Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Napassareangi Batara mae ri Musa
2 anne paratorang-paratoranga ri passala’na pannangkasia punna ammollemo taua battu ri garring salaya. Ri allo nikanana latangkasa’mi anjo taua, anjo taua musti nierangi mange ri imanga,
3 nampa nierang ri imanga assulu’ ri pantaranna pakkemaanga. Punna turu’ pamaressana imanga ammollemi anjo taua,
4 nisuromi ri imanga anjo taua angngerang jangang-jangang attallasa’ tenaya naharang, siagang sipolong kayu camara, otere’ eja siagang sitangke supa.
5 Anjo jangang-jangang sikayua musti nisamballei irate ri uring butta le’baka nibonei je’ne’ battua ri timbuseng je’neka.
6 Nampa jangang-jangang sikayua pole siagang kayu camara, otere’ eja siagang sitangke supa musti nijallakkangi naung ri cera’na jangang-jangang le’bakamo nisamballe.
7 Imanga musti napiracciki anjo tau ammolleamo siagang cera’na anjo jangang-janganga sa’genna pintuju; le’baki anjo nibilang tangkasa’mi anjo taua.
8 Nampa anjo jangang-jangang attallasaka ija musti nalappassangi ri paranga. Nampa anjo taua musti nasassai pakeanna, nacukkuru’ ngasengi uu’na, siagang a’je’neki. Jari tangkasa’mi anjo taua siagang akkullemi antama’ ri pakkemaanga, mingka lalanna tuju alloa pole takkulleapi antama’ ri kema kalenna.
9 Ri makatujuna alloa musti nacukkuru’ ngasengi uu’na, janggo’na, bulu matanna siagang sikontu bulu-bulu niaka ri kalenna. Nampa nassasa pakeanna siagang a’je’neki. Punna le’ba’mo anjo nampami tangkasa’.
10 Ri allo makasagantujuna anjo taua musti angngerangi ruang kayu ana’ gimbala’ laki siagang sikayu ana’ gimbala’ gana umuru’ sitaunga, yangasenna tena callanna. Pantaranganna anjo angngerang tongi tallu kilo labu’ le’baka nipasileo’ siagang minynya’ zaitun siagang minynya’ zaitun bage talluna se’rea litere’.
11 Nampa musti naerang imanga anjo passarena mange ri dallekanna pakke’bu’ KemaNa Batara.
12 Imanga musti angngallei sikayu ana’ gimbala’ lakia sumpaeng siagang anjo minynya’ zaitun bage tallunna silitereka, untu’ a’jari koro’bang passambe karugiang, nampa napassareang salaku passare nipappicinikang mae ri Batara.
13 Anjo ana’ gimbalaka musti nasamballei ri tampa’ tassa’laka, iamintu tampa’ le’bakamo nipattantu untu’ pammolongang olo’-olo’ koro’bang pammopporang dosa siagang koro’bang nitunu. Anjo gimbalaka musti nisamballei anjoreng lanri anjo koro’bang passambe karugianga siagang koro’bang pammopporang dosaya teai sipato’ tangkasa’na siagang a’jari bageannai imanga.
14 Musti angngallei imanga sike’de’ cera’ ana’ gimbala’ nampa napasapu mae ri leko’ toli kananna, ri anrong lima kananna siagang ri anrong bangkeng kananna anjo tau lanipa’jari tangkasaka.
15 Nampa angngalle sike’de’ imanga minynya’ zaitun na napatiri’ ri pala’ lima kalenna ri kairia.
16 Le’baki anjo najallakkammi karemeng lima kananna antama’ ri minynyaka, siagang naparacci’ pintuju antama’ ri KemaNa Batara.
17 Nampa anjo minynya’ sike’deka ri limanna musti napasapui mae ri tampa’-tampa’ le’baka nisapui cera’, iamintu ri leko’ toli kananna, ri anrong lima kananna siagang ri anrong bangkeng kananna anjo tau eroka nipa’jari tangkasa’.
18 La’binnaya minynyaka musti nipatiriki irate ri ulunna anjo taua. Kammaminjo nanagaukammo imanga upacara pannangkasia mae ri anjo taua ri dallekanNa Batara.
19 Nampa musti napassareang imanga koro’bang pammopporang dosaya sollanna a’jari tangkasa’ anjo tau ra’masaka. Le’baki anjo musti ammolongi olo’-olo’ untu’ koro’bang nitunu,
20 nampa napassareang siagang koro’bang nipatala irate ri tampa’ pakkoro’bangnganga. Kammaminjo nanagaukammo imanga upacara pannangkasia mae ri anjo taua, sa’genna a’jari tangkasa’mo anjo taua.
21 Punna kasi-asi anjo taua siagang tena pakkullena, akkullei angngerang sikayumo bawang ana’ gimbala’ laki untu’ koro’bang passambe karugiang, a’jari koro’bang nipatala mae ri Batara. Pantaranganna anjo sikilo labu’ nipasileoka siagang minynya’ zaitun untu’ koro’bang nipatala, siagang bage tallunna silitereka minynya’ zaitun.
22 Musti angngerang tongi ruang kayu jangang-jangang bodobangkeng rungka yareka bukkuru’ rungka: sikayu untu’ koro’bang pammopporang dosa na sikayu pole untu’ koro’bang nitunu.
23 Sikontu anjo passarea musti naerangi mange ri imanga ri dallekang pakke’bu’ KemaNa Batara ri allo makasagantujuna upacara pannangkassina kalenna.
24 Imanga naallei anjo ana’ gimbalaka siagang minynya’ zaitunga nampa napassareang salaku passare nipappicinikang mae ri Batara siagang iaminjo untu’ bageanna imanga.
25 Nampa imanga musti nasamballei anjo ana’ gimbalaka siagang napasapui sike’de’ cera’na mae ri leko’ toli kananna, ri anrong lima kananna siagang ri anrong bangkeng kananna anjo tau eroka nipa’jari tangkasa’.
26 Imanga musti napatiriki sike’de’ minynyaka ri pala’ lima kairinna
27 nampa naparacci’ siagang lima kananna anjo minynyaka pintuju lalang ri KemaNa Batara.
28 Nampa anjo sike’deka minynya’ ri limanna musti napasapui mae ri tampa’-tampa’ le’bakamo nisapui cera’, iamintu ri leko’ toli kananna, ri anrong lima kananna, siagang ri anrong bangkeng kananna anjo tau eroka nipa’jari tangkasa’.
29 La’binna anjo minynyaka musti nipatiriki irate ri ulunna anjo taua untu’ upacara pannangkasi kalenna ri dallekanNa Batara.
30 Nampa imanga musti napassareangi anjo sikayua jangang-jangang bodobangkeng yareka bukkuru’ rungka sumpaeng
31 untu’ koro’bang pammopporang dosa, nampa sikayua pole untu’ koro’bang nitunu siagang koro’bang nipatalana. Kammaminjo na nagaukammo imanga upacara pannangkasia mae anjo taua ri dallekanNa Batara.
32 Iaminjo paratoranga ri passala’na upacara pannangkasia mae ri tau ammolleamo battu ri garring salaya punna tena pakkullena.
33 Napassareangi Batara mae ri Musa siagang Harun
34 paratorang-paratorang ri passala’na balla’ natabaya jappo’ a’la’banga. Anne paratorang-paratoranga nipakei ri wattunna antama’mo bansa Israel ri pa’rasangang Kanaan, iamintu pa’rasangang Napassareanga Batara mae ri ke’nanga.
35 Inai-nai ambuntuluki jappo’ kammaya lalang ri balla’na, musti nalaporoki anjo passalaka mae ri imanga.
36 Lalang tenanapa nabattu imanga amparessai anjo jappoka, musti naparentakangi imanga sollanna sikontu apa-apa niaka lalang ri anjo ballaka nipasulu’ ngasengi. Punna tena, sikontu apa-apa niaka lalang ri anjo ballaka a’jari ra’masa’ ngasengi. Nampa musti battui imanga,
37 untu’ amparessai anjo jappoka. Punna nia’ ballang-ballang kamma moncongbulo tanja’na yareka eja-ejai tanja’na sangkamma ammallasaki antama ri temboka,
38 imanga musti nabokoi anjo ballaka nampa nalappassang takkonci anjo ballaka lalang tuju allo.
39 Ri makatujuna alloa musti battui pole imanga amparessai. Punna a’la’bang anjo jappoka,
40 musti naparentakangi sollanna nibongkara’ anjo batu-batu tembo’ natabaya jappo’ nampa nikekkese’ ngaseng tembo’ bageang lalanna. Bate kekkese’na palestereka siagang anjo batu-batua musti nipelaki ri tampa’ ra’masaka ri pantaranna kotaya.
41 (14:40)
42 Nampa anjo batu-batu nipasuluka musti nisambei siagang batu-batu beru. Sikontu tembo’na anjo ballaka musti nilapisiki siagang palestere’ beru.
43 Punna ammumba poleang anjo jappoka, nampa le’ba’mo nisambei batu-batuna anjo ballaka siagang le’ba’ tommi nikekkese’ tembo’-tembo’na nampa nipalestere’ beru ammotere’,
44 musti battui pole imanga amparessa poleangi anjo ballaka. Punna memang alla’bangi anjo jappoka, anjo ballaka ra’masaki,
45 siagang musti nibongkaraki. Batu-batunna, kayu-kayunna siagang sikontu palestere’na musti nipelaki ri tampa’ ra’masaka ri pantaranna kotaya.
46 Inai-nai antama’ ri anjo ballaka sumpaeng, a’jari ra’masaki sa’genna labu alloa.
47 Inai-nai attinro yareka angnganre ri anjo ballaka musti nasassai pakeanna.
48 Mingka punna battu imanga na turu’ pamaressana tenamo nammumba poleang jappoka baku’ le’ba’na nipalestere’ poleang, musti napaui angkanaya tangkasaki anjo ballaka, lanri anjo jappoka tappela’ ngasemmi.
49 Untu’ pannangkasi balla’, imanga musti angngallei ruang kayu jangang-jangang, kayu camara, otere’ eja siagang sitangke kayu supa.
50 Jangang-jangang sikayua musti nipolongi irate ri uring le’baka nibonei siagang je’ne’ battua ri timbuseng je’neka.
51 Nampa anjo kayu camaraya, otere’ ejaya, kayu supaka siagang jangang-jangang attallasaka ija musti najallakkangi antama’ ri cera’na anjo jangang-jangang le’baka nipolong sumpaeng, siagang antama’ ri anjo je’ne’ ci’nonga. Le’baki anjo musti napiracciki anjo ballaka pintuju.
52 Anjo jangang-jangang attallasaka ija musti nalappassangi ri paranga ri pantaranna kotaya. Kammaminjo na nagaukammo imanga upacara pannangkasia mae ri anjo ballaka, sa’genna a’jari tangkasa’mo anjo ballaka.
53 (14:52)
54 Iaminjo paratorang-paratoranga ri passala’na garring salaya,
55 ri passala’na puru-purua, kambang-kambanga yareka ballang-ballang keboka yareka apa angkambussuluka ri kalea, kammayatompa ri passala’na kajappokang niaka ri pakeanga yareka ri ballaka.
56 (14:55)
57 Iaminjo paratorang-paratoranga nipake untu’ ampattantui angkanaya apaka anjo se’reanga apa-apa tangkasaki yareka ra’masaki.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA