Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sura si'i yako resi aku, i Paulus. Aku pomakau i ngKerisitu Yesu apa etu semo pamporani i mPue Allah resi aku. Pasi sura si'i yako resi i Timotius, a'i ngkita to samba'a pangaya.
2 Wali kami mangantulis sura si'i resi komi to pua'i mami to samba’a pangaya nja'u kota Kolose. Komi seja i Pue Allah Puenya pasi mansarumaka seja i Kerisitu. Wali aku makai-kai see i Pue Allah, Pa'a ngkita, pasi i Pue Yesu Kerisitu damampaponsanika komi kanotoNya pasi mangawaika komi karodo ndaya.
3 Wali kami sangkani mampokai-kaika komi, pasi tempo kami makai-kai etu, kami manganto'oka i Pue Allah, Pa'a i Yesu Kerisitu, Pue ngkita, tarima matao.
4 Naka pei kami manganto'oka Ia tarima matao apa kami roomo mangandonge kareba mangkonong pangaya ngkomi resi i Kerisitu Yesu pasi mangkonong pamporayang ngkomi resi samparia tau to i Pue Allah Puenya.
5 Wali naka pei komi mangaya pasi mamporayang ewa wetu, apa saba anu to nusarumaka ngkomi to rapasigenaka komi ndate saruga. Anu to rapasigenaka komi etu rapakanasaka seja resi komi seore tempo tau mampakarebaka komi anu to monso, etu semo kareba matao.
6 Wali komi mangandonge kareba matao etu seore pasi mawali manasa mangkonong ewa wimba kamonsonya kanoto i mPue Allah. Panewa yako etu kanjo’u-njo’u kaboro-boros komi to mangaya pasi to rawali lengko ngkatuwumu. Pasi palaong to mawali resi komi etu, palaong etu mawali seja ri sambawo lino tempo tau mangandonge kareba matao. Wali kareba matao etu maya raporapaka ewa kaju to boros wuanya.
7 Wali tempo komi mangandonge kareba etu seore, tau to mampotundeka komi kareba etu, etu semo i Epapras. Ia seja to papolaong i mPue sewaju ewa kami, pasi kami mamporayang kojo ia. Pasi ia masipato rasarumakaka mangika palaong i ngKerisitu damangansawang komi.
8 Wali ia semo to mangagagangika kami mangkonong pamporayang ngkomi to yako resi i Nosa Mapasing.
9 Wali see naka kami tare pandoonya mampokai-kaika komi yako ri tempo kami mangandonge kareba etu. Kami mamporapika resi i Pue Allah see Ia damangawaika komi samparia kapande pasi kanasa to yako resi i Nosa Mapasing. Panewa yako kapande pasi kanasa etu, Ia damampaponsanika komi pamporani to si Ia.
10 Naka pei kami makai-kai ewa wetu, see komi damangika lengko ngkatuwu to masipato naika ntau to mangalulu i Pue pasi to sangkani mampakasanang Ia. Apa ane ewa see, boros ngaya palaong to matao to danuika ngkomi. Palaong etu maya raporapaka ewa wua ngkaju. Pasi kanjo'u-njo'u tidugadugang anu to komi mangansani mangkonong i Pue Allah.
11 Wali kami mamporapika seja resi i Pue Allah see Ia damangampake samparia kuasaNya damampakaroso raya ngkomi singkonong pei karosoNya anu masipato tabarong. Apa ane ewa see, komi sangkani ndende raya ngkomi pasi mangainsoka mangansabaraka tempo mangarata kasusa.
12 Pasi kami mamporapika resi i Pue Allah, Pa’a ngkita, see komi damanganto'oka Ia tarima matao apa Ia mangika see komi masipato mangarata seja anu to Ia damangawaika tau to maroo ri raya ngkareme, etu semo samparia tau to Ia Puenya.
13 Apa Ia roomo mampalaes kita yako ri kuasa ngkawuri pasi mangkeni kita ri ara ngkuasa nu AnaNya to naporayang kojo. Wali AnaNya semo mawali Makole ngkita.
14 Wali AnaNya etu, Ia semo to mangoli yau kita see kita tamo ri ara huku nu dosa. Pasi raaNya to masuwu tempo Ia mate, etu semo to Ia mangampake mangoli yau kita. See naka dosa ngkita tamo nakitanaka i mPue Allah. Wali masipato kojo kita mangabarong Ia pasi manganto'oka Ia tarima matao.
15 Wali i Pue Allah taa rakita, pei AnaNya ewa gambar to mampakanasaka kita ewa wimba kamonsonya i Pue Allah, apa Ia sewaju kojo pei i Pue Allah. Pasi Ia semo to re’e ri katawanya samparia to yusa rapapowali, wali Ia semo to baebae anggaNya pei samparia to etu.
16 Apa Ia semo nampapowali samparia anu to re'e. Etu semo anu to ndate saruga, pasi to ri wawo lino, to rakita pasi to taa rakita. Ia nampapowali samparia anu to nato'o ntau pue, pasi samparia makole, pomarenta pasi anu to yusa to re'e kuasanya. Wali samparia anu to re'e etu paka napapowali nu Ana i mPue Allah pasi yako pamporani to si Ia naka pei re'e.
17 Wali tempo tawa re'e bara kesaa, Ia re'emo. Pasi samparia anu to re'e Ia semo to mangkuasang see sangkani masilonga.
18 I Pue Allah masilonga kojo, wali ane ewa pamporani to si Ia samparia kasilongaNya etu paka re'e seja ri raya nu AnaNya. Pasi AnaNya etu, Ia semo to napake i mPue Allah mangika jaya see samparia anu to re'e, to ri wawo lino pasi to ndate saruga, rawali see maya masingkatao pei Ia. Apa tempo i Yesu mate ri kaju pasape masuwu raaNya, pasi yako raaNya etu naka pei re'e kasingkatao. Wali Ia semo kepala ngkita to mangaya Ia, to raporapaka ewa koroNya. Ia pu'u ngkatuwu ngkita pasi Ia semo to matiruyu rawangu muni yako ri kapateNya pei taa mate wo'u. Wali naka pei palaong etu mawali, see Ia semo to bae kojo pangkaNya.
19 (1:18)
20 (1:18)
21 Wali seore komi longko yako resi i Pue Allah, pasi komi bali i mPue Allah apa saba pampobuuka pasi lengko ngkomi to maja'a.
22 Pei si'i-si'i i Pue Allah roomo mangawali komi see komi seja maya masingkatao pei Ia. Ia mangika palaong to etu mangampake koro i ngKerisitu to mate rapaku ri kaju pasape. Pasi naka pei Ia mangika ewa wetu see tempo Ia damamposaka komi ri tangoNya komi damapasing pasi tare lengko to maya rato'o sala pasi to masipato raseko.
23 Ewa wetu damawali resi komi ane komi tare pandoonya mangaya i Pue see raya ngkomi mawali maroso pasi rodo. Pasi ne'e bata-bata raya ngkomi mansarumaka anu to nato'o ngkareba matao to nudonge ngkomi seore. Masipato komi mansarumaka kareba matao, apa kareba matao etu, etu semo kareba matao to roomo rapakarebaka resi samparia tau ri sambawo lino. Pasi naka pei aku mawali to papolaong see damampakarebaka kareba matao etu. Wali masipato kojo komi mansarumaka kareba etu.
24 Wali si'i-si'i aku mangarata kasesa saba mangika palaong to etu resi komi. Pei nempo korongku rasesai, aku tiroo ndende rayangku. Apa i Kerisitu mangkasesaka tau to rato'oka koronya. Etu semo samparia tau to mangaya Ia. Wali aku mangarata seja santila kasesa to narata i ngKerisitu etu, pasi to tiroowa narata ngkita.
25 Wali aku mawali to papolaong to mangansawang tau to mangaya apa etu semo palaong to nasarumakaka i mPue Allah aku. Ia mampokau aku mampaponsanika komi samparia tuntuNya,
26 etu semo songkaNya to tawa nansani ntau. SongkaNya etu Ia mangawuni see naka yako ri tempo owi tawa re'e tau to mangansani. Pei si'i-si'i Ia mampaponsanika tau to Ia Puenya.
27 Pasiwa tau to si’a to Yahudi, mangansani seja songka i mPue Allah etu. Songka etu meyawa kojo ewa kasugi to bae kojo batuanginya. Pasi songka etu mangkonong komi to si'a to Yahudi. Wali songka etu semo i Kerisitu re'e ri raya ngkita, wali kita damangarata santila kayawa i mPue Allah.
28 Wali kami mampakarebaka resi samparia tau mangkonong i Kerisitu. Kami mampatiendoka sira pasi mampotundeka sira yako kasamparianya kapande to nawaika i mPue kami. Naka pei kami mangika ewa wetu see mampasilonga samparia tau etu to samba'a pei i Kerisitu Yesu.
29 Wali see naka aku maroso mapalaong, pasi aku madota mangika palaongingku etu singkonong pei karoso to nawaika i ngKerisitu aku yako ri kuasaNya to bae kojo.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA