngkomi. Ane tau to dua bajunya, waika yau samba’a resi tau to tare bajunya. Pasi ewa see seja tau to re’e pangkoni, tila yau resi tau to tare pangkoninya.” Etu semo pasono i Yohanes.
12 Wali ma’i seja tau to pantagi asele, ma’i danabaptis i Yohanes. Sira mampotanaka resi ia, sira manganto’o, “Pa’a Guru, kesaa danaika mami damampakanasa kami monso pu’u majeamo?”
13 I Yohanes mangansono, to’onya, “Tempo komi mangantagi asele, ne’e mangoko yabi to nato’oka mpomarenta komi mangoko.”
14 Pasi re’e seja bara sawei mba’a tentara to mampotanaka seja resi i Yohanes, sira manganto’o seja, “Kesaa danaika mami?” Wali i Yohanes manganto’oka sira, “Ne’e mangarai tau see sira damangawaika komi doi, pasi ne’e seja mawuti mampakasala sa’e. Pasi pakasanang raya ngkomi resi saro to nawaika mpomarenta komi.”
15 Wali tau boros to mangandonge gombo i Yohanes bae pansarumaka nsira mangampeas i Kerisitu, Makole parajanji i mPue Allah. Pasi sira re’e mampobuu-buuka ri rayanya mangkonong i Yohanes, bara ia semo i Kerisitu etu.
16 See naka i Yohanes manganto’oka sira samparia, ia manganto’o, “Aku mangabaptis komi mangika tondong komi majeam. Wali tempo aku mangabaptis komi etu, aku mangampake ue. Pei re’e tau to dama’i wo’u yako aku si’i, Ia semo to bae-bae kuasaNya pei aku. Ia bae kojo anggaNya, see naka aku mangepe aku nempo ojo mangalede so’o nsapatuNya taa masipato. Wali tau to dama’i etu taa damangabaptisika komi ue. Re’e komi to Ia damangabaptisika i Nosa Mapasing batuanginya Ia damampaporoo i Nosa Mapasing ri raya ntau etu. Pei re’e wo’u komi to danabaptisika apu batuanginya Ia damamposaka tau to etu ri raya nu apu.
17 Wali tau to dama’i etu raporapaka ewa tau to damanapi. DukuNya re’e ri paleNya pasi Ia damangantapis weaNya naka yongo. Panewa weaNya etu Ia damamposaka ri raya ngkonda, pei otanya Ia damamporomung pei mangantunu yau ri apu to tare to maya mangampika.”
18 Wali etu semo gombo i Yohanes resi tau boros mangkonong huku i mPue Allah to darata. Pasi boros wo’u paposia to ia manganto’oka sira.
19 Pei yako etu i Makole Herodes mangantarungku i Yohanes. Naka pei ia mangantarungku i Yohanes apa i Yohanes roomo manganseko ia apa saba ia mangoko yau i Herodias, indo nu ana ntua’inya, i Pilipus. Pasi i Yohanes manganseko seja ia apa saba palaong to yusa to maja’a seja to inikanya.
20 Wali see naka i Herodes mangika palaong to ja’a-ja’a wo’u pei palaong to etu. Etu semo ia mangantarungku yau i Yohanes.
21 Pei tempo i Yohanes tawa ratarungku, tempo tau boros rabaptis, tempo etu i Yesu rabaptis seja. Ojo karoonya i Yesu rabaptis etu Ia makai-kai, pasi tongonya Ia makai-kai yangi tiloka
22 pasi i Nosa Mapasing yako ndate yangi ewa tagou ta’aNya tudu ri wawoNya. Pasi re’e seja loo yako ndate saruga, loo etu manganto’oka i Yesu, to’oNya, “Komi semo AnangKu anu Kuporayang kojo. Aku masanang kojo resi Komi.”
23 Wali i Yesu bara togo mpuyu nto’umo tempo Ia mula mangika palaong to nawaika i mPue Allah Ia. Ia nato’oka ntau Ana i Yusup. Pasi i Yusup etu ia ana i Eli.
24 I Eli etu ia ana i Matat, Matat ia ana i Lewi, Lewi ia ana i Malkhi, Malkhi ia ana i Yanai, Yanai ia ana i Yusup,
25 Yusup etu ia ana i Matica, Matica ia ana i Amos, Amos ia ana i Nahum, Nahum ia ana i Hesli, Hesli ia ana i Nagai,
26 Nagai ia ana i Maat, Maat ia ana i Matica, Matica etu ia ana i Simei, Simei ia ana i Yosekh, Yosekh ia ana i Yoda,
27 Yoda ia ana i Yohanan, Yohanan ia ana i Resa, Resa ia ana i Serubabel, Serubabel ia ana i Sealtiel, Sealtiel ia ana i Neri,
28 Neri ia ana i Malkhi, Malkhi ia ana i Adi, Adi ia ana i Kosam, Kosam ia ana i Elmadam, Elmadam ia ana i Er,
29 Er ia ana i Yesua, Yesua ia ana i Elieser, Elieser ia ana i Yorim, Yorim ia ana i Matat, Matat etu ia ana i Lewi,
30 Lewi etu ia ana i nSimeon, Simeon ia ana i Yehuda, Yehuda ia ana i Yusup, Yusup etu ia ana i Yonam, Yonam ia ana i Elyakim,
31 Elyakim ia ana i Melea, Melea ia ana i Mina, Mina ia ana i Matata, Matata ia ana i Natan, Natan ia ana i Makole Daud,
32 i Makole Daud ia ana i Isai, Isai ia ana i Obed, Obed ia ana i Boas, Boas ia ana i nSalmon, Salmon ia ana i Nahason,
33 Nahason ia ana I Aminadab, Aminadab ia ana i Admin, Admin ia ana i Arni, Arni ia ana i Hesron, Hesron ia ana i mPeres, Peres ia ana i Yehuda,
34 Yehuda etu ia ana i Yakub, Yakub ia ana i Ishak, Ishak ia ana i Abraham, Abraham ia ana i nTerah, Terah ia ana i Nahor,
35 Nahor ia ana i nSerug, Serug ia ana i Rehu, Rehu ia ana i mPeleg, Peleg ia ana i Eber, Eber ia ana i nSalmon,
36 Salmon etu ia ana I ngKenan, Kenan ia ana i Arpakhsad, Arpakhsad ia ana i nSem, Sem ia ana i Nuh, Nuh ia ana i Lamekh,
37 Lamekh ia ana i Metusalah, Metusalah ia ana i Henokh, Henokh ia ana i Yared, Yared ia ana i Mahaleleel, Mahaleleel ia ana i ngKenan,
38 Kenan etu ia ana i Enos, Enos ia ana i nSet, Set ia ana i Adam, pasi Adam ia ana i mPue Allah. Wali etu semo sanga ntau to mawali bue-bue i Yesu yako ri tempo mpamulanya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA