Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhabuna PANGERAN ka Mosa,
2 "Areya’ atoran-atoranna opacarana nyocce’e oreng se baras dhari panyaket kole’ budhuk. E bakto oreng jareya enyata’agiya ja’ berse, kodu egiba ka imam,
3 imam kodu ngeba oreng jareya ka lowarra parkemahan. Mon menorot pamareksa’an oreng jareya la baras,
4 imam kodu nyoro oreng jareya ngeba mano’ se gi’ odhi’ ban se ta’ haram dhadhuwa’, ban kaju comara salonjur, tale mera ban hisop saranca’.
5 Mano’ se settong jareya kodu esambelli e attassa pennay tana se aesse aeng berse dhari somber.
6 Mano’ settonganna ban kaju comarana, tale merana ban hisop gella’ kodu ecabbur ka dhalem dharana mano’ se la esambelli jareya.
7 Dharana mano’ jareya bi’ imam kodu eketessagi pettong kale ka oreng se la baras jareya, ban imam pas anyata’agi ja’ oreng jareya berse. Saellana jareya mano’ se gi’ odhi’ jareya kodu eocol ka ra-ara.
8 Oreng buru kodu nyassa kalambina, nyokor obu’na sampe’ epatadha’, pas mandhi. Oreng jareya pas berse, sarta olle maso’ ka dhalem parkemahan, tape sampe’ pettong are aggi’ gi’ ta’ olle maso’ ka dhalem kemahna dibi’.
9 E are se kapeng petto’ oreng jareya kodu nyokor sakabbinna obu’na, bariya keya janggu’na, alessa ban sakabbinna bulu se badha e badanna. Saellana jareya pas kodu nyassa kalambina, terros mandhi. Buru saellana jareya oreng jareya pas berse.
10 E are se kapeng ballu’ oreng jareya kodu ngeba budhu’na dumba lake’ dhadhuwa’ ban budhu’na dumba bine’ settong se omorra sataon, se padha tadha’ calena, bariya keya teppong tello kilo se la ecampor ban mennya’ jaitun sapartellon liter menangka kurban sasajin.
11 Imam pas kodu ngeba oreng jareya ban tor-atorra ka adha’anna labangnga Kemah Socce.
12 Imam jareya kodu ngala’ budhu’na dumba se lake’ settong ban mennya’ jaitun se sapartellon liter kaangguy kurban tebbusanna kasala’an ban ngatorragi jareya ka PANGERAN menangka kurban kusus se daddi bagiyanna imam.
13 Budhu’na dumba jareya bi’ imam kodu esambelli e kennengngan se pera’ egabay kennengnganna panyambelliyanna keban kaangguy kurban pangamponanna dusa ban kurban obbaran. Dumba jareya kodu esambelli e jadhiya sabab kurban tebbusanna kasala’an ban pangamponanna dusa reya talebat soccena, ban daddi bagiyanna imam.
14 Imam kodu ngala’ dharana budhu’na dumba jareya sakone’, laju ebuliddagi ka kopeng kanganna oreng se enyata’agiya berse gella’, sarta ka pol-empolan tanang kanganna ban ka pol-empolanna soko kanganna.
15 Saellana jareya imam ngala’ mennya’ jaitun sakone’ pas eselen ka pa’-dapa’na tanangnga dibi’ se kacer.
16 Saellana jareya imam nyabbur garigi’na tanang kanganna ka dhalem mennya’ e tanang kacerra gella’ pas eketessagi pettong kale ka Kemah Socce.
17 Karena mennya’ se badha e tanangnga pas kodu ebuliddagi sakone’ ka bagiyan-bagiyan se la ebulidi dhara gella’, iya areya kopeng kanganna, pol-empolanna tanang kanganna, ban pol-empolanna soko kanganna oreng se enyata’agiya la berse jareya.
18 Karena mennya’ se badha e pa’-dapa’na tanangnga jareya kodu epobu ka attassa cethagga oreng jareya. Kalaban cara se kantha jareya imam mabadha opacara nyocce’e oreng jareya e ajunanna PANGERAN.
19 Saellana jareya imam kodu ngatorragi kurban pangamponanna dusa sopaja oreng se najjis jareya daddi berse. Samarena jareya imam kodu nyambelli keban se egabaya kurban obbaran,
20 kurban jareya kodu eatorragi epabareng ban kurban sasajin e mezba. Kalaban cara se kantha jareya imam mabadha opacara nyocce’e oreng jareya, ban oreng jareya pas daddi berse.
21 Mon oreng jareya ta’ andhi’ ban ta’ kowat, kaangguy kurban tebbusanna kasala’an olle pera’ ngeba budhu’na dumba lake’ malolo menangka kurban kusus ka PANGERAN, se daddi bagiyanna imam. Laen dhari jareya oreng buru kodu ngeba teppong sakilo ecampor ban mennya’ jaitun kaangguy kurban sasajin, ban mennya’ jaitun sapartellon liter.
22 Bariya keya pejji otaba budhu’na poter dhadhuwa’ se settong kaangguy kurban pangamponanna dusa ban settonganna kaangguy kurban obbaran.
23 Tor-ator jareya kabbi kodu egiba ka imam e adha’anna labangnga Kemah Socce e are se kapeng ballu’ e dhalem opacara se ebadha’agi kaangguy nyocce’e aba’na jareya.
24 Imam ngala’ budhu’na dumba ban mennya’ jaitunna, pas eatorragi menangka tor-ator kusus ka PANGERAN se daddi bagiyanna imam.
25 Saellana jareya imam kodu nyambelli budhu’na dumbana, dharana sakone’ ebuliddagi ka kopeng kanganna oreng se enyata’agiya berse gella’, ka pol-empolanna tanang kanganna, ka pol-empolanna soko kanganna.
26 Imam kodu nyelen mennya’ jareya sakone’ ka pa’-dapa’na tanangnga dibi’ se kacer,
27 laju ngetessagi mennya’ jareya bi’ garigi’na tanang kanganna ka Kemah Socce sampe’ pettong kale.
28 Karena mennya’ e tanangnga pas kodu ebuliddagi sakone’ ka bagiyan-bagiyan se la ebulidi dhara gella’, iya areya kopeng kanganna, pol-empolanna tanang kanganna ban pol-empolanna soko kanganna oreng se enyata’agiya berse gella’.
29 Karena mennya’na kodu eselen ka attassa cethagga oreng jareya kaangguy opacara nyocce’e aba’na e ajunanna PANGERAN.
30 Saellana jareya imam kodu ngatorragi sala settong dhari pejji otaba budhu’na poter se dhadhuwa’ gella’
31 kaangguy kurban pangamponanna dusa, dineng pejji ban poter settonganna kaangguy kurban obbaran se epabareng ban kurban sasajinna. Kalaban cara se kantha jareya imam gella’ mabadha opacara nyocce’e oreng jareya e ajunanna PANGERAN.
32 Jareya atoranna opacara kaangguy oreng se ta’ andhi’ se la baras dhari panyaket kole’ budhuk se enyata’agiya la berse."
33 Dhabuna PANGERAN ka Mosa ban Harun,
34 "Mon bangsa Isra’il la maso’ ka Kana’an, nagara se bi’ Sengko’ ebagiya ka bangsa jareya, mon bagiyanna bengkona badha se kot-lokoden kodu atoro’ ka atoran-atoran reya.
35 Pa’-sapa’a se nemmo badha bagiyan se kot-lokoden e bengkona, kodu abala ka imam.
36 Sabellunna dhateng mareksa bagiyan se kot-lokoden, imam jareya kodu marenta’agi sopaja apa’a bai se badha e dhalem bengko jareya epakalowar. Mon enja’, apa’a bai se badha e dhalem bengko jareya daddi najjis. Saellana jareya imam pas kodu entar ka bengko jareya
37 kaangguy mareksa bagiyan se kot-lokoden jareya. Mon badha bagiyan se lak-bellak se barnana ra’-sora’ biru otaba ra’-sora’ mera se abasanna akaton nyerrep ka dhalem geddhungnga,
38 imam kodu nyengla dhari bengko jareya ban bengko jareya kodu ekonci pettong are abidda.
39 E are se kapeng petto’ imam kodu entar ka jadhiya, mareksa pole. Mon ambungnga jareya alatlat,
40 imam jareya kodu marenta’agi sopaja to-batona geddhung se kot-lokoden jareya ebungkar ban bagiyan dhalemma geddhungnga bengko jareya kodu ekerrek kabbi, to-bato wang-buwanganna sarta lolo rek-kerreganna kodu ebuwang ka settong kennengngan se najjis e lowar kottha.
41 (14:40)
42 To-bato se epakalowar jareya pas kodu egante’e bato se anyar, ban geddhungnga kodu ekole’e bi’ lolo se anyar.
43 Mon kot-lokot jareya tombu pole, mangkana to-batona bengko jareya la egante’e ban dhung-geddhungnga la ekerrek ban ekole’e pole,
44 imam kodu entar mareksa bengko jareya pole. Mon kot-lokot jareya alatlat, bengko jareya najjis
45 ban kodu epagujur. To-batona, ju-kajuna ban sakabbinna lolona kodu egiba ka kennengngan se najjis e lowar kottha.
46 Pa’-sapa’a se maso’ ka bengko jareya sabatara gi’ ekonci, oreng jareya najjis sampe’ baja compet are.
47 Pa’-sapa’a se tedhung otabana ngakan e bengko jareya kodu nyassa kalambina.
48 Tape mon imam dhateng mareksa ban kot-lokot jareya ta’ tombu pole samarena dhung-geddhungnga egante’e kole’, imam kodu anyata’agi ja’ bengko jareya berse, sabab kot-lokot jareya la elang kabbi.
49 Kaangguy nyocce’e bengko jareya, imam kodu ngala’ mano’ dhadhuwa’, kaju comara, tale mera ban hisop.
50 Mano’na se settong kodu esambelli e attassa pennay tana se aesse aeng se gi’ buru ngala’ dhari somber.
51 Kaju comarana, talena se mera, hisop ban mano’na se gi’ odhi’ kodu ecabbur ka dhalem dharana mano’ se la esambelli gella’ ban ka dhalem aeng se gi’ buru ngala’ dhari somber jareya. Ban bengko jareya kodu eketesse pettong kale.
52 Mano’ se gi’ odhi’ kodu eocol ka ra-ara e lowar kottha. Kalaban cara se kantha jareya imam mabadha opacara nyocce’e bengko jareya, ban bengko jareya laju berse.
53 (14:52)
54 Jareya atoran-atoranna panyaket kole’ budhuk,
55 bu-tombu, poro otabana lak-bellak pote otabana ra-bara e badan; bariya keya atoranna bi-kalambi se ambung ban bengko se kot-lokoden.
56 (14:55)
57 Atoran-atoran reya gunana kaangguy nantowagi apa settong barang berse otaba najjis."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA