Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nasuroi Batara anjo Musa
2 ampassareangi anne paratorang-paratoranga mae ri Harun, sikamma ana’na siagang sikontu bansa Israel.
3 Punna nia’ tu Israel assare koro’bang sapi, gimbala’ yareka bembe mae ri Batara, anjo olo’-oloka musti nasamballei ri dallekang pakke’bu’ KemaNa Batara. Punna anjoreng ri tampa’ maraenga nasamballe, nadakkaimi hukkunNa Batara lanri appasolongi cera’. Tenamo nanibilangi anggota umma’Na Allata’ala.
4 (17:3)
5 Ia ero’na anjo parentaya iamintu sollanna naerang bansa Israel mange ri KemaNa Batara sikontu olo’-olo’ nipassareanga ia biasaya nasamballe ke’nanga ri kokoa. Musti naerangi ke’nanga anjo passarea mange ri imanga ri dallekang pakke’bu’ KemaNa Batara nampa nasamballe anjoreng untu’ koro’bang passiamakkang.
6 Imanga musti napatiriki cera’na anjo olo’-oloka mae ri sikamma sa’rinna anjo tampa’ pakkoro’bangnganga ri dallekang pakke’bu’ KemaNa Batara, nampa natunu jannana sollanna anjo rasanna napakasannangi nyawaNa Batara.
7 Bansa Israel musti tamamminrayai mae ri Batara, siagang tena sikali-kali nakkulle anynyamballe ke’nanga olo’-olo’ ri koko-kokoa untu’ passare mae ri sikamma jing ja’dalaka. Anjo paratoranga musti nituruki sa’genna satunggu-tungguna.
8 Punna nia’ tu Israel yareka bansa maraeng ammantang tulia ri alla’na tu Israel assare koro’bang nitunu yareka koro’bang maraengang
9 mae ri Batara, musti napassareangi ri dallekang pakke’bu’ KemaNa Batara. Punna anjorengi ri tampa’ maraenga napassareang, takkulleami nibilang anggota umma’Na Allata’ala.
10 Punna nia’ tu Israel yareka bansa maraeng ammantang tulia ri alla’na tu Israel angnganre cera’, lanihukkungi ri Batara siagang takkulleami nibilang anggota umma’Na Batara.
11 Nyawana sikamma apa attallasaka niaki lalang ri cera’na. Lanri kammana anjo Naparentakangi Batara sollanna sikontu ceraka nipatiriki irate ri tampa’ pakkoro’bangnganga sollanna nitangkasi dosa-dosana ummaka. Ceraka iamintu nyawaya, antangkasi dosaya.
12 Iaminjo saba’na nabansa Israelka yareka bansa maraeng ammantang tulia ri alla’na ke’nanga tanipa’biangngai angnganre cera’.
13 Punna nia’ tu Israel yareka bansa maraeng ammantang tulia ri alla’na ke’nanga anjakkala’ jangang-jangang yareka olo’-olo’ maraengannaya iamintu tenaya naharang, musti napasuluki cera’na anjo olo’-oloka nampa natambungi siagang butta.
14 Nyawana sikamma apa attallasaka niaki lalang ri cera’na. Lanri kammana minjo Napappisangkangi Batara mae ri bansa Israelka angnganre cera’. Sikamma tau anggaukangai anjo apa Nipappisangkanga, tenamo nanibilangi anggota umma’Na Allata’ala.
15 Sikamma tu Israelka yareka bansa maraeng angnganrea dageng mate kalenna, yareka mate nikokko’ ri olo’-olo’ sekke’, musti nasassai pakeanna nampa a’je’ne’ siagang attayang sa’genna labu alloa, nampami a’jari tangkasa’.
16 Punna tena nagaukangi kammaya anjo, musti natanggongi kodina kale’bakkanna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA