¹ Roma mo teipsin tangan zini Tiberius Bak, zeno irik gin tahunna kim lima-blas gwek, Alap dekam zep syala Yohanis hip wei yul soneblaka. Dekam men zen Roma mo teipsin tangan zini in mo alp nakon irik nik, Pontius Pilatus Bak dekam Yerusalem mo langnak irik gilki, Herodes dekam Galileak irik gilki. Herodes mo ayana Pilipus Bak dekam Itureak hen Trakonitisk irik gilki, hen Lisanias Bak dekam Abilenek irik gilki.
² Alap mo golak de syal tan zi mo teipsinni dekam Hanas han Kayafas han. Hwena dekam zep zi srem langnak Alap mo ola Zakaria mo tanena Yohanis hon hatak.
³ Yohanis dekam zep Alap onakore olkam Yordan mo lang san kitak titi tabir song gweka, “Ere mae mo karek-karek nakon em ehalen. Alap dekam sa eno mae mo karek-karekna tap gulsuzimdi. Em dikim enaka anakan goletren hap, ‘Ëe ama angkam Alapsa ang gweblaꞌan,’ ee ki asa hwena emsa baptis tabir.”
⁴ Yohanis zen orasa de sal tablan hap de zini men zebe hap Yesaya Bak Alap mo olak hamal hap anakan ale gulblukake, “Zini sa zi srem lang nakon taken gwera, ‘Haen, nere mae mo Teipsin Zi hip nen orasa hamal ta gublun! Hen nen dam-dam ta gublun!
⁵ Tingare dwrak-dwraknak kamasa nen bwang gun, hen tingare kwatapna betekna hen yawala nen talen– dekam de sesek gwen hap. Ora gwa-gwana nen dam-dam tasin. Tung-tungna hen nen sesek tandan.
⁶ Tingare auhu-kamanak de zini esa hla lal– Alap onakore emsa de ngaya tabin hip de Zi niye.’”
⁷ Zini beya tangan nik zep Yohanis hon baptis tabin hip yaing gwe-gwek. Hwena Yohanis zao zep gubirida gweka, “Em an gwe makare enlalana! Em ema eenlala gweꞌan, ‘Asa de baptis tankam Alap molya asa karek tabirki.’ Hwena em home ehaleꞌan. Alap mo jala kon molye eheya-hya gwek.
⁸ Zen in zep, em de Alap mo jala insa goltowen srem hap, emsa de baptis tan sremnak em nonol ere mae mo lowehen karekna insa wet gulsun– dekam de emsa anakan tame tabin hip, ‘Zen mes ehaler.’ Em bahem anakan ekil gil gwen, ‘Ëe an Abraham mo auyan-aza nakore nakake. Zep asa molya Alap karek tabirki.’ Sap Alap maka eno mae mo weinak dep kaso-kasona ansa Abraham mo auyan-aza hap yang tabiꞌira.
⁹ Sap Alap mo zer sonen Zini in Zen ano lure nakon hataꞌan zala, Zen mes hlala hohle gulu– dekam de tesya lu ta gwen hapye. Tenya men zen de eini ete srem gweꞌak, desa sa ausu ennak lu tala, hendep ki sa tinsik gwen srem syauk hi-hitinnik yal ta sera.”
¹⁰ Zen hwena man dakensik gweblak, “Ki ee basa asa syal eibir– ee dikim Alap mo jala insa goltowen srem hapye?”
¹¹ Anakan zep ding gul gwizimki, “Eno baju de dan nenna, ahana kip em teisyablan– baju sremna kip. Eno tembane de lwanna, em tahalha wenya kip kae gwebla-zimdin.”
¹² Roma mo irik ginnik dep de pajak te-ala alal ta gwizimdin hip de zini hen man baptis tabin hip yaing gwe-gwezak. Zen man dakensik gweblak, “Bian, ee basa asa syal eibir?”
¹³ Desa man ding gul gwizimki, “Te-alana bahem mamkam alal ta gwizimdin– aha hlik naka dikim ere mae hap kap ta-in gwen hapye. Diki Roma mo teipsin zini men kire enkam de alal ta gwen hap emsa gubiridaka, zen kire enkam em alal ta gwizimdin.”
¹⁴ Jana nabare wenya man hen dakensik gweblak, “Zep abe mae hap hen banakan? Ëe hen banakan asa syal eibir?” Yohanis man ding gul gwizimki, “Em bahem jala ban tik-tik ta gwibin– te-alasa dikim alal tazimdin hipye. Hen anakan bahem gubirida gwen, ‘Ëe asa emsa klak tal’– ep dikim te-alasa zerzimdin hipye. Ere en mo te-alakam em lowehe gwen.”
¹⁵ Yohanis hon de esane gwenkam, zep zenaka nenbirida gweꞌak, “Eiwa, nesa de ngaya tabin hip Dinik bae ki hataꞌan zala! San ha diki an Zen mes yap?”
¹⁶ Hwena ki zep gubiridaka, “Ëe weyakame emsa baptis ta gwibi'in. Hwena abon onakon de Teipsin Zini sa hata zala. Ëe dawem naka hom– dekam de Zebon onak babu gwen mae hapye. Sap zeno tana maesa de ngan sosublun hap, ee bejene. Zen diki Zen sa Alap mo Enhokam emsa baptis ta gwibiri, hen syaukkum.
¹⁷ Zen joksa zirensiꞌira– dekam de lensa len hap. Dangnak dena, desa yunak sa biti tala. Hwena syaena men zen dang alp san altiꞌik, desa tinsin srem syauk bla san dep sa yal ta sera.”
¹⁸ Zen kirekam-kirekam ol zim-zimsi ze mas gul gwizimki– dekam de Alap onakore ol dawem san dep titi tabin hip.
¹⁹ Hwena zen hen Galilea mo teipsinni, Herodeꞌa, damnak anakan jalse gweblaka, “Em bap ere mo oso mo wenya Herodianasa al gulbluka! Hen eno aha karek-karek gulin hala seranna hen beyana!”
²⁰ Hwena Herodes dekam zep jal gweblaka. Zen dekam zep Alap mo nwenak zere hap de karekna etan mam gulsuku– Yohanissi kim bwinak tak ta inkiye.
²¹ Hwena bwinak kim nama dayalsik srem gweꞌak, zi beyana insa kim baptis tabirida'anka, Yesussu hen dekam zep baptis taka. Yesus kim kon ola gu soneꞌanka, nglina dekam zep hlang ne hanak.
²² Alap mo Enhona dekam zep mawana ohola mo nwe-masekam Zebon onak dep ati gwe ine zaka. Ngatan zi mo lang nakon dekam zep hen ola anakan wet sohak, “Em in ere mo Tane– ere mo dang tininak de tanganna. Ëe ama tangan Emsa sam gwesik gweblanan.”
²³ Yesus kim syala kon gwisibir hanaꞌanka, zeno gwen tahunna san ha tiga-pulukam mes yap. Zini dekam man tim di gwek, “Zeno biana Yusup,” zep zeno auyan-aza mo bosem-sena, diki an zen: Yesus mo auyanna Eli,
²⁴ Eli mo biana Matat, Matat mo biana Lewi, Lewi mo biana Malki, Malki mo biana Yanai, Yanai mo biana Yusup,
²⁵ Yusup mo biana Matica, Matica mo biana Amos, Amos mo biana Nahum, Nahum mo biana Hesli, Hesli mo biana Nagai,
²⁶ Nagai mo biana Maat, Maat mo biana Matica, Matica mo biana Simei, Simei mo biana Yosek, Yosek mo biana Yoda,
²⁷ Yoda mo biana Yohanan, Yohanan mo biana Resa, Resa mo biana Zerubabel, Zerubabel mo biana Sealtiel, Sealtiel mo biana Neri,
²⁸ Neri mo biana Malki, Malki mo biana Adi, Adi mo biana Kosam, Kosam mo biana Elmadam, Elmadam mo biana Er,
²⁹ Er mo biana Yesua, Yesua mo biana Eliezer, Eliezer mo biana Yorim, Yorim mo biana Matat, Matat mo biana Lewi,
³⁰ Lewi mo biana Simeon, Simeon mo biana Yehuda, Yehuda mo biana Yusup, Yusup mo biana Yonam, Yonam mo biana Elyakim,
³¹ Elyakim mo biana Melea, Melea mo biana Mina, Mina mo biana Matata, Matata mo biana Natan, Natan mo biana Daud,
³² Daud mo biana Isai, Isai mo biana Obed, Obed mo biana Boas, Boas mo biana Salmon, Salmon mo biana Nahason,
³³ Nahason mo biana Aminadab, Aminadab mo biana Admin, Admin mo biana Arni, Arni mo biana Hezron, Hezron mo biana Peres, Peres mo biana Yehuda,
³⁴ Yehuda mo biana Yakob, Yakob mo biana Isak, Isak mo biana Abraham, Abraham mo biana Tera, Tera mo biana Nahor,
³⁵ Nahor mo biana Serug, Serug mo biana Rehu, Rehu mo biana Peleg, Peleg mo biana Eber, Eber mo biana Salmon,
³⁶ Salmon mo biana Kenan, Kenan mo biana Arpaksad, Arpaksad mo biana Sem, Sem mo biana Nuh, Nuh mo biana Lamek,
³⁷ Lamek mo biana Metusalah, Metusalah mo biana Hanok, Hanok mo biana Yared, Yared mo biana Mahalalel, Mahalalel mo biana Kenan,
³⁸ Kenan mo biana Enos, Enos mo biana Set, Set mo biana Adam, hen Adam mo biana Alap.