Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iperentahken TUHAN man si Musa
2 gelah ngataken man kalak Israel, maka kalak si erdosa janah ngelanggar pedah-pedah TUHAN alu la sengaja, arus ngikutken aturen-aturen enda.
3 Adi Imam si Mbelin si erdosa e, kerina jelma si nterem pe ikut erdosa. Erkiteken si e arus ipersembahkenna sada jenggi lembu nguda si la lit sitik pe man pandangen. Ipersembahkenna e man TUHAN guna nasapken dosana.
4 Ibabanalah lembu e ku pintun Kemah Perjumpan. Kenca bage iamparkenna lah tanna i babo takal lembu e, jenari i bas ingan e lembu e igelehna i adep-adepen TUHAN.
5 Ibuat Imam si Mbelin lah sitik dareh lembu e, jenari ibabana ku bas Kemah.
6 Icebukkenna lah jari-jarina ku bas dareh e, emaka ipirpirkenna pitu kali ku lebe-lebe kire-kire si badia.
7 Kenca bage itamakenna sitik dareh e ku tanduk batar-batar ingan nutung kumenen i bas Kemah Perjumpan e. Si lebihna iamburkenna ku teruh batar-batar persembahen tutungen si lit i lebe-lebe pintun Kemah.
8 Kerina tabeh-tabeh lembu e arus ibuatna, tabeh-tabeh si maluti tukana,
9 piahna ras tabeh-tabeh i bas piah e, bage pe bagin atena si mejilena.
10 Imam arus nutung kerina tabeh-tabeh i das batar-batar persembahen tutungen bali ras penutungna tabeh-tabeh asuh-asuhen si igeleh guna persembahen persadan.
11 Tapi ibuat lah kerina kuling-kulingna, dagingna, takalna, pahana, isi beltekna ras tukana,
12 jenari ibabana kerina ku darat ingan erkemah, ku ingan si bersih rikutken aturen agama, ingan ngamburken abu. I je me itutungna i babo ranting si gara.
13 Adi si erdosa e kerina perpulungen Israel, janah ersalah erkiteken ngelanggar pedah TUHAN alu la sengaja,
14 kenca dosa e ieteh minter kerina perpulungen maba sada jenggi lembu si nguda guna ipersembahken. Babana lah e ku Kemah Perjumpan.
15 Itamaken peminpin-peminpin perpulungen e lah tanna i babo takal lembu e, jenari igelehna i bas ingan e.
16 Jenari ibaba Imam si Mbelin sada bagin dareh lembu e ku bas Kemah Perjumpan.
17 Icebukkenna jari-jarina ku bas dareh e, emaka ipirpirkenna pitu kali ku lebe-lebe kire-kire.
18 Itamana lah sitik dareh ndai ku tanduk batar-batar kumenen si lit i bas Kemah Perjumpan, emaka ibana iamburken ku teruh batar-batar persembahen tutungen si lit i lebe-lebe pintun Kemah.
19 Kenca bage ibuatna lah kerina tabeh-tabehna, itutungna kerina i babo batar-batar ingan persembahen.
20 Bagi pengelakokenna nandangi jenggi lembu persembahen kerna dosa, bage ka lah pengelakokenna nandangi jenggi lembu enda. Alu bage ipersembahkenna persembahen kerna dosa bangsa e kerina, janah bangsa e ialemi.
21 Kenca bage ibabana lah lembu e ku darat ingan erkemah, emaka itutungna, bali ras penutungna lembu persembahen kerna dosana sendiri. Enda me persembahen guna pengalemi dosa perpulungen.
22 Adi si erdosa e sekalak peminpin, janah ersalah ia erkiteken ngelanggar sada bagin perentah TUHAN alu la sengaja,
23 kenca dosana e ipebetehken man bana, arus maka minter ibabana persembahen sada kambing bajarna si la lit sitik pe man pandangen.
24 Iamparkenna lah tanna i babo takal kambing e, janah kenca bage igelehna lah kambing e arah Utara batar-batar, ingan asuh-asuhen persembahen tutungen igeleh. Enda me persembahen pengalemi dosa.
25 Icebukken imam lah jari-jarina ku bas dareh asuh-asuhen e, jenari itamakenna lah ku tanduk batar-batar e. Lebihna iamburkenna lah ku teruh batar-batar persembahen e.
26 Kenca bage maka itutungna lah kerina tabeh-tabehna i das batar-batar persembahen, bali ras penutungna tabeh-tabeh asuh-asuhen si igeleh guna persembahen persadan. Bagenda me arusna imam mpersembahken persembahen kerna dosa sekalak peminpin. Alu bage ialemi me dosa peminpin ndai.
27 Adi sekalak rayat biasa erdosa, janah ersalah erkiteken ngelanggar sada bagin pedah TUHAN alu la sengaja,
28 kenca dosana e ipebetehken, arus maka minter ipersembahkenna sada kambing beru-beru si la lit sitik pe man pandangen.
29 Iamparkenna tanna i babo takal kambing e, emaka igelehna arah Utara batar-batar persembahen e, ingan asuh-asuhen persembahen tutungen igeleh.
30 Icebukken imam lah jari-jarina ku bas dareh asuh-asuhen e, kenca bage itamakenna ku tanduk batar-batar e.
31 Kenca bage iaguina lah kerina tabeh-tabehna, bagi pengaguina tabeh-tabeh asuh-asuhen si igeleh man persembahen persadan. Emaka itutungna lah tabeh-tabeh i babo batar-batar persembahen, gelah merim iakap TUHAN. Bagenda me arusna imam mpersembahken persembahen guna dosa kalak ndai, janah ialemi me ia.
32 Adi kalak mpersembahken sada biri-biri kerna dosana, arus maka biri-biri e beruna si la lit sitik pe man pandangen.
33 Iamparkenna lah tanna i babo takal biri-biri e, emaka igelehna lah arah Utara batar-batar, ingan asuh-asuhen persembahen tutungen igeleh.
34 Icebukken imam lah jari-jarina ku bas dareh asuh-asuhen e, kenca bage itamakenna lah ku tanduk batar-batar. Ibana iamburkenna lah ku teruh batar-batar persembahen e.
35 Kenca bage iaguina lah kerina tabeh-tabehna, bali ras pengaguina tabeh-tabeh biri-biri si igeleh guna persembahen persadan. Kenca bage maka itutungna lah tabeh-tabeh e i babo batar-batar bali ras persembahen pangan si ipersembahken man TUHAN. Bagenda me arusna imam mpersembahken persembahen kerna dosa kalak ndai, janah ialemi me ia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA