Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nasuroi Batara Musa
2 ampa’la’bangi napau mange ri tu Israel angkanaya inai-nai tena nasangajakki a’gau’ dosa lanri nadakkai kalase’renna parentaNa Batara, musti nipinawangi anne paratoranga.
3 Punna anjo dorakaya iamintu Imang Lompoa, sa’genna ta’beso’ ngaseng todong bansa Israel sala, musti assarei koro’bang iamintu sikayu sapi laki rungka, ia tenaya callanna, mae ri Batara sollanna nipammopporang salana.
4 Anjo sapia musti nierangi mange ri pakke’bu’ KemaNa Batara. Musti napadongkoki limanna Imang Lompoa ri tompo’ ulunna anjo olo’-oloka, nampa nasamballe ri dallekanna Kemaya.
5 Sipa’gang cera’na musti nierangi antama’ ri Kemaya.
6 Nampa musti najallakkang karemenna antama’ ri anjo ceraka siagang naparacci’ pintuju ri dallekanna gordeng passimbanna Kamara’ Matangkasaka.
7 Sipa’gang anjo ceraka musti nipasapui ri tanru’-tanru’ niaka ri sikamma panyingkulu’na pattunuang dupa bauka ilalang ri Kemaya; nampa la’binnaya musti nipatiriki ri dapara’na tampa’ pakkoro’bangngang koro’bang nitunua ia niaka ri dallekanna pakke’bu’ Kemaya.
8 Imanga musti naallei sikontu jannana anjo sapi lakia, iamintu janna anrokokiai bone parru’na,
9 lempanna siagang jannana siagang atenna kaminang bajika.
10 Yangasenna anjo musti natunu ngasengi irate ri tampa’ pakkoro’bang nitunua, sangkamma nigaukanga untu’ koro’bang passiamakkanga.
11 Mingka dagenna anjo sapia, kukkulu’na, ulunna, bangkenna, bone parru’na kammayatompa parru’ lolona,
12 jari yangasenna, pantaranganna bageang le’baka nisa’la’, musti nierangi assulu’ ri pantaranganna pakkemaanga. Anjoreng, anjo sapia musti nitunui irate ri kayu pepe’ tampa’ pammelakkang aua, iamintu tampa’ le’baka nisa’la’.
13 Punna ia dorakaya iamintu sikontu umma’ Israel, lanri tenana nakunjungi andakkai kalase’renna parentaNa Batara,
14 jari tena nasallo ri niassennamo anjo dosaya, anjo ummaka musti angngerangi sikayu sapi laki rungka mae ri dallekang KemaNa Batara. Anjo olo’-oloka musti nipassareangi untu’ a’jari koro’bang nipammopporanna dosaya.
15 Sikamma pamimping bansaya musti napadongkoki limanna ke’nanga ri tompo’ ulunna anjo olo’-oloka, nampa nasamballe ri anjo tampaka.
16 Imang Lompoa musti naerangi sipa’gang cera’na anjo olo’-oloka antama’ ri Kemaya.
17 Anjoreng musti najallakkangi karemenna antama’ ri anjo ceraka nampa napiracciki sa’genna pintuju ri dallekanna gordeng passimbanna Kamara’ Matangkasaka.
18 Sipa’ganga pole musti napasapui mae ri tanru’-tanru’ niaka ri sikamma panyingkulu’na pattunuang dupaya lalang ri Kemaya; nampa la’binnaya musti nipatiriki ri dapara’na tampa’ pakkoro’bangngang untu’ koro’bang nitunua, ia niaka ri dallekang pakke’bu’na Kemaya.
19 Sikontu jannana anjo olo’-oloka musti niallei nampa nitunu irate ri tampa’ pakkoro’bangnganga.
20 Ia carana sangkammai passare sapi laki nipassareanga untu’ nipammopporanna dosaya. Kammaminjo carana Imang Lompoa ampassareangi koro’banga untu’ nipammopporanna dosa-dosana ummaka, na nipammopporammo anjo dosa-dosaya ri Batara.
21 Nampa anjo sapi lakia musti nierangi assulu’ na nitunu ri pantaranganna pakkemaanga, sangkamma nigaukanga ri passare sapi lakia untu’ koro’bang nipammopporanna dosana kallena anjo Imang Lompoa. Kammaminjo batena nipassareang koro’bang untu’ nipammopporanna dosana ummaka.
22 Punna anjo tudorakaya iamintu tau anna’galaka koasa lanri tenana nakunjungi andakkai kalase’renna parentaNa Batara,
23 jari tena nasallo ri le’ba’na nasadari musti assarei koro’bang sikayu bembe laki tenaya callanna untu’ nipammopporanna dosana.
24 Musti napadongkoki limanna irate ri tompo’ ulunna anjo olo’-oloka, nampa nasamballe anjoreng ri bageang wara’na tampa’ pakkoro’bangnganga, tampa’ pammolonganna olo’-olo’ untu’ koro’bang nitunua.
25 Imanga musti najallakkangi karemenna antama’ ri cera’na anjo olo’-oloka nampa napasapu mae ri tanru’-tanru’ niaka ri sikamma panyingkulu’na tampa’ pakkoro’bangnganga siagang napatiri’ la’binna antama’ ri dapara’na tampa’ pakkoro’bangnganga.
26 Nampa sikontu jannana anjo olo’-oloka musti nitunui irate ri tampa’ pakkoro’bangnganga, sangkamma nigaukanga ri koro’bang passiamakkanga. Kammaminjo carana imanga ampassareangi koro’banga untu’ dosana se’rea tau anna’gala’ koasa, na nipammopporammo dosana anjo taua ri Batara.
27 Punna nia’ sitau ra’ya’ biasa a’gau’ dosa lanri tena nakunjungi andakkai kalase’renna parentaNa Batara,
28 lintaki ri nasadarinamo musti assarei koro’bang sikayu bembe gana ia tenaya callanna.
29 Musti napadongkoki limanna ri tompo’ ulunna anjo olo’-oloka, nampa nasamballe ri bageang wara’na tampa’ pakkoro’bangnganga ri tampa’ pammolonganna olo’-oloka untu’ koro’bang nitunua.
30 Imanga musti najallakkangi karemenna antama’ ri cera’na anjo olo’-oloka, nampa napasapu mae ri tanru’-tanru’ niaka ri sikamma panyingkulu’na tampa’ pakkoro’bangnganga, siagang napatiri’ la’binna antama’ ri dapara’na tampa’ pakkoro’bangnganga.
31 Sikontu jannana anjo olo’-oloka musti niallei sangkamma todong nigaukanga ri koro’bang passiamakkanga. Anjo jannaya musti natunui imanga irate ri tampa’ pakkoro’bangnganga, sollanna rasanna napakasannangi nyawaNa Batara. Kammaminjo carana imanga ampassareangi koro’banga untu’ dosana se’rea ra’ya’ biasa, na nipammopporammo dosana anjo taua ri Batara.
32 Punna nia’ tau assare sikayu gimbala’ untu’ koro’bang nipammopporanna dosana, anjo gimbalaka musti gana siagang tenaya callanna.
33 Musti napadongkoki limanna irate ri tompo’ ulunna anjo olo’-oloka, nampa nasamballe ri bageang wara’na tampa’ pakkoro’bangnganga, ri tampa’ pammolonganna olo’-olo’ nipassareanga untu’ koro’bang nitunu.
34 Imanga musti najallakkangi karemenna antama’ ri anjo cera’ olo’-oloka, nampa napasapu ri tanru’-tanru’ niaka ri sikamma panyingkulu’na tampa’ pakkoro’bangnganga, siagang napatiri’ la’binna naung ri dapara’na tampa’ pakkoro’bangnganga.
35 Nampa musti nialle ngaseng sikontu jannana anjo olo’-oloka sangkamma nigaukanga ri koro’bang passiamakkanga. Anjo jannaya musti nitunui irate ri tampa’ pakkoro’bangnganga, siagang ngaseng koro’bang nikanre maraenganga ia nipassareanga mae ri Batara. Kammaminjo carana imanga ampassareangi koro’bang untu’ nipammopporanna dosana anjo taua, na nipammopporammo dosana ri Batara.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA